Doiteronomio

28 “Ge e ba o ka theetša Jehofa Modimo wa gago ka go netefatša gore o kwa ditaelo tša gagwe ka moka tšeo ke go laelago tšona lehono, gona Jehofa Modimo wa gago o tla dira gore o fete ditšhaba tše dingwe ka moka tša mo lefaseng. 2 Ka ge o theetša Jehofa Modimo wa gago, o tla go šegofatša kudu, gomme dilo tše ka moka tše dibotse di tla tla go wena:

3 “O tla go šegofatša mo motseng a ba a go šegofatša le mašemong a gago.

4 “O tla go šegofatša ka bana ba bantšhi, dilo tšeo o di bjalago e tla ba tše dintšhi, le diruiwa tša gago di tla tswala kudu, e lego dikgomo le dinku.

5 “O tla šegofatša manki wa gago le sebjana sa gago sa go dubela folouru.

6 “O tla go šegofatša kae le kae mo o yago gona, a ba a šegofatša dilo ka moka tše o di dirago.

7 “Jehofa o tla dira gore manaba a lena a fenywe pele ga lena. Ge a etla go tlo le hlasela a tla diriša tsela e tee, eupša ge a tšhaba a tla diriša ditsela tše šupago tša go se swane. 8 Jehofa o tla šegofatša mafelo ao le bolokelago mabele go ona, a šegofatša dilo ka moka tšeo le di dirago a ba a le šegofatša nageng yeo yena Jehofa Modimo wa lena a le neago yona. 9 Jehofa o tla dira gore le be setšhaba sa gagwe se sekgethwa, feela bjalo ka ge a le enetše, ka gobane le tšwela pele le ekwa melao ya Jehofa Modimo wa lena le go sepela ditseleng tša gagwe. 10 Ditšhaba ka moka mo lefaseng di tla bona gore le bitšwa ka leina la Jehofa gomme di tla le boifa.

11 “Jehofa o tla dira gore le be le bana ba bantšhi, diruiwa tše dintšhi e bile dilo tšeo le di bjetšego e tla ba tše dintšhi nageng yeo Jehofa Modimo wa lena a enetšego borakgolokhukhu ba lena gore o tla le nea yona. 12 Jehofa o tla le bulela magodimo, go no swana le ge motho a bula lefelo leo le tletšego leo a bolokelago mabele go lona, gore a le nešetše pula ka nako ya gona le go šegofatša dilo ka moka tšeo le di dirago. Le tla adima ditšhaba tše dintšhi dilo, mola lena go ka se hlokagale gore le adime selo go tšona. 13 Jehofa o tla dira gore le be ka godimo ga ditšhaba tše dingwe, gomme a ka se dumelele gore di le laole. Dilo di tla dula di le sepelela gabotse, gomme le ka se palelwe ke selo ge e ba le tšwela pele le ekwa melao ya Jehofa Modimo wa lena yeo ke le laelago yona lehono e bile le e latela. 14 Le netefatše gore le kwa dilo ka moka tšeo ke le laelago tšona lehono, e bile le se ke la latela medimo e mengwe gore le e rapele.

15 “Eupša ge e ba le ka se theetše Jehofa Modimo wa lena ka go kwa ditaelo le melao ya gagwe ka moka yeo ke le laelago yona lehono, gona dilo tše ka moka tše mpe di tla tla go lena:

16 “O tla rogakwa mo motseng wa ba wa rogakwa le mašemong.

17 “Manki wa gago le sebjana sa gago sa go dubela folouru di ka se šegofatšwe.

18 “O ka se be le bana ba bantšhi, gomme dilo tšeo o di bjalago gotee le dinku le dikgomo tša gago e ka se be tše dintšhi.

19 “O tla rogakwa kae le kae mo o yago gona, wa ba wa rogakwa le dilong ka moka tše o di dirago.

20 “Jehofa o tla rogaka dilo ka moka tše o lekago go di dira, o tla dira gore o gakanege gomme a go otla go fihlela a go fedišitše kapela, ka gobane o dira dilo tše mpe e bile o mo tlogetše. 21 Jehofa o tla dira gore o be le bolwetši bjo bošoro go fihlela a go fedišitše nageng yeo o yago go e tšea gore e be ya gago. 22 Jehofa o tla go otla ka bolwetši bja mafahla, bolwetši bja go fiša kudu, go ruruga, o tla go otla ka tšhoša, moya o fišago kudu e bile dibjalo tša gago di tla hwa. Dilo tše di tla go tshwenya go fihlela o ehwa. 23 Ke tla tswalela magodimo gore a se ke a neša pula, e bile ke tla dira gore naga ya lena e se ke ya tšweletša dibjalo.* 24 Jehofa o tla dira gore pula ya nageng ya lena e be santa le lerole tšeo di tlago go le nela di etšwa magodimong go fihlela le fedišitšwe. 25 Jehofa o tla dira gore le fenywe pele ga manaba a lena. Le tla a hlasela le diriša tsela e tee, eupša ge le tšhaba le tla diriša ditsela tše šupago tša go se swane. Mebušo ka moka ya lefase e tla tšhoga ge e bona dilo tše mpe tšeo di le diragalelago. 26 Ditopo tša lena e tla ba dijo tša nonyana e nngwe le e nngwe yeo e fofago lefaufaung le phoofolo e nngwe le e nngwe ya nageng, gomme go ka se be le motho yo a di rakago.

27 “Jehofa o tla le otla ka dišo tše šoro tša Egepeta, go ruruga ga ditšhika,* lekhwekhwe le bolwetši bja letlalo, gomme le ka se alafege. 28 Jehofa o tla go otla ka bogaswi, bofofu le go gakanega. 29 Wena o tla phopholetša gohle mosegare wa sekgalela, go no swana le ge motho yo a foufetšego a phopholetša leswiswing, gomme dilo di ka se go sepelele gabotse dilong ka moka tšeo o di dirago, e bile batho ba tla dula ba go ropa le go go utswetša go se na motho yo a go thušago. 30 O tla tshepiša mosadi go mo nyala, eupša monna yo mongwe a mo kata. O tla aga ntlo, eupša wa se dule go yona. O tla bjala mašemo a diterebe, eupša wa se je dienywa tša wona. 31 Poo ya gago e tla hlabja pele ga mahlo a gago, eupša o ka se je le ge e ka ba seripana sa yona. Ba tla utswa tonki ya gago mo pele ga gago, gomme o ka se tsoge o e bone gape. Ba tla nea manaba a gago dinku tša gago, eupša go ka se be le yo a go thušago. 32 Batho ba bangwe ba tla tšea barwa ba gago le barwedi ba gago o ba lebeletše gomme o tla dula o duma gore ba boe, eupša go se na seo o ka se dirago. 33 Batho bao o sa ba tsebego ba tla ja dienywa tšeo di tšwago serapeng sa gago le dilo ka moka tše o di bunnego, gomme batho ba tla dula ba go ropa le go go swara gampe. 34 Dilo tšeo o di bonago di tla go gafiša.

35 “Jehofa o tla le otla ka dišo tše bohloko tšeo di sa alafegego mo matolong le mo maotong, le go tloga ka tlase ga leoto go fihla hlogong. 36 Jehofa o tla raka lena le kgoši yeo le tlago go ipeela yona, o tla le rakela setšhabeng seo lena le borakgolokhukhu ba lena le bego le sa se tsebe, gomme ge le le moo le tla hlankela medimo e mengwe, e lego medimo yeo e dirilwego ka kota le ka leswika. 37 Ge le fihla mafelong ao Jehofa a le raketšego go ona, dilo tšeo di tla bego di le diragaletše di tla tšhoša batho, gomme ba le sega ba ba ba dira metlae ka lena.

38 “Le tla gaša peu e ntšhi mašemong, eupša le tla buna dilo tše dinyenyane ka gobane dilo tšeo le tla bego le di bjetše di tla fetšwa ke tšie. 39 Le tla bjala meterebe dirapeng tša lena le go e hlagolela, eupša le ka se nwe beine yeo e tšwago diterebeng tšeo e bile le ka se bune selo ka gobane di tla fetšwa ke seboko. 40 Le tla ba le mehlare ya mehlware ditikologong tša lena ka moka, eupša le ka se tlole ka makhura a yona ka gobane dienywa tša mehlare yeo di tla hlohlorega. 41 O tla ba le barwa le barwedi, eupša ba ka se dule e le ba gago ka gobane ba tla išwa bothopša. 42 Dikhunkhwane tše dintšhi di tla senya mehlare ya lena ka moka le dienywa tša nageng ya lena. 43 Batho bao e sego Baisiraele bao ba dulago le lena ba tla ba matla go le feta, gomme lena le tla felelwa ke matla. 44 Bona ba tla le adima dilo mola lena le ka se be le dilo tšeo le ka ba adimago tšona, e bile bona ba tla le buša.

45 “Dilo tše tše mpe di tla dula di le mo go lena gomme tša le tshwenya go fihlela le fedišitšwe, ka gobane ga se la theetša Jehofa Modimo wa lena le go kwa melao ya gagwe le ditaelo tša gagwe tšeo a le laetšego tšona. 46 Dilo tše di tla tšwela pele di diragalela lena le bana ba lena e le leswao le temošo go ya go ile, 47 ka gobane ga se la ka la hlankela Jehofa Modimo wa lena le thabile ge le be le na le dilo tše dintšhi. 48 Jehofa o tla romela manaba a lena gore a tle a lwe le lena, gomme lena le tla a hlankela le swerwe ke tlala le lenyora, le apere diaparo tša go se re selo e bile le se na selo. Modimo yena o tla le rweša joko ya tšhipi molaleng go fihlela a le fedišitše.

49 “Jehofa o tla romela setšhaba se se tšwago kgole gore se tle se le hlasele, e lego setšhaba seo se tšwago mafelelong a lefase, seo se bolelago leleme leo le ka se le kwešišego, gomme sona se tla le hlasela go swana le ge ntšhu e hlasela phoofolo yeo e nyakago go e bolaya. 50 Ke setšhaba se bogale seo se se nago taba le motho yo mogolo goba go šokela ngwana. 51 Batho ba setšhaba seo ba tla ja diruiwa tša lena le dienywa tša nageng ya lena go fihlela le fedišitšwe. Ba ka se le šadišetše mabele, beine e mpsha, makhura, dinamane goba dikwana, go fihlela ba le fedišitše. 52 Ba tla le hlasela ba le tswalelela metseng ya lena ka moka nageng ka moka ya lena, go fihlela maboto a lena a magolo ao a le šireleditšego le ao le a tshepilego a ewa. Ruri ba tla le hlasela metseng ya lena ka moka nageng ka moka ya lena yeo Jehofa Modimo wa lena a le neilego yona. 53 Ka ge manaba a lena a tla be a hlasetše metse ya lena e bile le tlaletšwe, le tlo swanelwa ke go ja bana ba lena, yona nama ya barwa le barwedi ba lena bao Jehofa Modimo wa lena a le neilego bona.

54 “Gaešita le monna yo boleta kudu le yo a tlwaetšego go phela bophelo bja manobonobo a ka se šokele ngwanabo, goba mosadi wa gagwe yo a mo ratago kudu goba bana ba gagwe bao ba šetšego. 55 E bile a ka se ba nee le ge e ka ba seripa sa nama ya bana ba gagwe yeo a tlago go eja, ka ge a tla be a se na selo ka gore manaba a lena a tla be a hlasetše metse ya lena ka moka e bile le tlaletšwe. 56 Le gona, gaešita le mosadi yo boleta kudu le yo a tlwaetšego go phela bophelo bja manobonobo, yo a sa nyakego le go bea leoto la gagwe fase ka ge a nyaka go neneketšwa, a ka se šokele monna wa gagwe yo a mo ratago kudu, morwa wa gagwe goba morwedi wa gagwe, 57 ka gobane a ka se nyake go ba nea nama le ge e le efe ya bana ba gagwe bao a ba belegego, gaešita le go ba nea dilo tšeo di tšwago ka mpeng ya gagwe ka morago ga ge a belege. Yena o tla ja dilo tšeo a sa bonwe ke motho, ka gobane manaba a lena a tla be a hlasetše metse ya lena ka moka e bile le tlaletšwe.

58 “Ge e ba le ka se netefatše gore le latela mantšu ka moka a Molao wo, ao a ngwadilwego ka pukung ye e bile le sa boife leina le le legolo le leo le hlomphegago, e lego la Jehofa Modimo wa lena, 59 gona Jehofa o tla le otla kudu, lena le ditlogolo tša lena. O tla le otla ka dikotlo tše šoro kudu, e lego dikotlo tše dikgolo le tšeo di ka se felego, a ba a le otla le ka malwetši a šoro le ao a ka se folego. 60 Mo gare ga lena o tla tliša gape malwetši ka moka a Egepeta ao le bego le a tšhaba, gomme le ka se tsoge le fodile. 61 Le gona Jehofa o tla le tlišetša bolwetši le ge e le bofe le kotlo le ge e le efe tšeo di sego tša ngwalwa ka pukung ya Molao wo, go fihlela le fedišitšwe. 62 Gaešita le ge le le ba bantšhi go no swana le dinaledi tša magodimong, le tla šala le le ba sego kae ka gobane ga se la theetša lentšu la Jehofa Modimo wa lena.

63 “Le gona go no swana le ge Jehofa a ile a thabela go dira gore dilo di le sepelele gabotse le gore le be ba bantšhi, le mo lekgeng le Jehofa o tla thabela go le fediša le go le bolaya, gomme le tla phatlalatšwa la tlošwa nageng yeo le yago go e tšea gore e be ya lena.

64 “Jehofa o tla le phatlalatša ditšhabeng ka moka go tloga karolong e nngwe ya lefase go ya go e nngwe, ge le le moo le tlo swanelwa ke go hlankela medimo e mengwe yeo e dirilwego ka kota le ka leswika, yeo lena le borakgolokhukhu ba lena le bego le sa e tsebe. 65 Le ka se be le khutšo gare ga ditšhaba tšeo, e bile le ka se be le moo le ka kgonago go dula gona. Eupša ge le le moo Jehofa o tla dira gore le tšhoge, e bile la se sa bona gabotse le go felelwa ke matla. 66 Maphelo a lena a tlo ba kotsing, le gona le tla dula le boifa bošego le mosegare, gomme le ka se tsebe ge e ba le tla phologa. 67 Mesong le tla re: ‘Okare nkabe e le mantšiboa!’ gomme mantšiboa le tla re: ‘Okare nkabe e le mesong!’ ka baka la ge le tla be le tšhogile le ka baka la dilo tšeo le tla bego le di bona. 68 Jehofa o tla le bušetša Egepeta ka dikepe, e lego naga yeo ke le boditšego ka re le ka se sa boela go yona, gomme ge le le moo le tlo swanelwa ke go ithekiša go manaba a lena gore le be makgoba a banna le a basadi, eupša go ka se be le motho yo a le rekago.”