Puku ya Bobedi ya Dikoronika

20 Ka morago ga moo, Bamoaba le Baamoni gotee le ba bangwe ba Baamonimi* ba ile ba tla go lwa le Jehoshafate. 2 Ka gona Jehoshafate a botšwa gore: “Lešaba le legolo le tlile go tlo lwa le wena go tšwa tikologong ya lewatle,* go tšwa Edomo gomme ba kua Hatsatsone-thamara, ke gore Ene-gedi.” 3 Ge ba realo, Jehoshafate a tšhoga gomme a ikemišetša go tsoma Jehofa. Ka gona a laela gore batho ka moka bao ba dulago Juda ba ikone dijo. 4 Batho ka moka ba Juda ba kgoboketšwa gore ba tle ba kgopele thušo go Jehofa. Ba ile ba tla ba etšwa metseng ka moka ya Juda gore ba tle ba kgopele tlhahlo go Jehofa.

5 Ka gona Jehoshafate a emelela pele ga phuthego ya Juda le ya Jerusalema ka ntlong ya Jehofa pele ga lapa le leswa, 6 ke moka a re:

“Wena Jehofa Modimo wa borakgolokhukhu ba rena, na ga o Modimo magodimong? Le gona na ga o buše mebušo ka moka ya ditšhaba? Ka seatleng sa gago go na le matla bile ga go na motho yoo a ka lwago le wena. 7 Wena Modimo wa rena, na ga se wena o ilego wa raka batho bao ba bego ba dula nageng ye pele ga setšhaba sa gago sa Isiraele gomme wa efa ditlogolo* tša mogwera wa gago Aborahama gore di dule go yona go ya go ile? 8 Le gona di ile tša dula gona, gomme tša go agela sekgethwa seo se dirago gore leina la gago le retwe, tša re: 9 ‘Ge e ba re ka welwa ke masetlapelo, mohlomongwe ra hlaselwa ka sabola, ra ahlolwa o šoro, ra welwa ke leuba la bolwetši goba tlala, gona anke re emeng pele ga ntlo ye le pele ga gago (ka gobane leina la gago le ka ntlong ye), ke moka re llele go wena gore o re thuše masetlapelong ao, gona anke o kwe thapelo ya rena gomme o re phološe.’ 10 Baamoni, Bamoaba le batho bao ba dulago tikologong ya dithaba tša Seire šeba, bona bao o sa kago wa dumelela Baisiraele gore ba ba tšeele naga ya bona ge ba be ba etšwa nageng ya Egepeta. Baisiraele ba ile ba ba furalela gomme ba se ba fediše. 11 Ga bjale ba lefeletša botse ka bobe ka go re raka nageng ya gago yeo o re filego yona gore e be bohwa bja rena. 12 Hle Modimo wa rena, re kgopela gore o ba ahlole. Ka gobane rena ga re na matla a go lwa le lešaba le le legolo, ebile ga re tsebe gore re dire eng, eupša mahlo a rena a lebeletše wena.”

13 Ka nako yeo, batho ka moka ba Juda ba be ba eme pele ga Jehofa ba na le basadi ba bona le bana ba bona ba bagolo le ba banyenyane.

14 Ke moka Jahasiele morwa wa Sakaria morwa wa Benaya morwa wa Jeiele morwa wa Matania yo e lego Molefi wa go tšwa go barwa ba Asafa, a tlelwa ke moya wa Jehofa a le gare ga phuthego. 15 Ke moka a re: “Lena batho ba Juda ka moka le lena batho bao ba dulago Jerusalema gotee le wena Kgoši Jehoshafate, theeletšang. Jehofa o re go lena: ‘Le se ke la boifa goba la tšhošwa ke lešaba le le legolo, ka gobane ntwa ga se ya lena, eupša ke ya Modimo. 16 Gosasa le ye go lwa le bona. Ba tla be ba rotoga ka tsela yeo e bitšwago Tsitse gomme le tla gahlana le bona mafelelong a moedi pele ga lešoka la Jeruele. 17 Go ka se nyakege gore le lwe ntwa ye. Itokišeng, emang pho gomme le bone ge Jehofa a le phološa! Wena Juda le wena Jerusalema, le se ke la boifa goba la tšhoga. Gosasa eyang le yo lwa le bona gomme Jehofa o tla ba le lena.’”

18 Gateetee Jehoshafate a khunama sefahlego sa gagwe se kgwathile fase. Batho ka moka ba Juda le badudi ba Jerusalema le bona ba khunama pele ga Jehofa gore ba rapele Jehofa. 19 Ke moka Balefi bao e bego e le ditlogolo tša Kohathe le bao e bego e le ditlogolo tša Kora, ba emelela gore ba tumiše Jehofa Modimo wa Isiraele ka lentšu leo le hlabošago kudu.

20 Letšatšing la go latela, ba tsoga e sa le mesong gomme ba ya lešokeng la Thekoa. Ge ba be ba etšwa, Jehoshafate o ile a emelela a re: “Lena badudi ba Juda le Jerusalema, ntheetšeng! Ebang le tumelo go Jehofa Modimo wa lena e le gore le kgone go ema le tiile.* Ebang le tumelo go baporofeta ba gagwe gomme le tla atlega.”

21 Ge a se na go boledišana le batho, o ile a kgetha banna gore ba opelele Jehofa le go mo tumiša ba apere diaparo tše kgethwa, ba etile pele banna bao ba bego ba swere dibetša, ba re: “Lebogang Jehofa, ka gobane lerato la gagwe le le botegago le dula le le gona go ya go ya go ile.”

22 Ge ba thoma go opela dikoša ba thabile, Jehofa o ile a dira gore Baamoni le Bamoaba le batho bao ba bego ba dula tikologong ya dithaba tša Seire bao ba bego ba tlo hlasela Juda, ba hlaselwe ba sa letela gomme ba thoma go lwa seng sa bona. 23 Baamoni le Bamoaba ba ile ba thoma go hlasela batho bao ba bego ba dula tikologong ya dithaba tša Seire e le gore ba ba fediše. Ge ba fedišitše badudi ba Seire, ba ile ba bolayana seng sa bona.

24 Eupša ge Bajuda ba fihla moagong o motelele wa lešokeng, woo baleti ba letago ba le go wona, ba ile ba lebelela moo mašole a bego a le gona, gomme ba bona ditopo tša ona, di tletše mo fase ebile go se na yoo a phologilego. 25 Ka gona Jehoshafate le batho ba gagwe ba ile ba tla go tšeela batho bao ba bolailwego dilo tša bona. Ba ile ba hwetša dilo tše dintšhi, diaparo le dilo tše bohlokwa. Le gona ba ile ba ba tšeela tšona gore e be tša bona eupša ga se ba kgona go di rwala ka nako e tee. Ka gona, ba feditše matšatši a mararo ba rwalela dilo tšeo ka gobane e be e le tše dintšhi kudu. 26 Ka letšatši la bone ba ile ba kgobokana Moeding wa Beraka, e le gore ba tumiše* Jehofa. Ke ka baka leo ba ilego ba bitša lefelo leo gore ke Moedi wa Beraka* go fihla le lehono.

27 Ke moka banna ka moka ba Juda le ba Jerusalema ba boa ba etilwe pele ke Jehoshafate, ba boela Jerusalema ba thabile, ka gobane Jehofa o be a dirile gore ba thabe ka ge ba be ba fentše manaba a bona. 28 Ka gona ba tsena Jerusalema ba letša diletšo tša metato, diharepa le diphalafala gomme ba ya ntlong ya Jehofa. 29 Ge mebušo ka moka ya lefaseng e ekwa gore Jehofa o lwele le manaba a Baisiraele, e ile ya mmoifa. 30 Ka gona gwa se sa ba le selo seo se tshwenyanago le mmušo wa Jehoshafate gomme Modimo wa gagwe a tšwela pele a dira gore manaba a gagwe a se sa mo tshwenya.

31 Jehoshafate o ile a tšwela pele a buša Juda. O be a na le mengwaga e 35 ge a eba kgoši gomme o bušitše Jerusalema ka mengwaga e 25. Leina la mmagwe e be e le Asuba morwedi wa Shilihi. 32 O ile a tšwela pele a dira dilo tšeo tatagwe Asa a bego a di dira. Ga se a ka a tlogela go di dira, le gona o ile a dira dilo tše di lokilego pele ga Jehofa. 33 Eupša mafelo a phagamego ao go bego go rapelwa go ona ga se a ka a fedišwa, ebile setšhaba se be se se sa hlwa se lokiša dipelo tša sona gore se rapele Modimo wa borakgolokhukhu ba sona.

34 Ditaba ka moka tša Jehoshafate, tša go tloga mathomong go fihla mafelelong di ngwadilwe gare ga mantšu a Jehu morwa wa Hanani, ao a tsentšwego Pukung ya Dikgoši tša Isiraele. 35 Ka morago ga moo Kgoši Jehoshafate wa Juda o ile a dirišana le Kgoši Ahasia wa Isiraele, yoo a bego a dira dilo tše mpe. 36 Ka gona a mo dira modirišani wa gagwe wa go dira dikepe tša go ya Tarashishi. Dikepe tšeo ba be ba di direla Etsione-gebere. 37 Eupša Eliesere morwa wa Dodafahu wa Maresha o ile a porofetela Jehoshafate a re: “Jehofa o tla fediša mediro ya gago ka ge o dirišane le Ahasia.” Ka gona dikepe tšeo tša senyega gomme tša palelwa ke go ya Tarashishi.