Lefitiko

4 Jehofa a botša Moshe a re: 2 “Botša Baisiraele o re: ‘Ge e ba motho a ka dira sebe ka phošo ka go dira se sengwe sa dilo tšeo Jehofa a rilego re se ke ra di dira, gona a dire se se latelago:

3 “‘Ge e ba moperisita yo a tloditšwego, a ka dira sebe seo se dirago gore setšhaba le sona se be le molato, gona a tlišetše Jehofa powana e phetšego gabotse e le sebego sa sebe bakeng sa sebe seo a se dirilego. 4 A tliše poo yeo mojakong wa taberenakele pele ga Jehofa, a bee seatla sa gagwe godimo ga hlogo ya yona ke moka a e hlabe pele ga Jehofa. 5 Moperisita yo a tloditšwego a tšee a mangwe a madi a poo yeo a a tsenye ka taberenakeleng. 6 A ine monwana wa gagwe mading ao ke moka a rothetše a mangwe a madi ao gašupa pele ga Jehofa ka pele ga gareteine ya lefelong le lekgethwa. 7 Le gona moperisita a tlotše a mangwe a madi ao manakeng a aletare ya diorelo tša go nkga bose yeo e lego pele ga Jehofa ka taberenakeleng. Madi ka moka a poo yeo ao a šetšego a a tšhollele fase kgauswi le aletare ya dibego tša go fišwa yeo e lego kgauswi le mojako wa taberenakele.

8 “‘Ke moka a tloše makhura ka moka a poo yeo ya sebego sa sebe, le makhura ao a khupeditšego mala, makhura ka moka ao a lego maleng, 9 le dipshio tše pedi gotee le makhura ao a lego godimo ga tšona. A tloše le lekhura leo le lego sebeteng, gotee le dipshio. 10 A tloše dilo tšeo go swana le ge a di tloša go poo ya sehlabelo sa go dira khutšo le Modimo. Ke moka a di beše di thunye muši aletareng ya dibego tša go fišwa.

11 “‘Eupša ge e le letlalo la poo yeo, nama ya yona ka moka, hlogo ya yona, maoto a yona, mala a yona le ditšhila tša yona tšeo di lego ka maleng,* 12 e lego poo yeo ka moka, a e ntšhetše ka ntle ga ditente lefelong leo le hlwekilego moo melora e tšhollelwago gona, ke moka a e bee godimo ga dikgong gomme a e fiše. E swanetše go fišetšwa moo melora e tšhollelwago gona.

13 “‘Ge e ba setšhaba ka moka sa Isiraele se ka dira sebe ka phošo eupša sa se* lemoge gore se dirile selo seo Jehofa a rilego se se ke sa se dira, 14 gomme ka morago sebe seo sa tsebega, gona se tliše powana ya sebego sa sebe pele ga taberenakele. 15 Banna ba bagolo ba setšhaba ba bee diatla tša bona godimo ga hlogo ya poo yeo pele ga Jehofa gomme e hlabje pele ga Jehofa.

16 “‘Ke moka moperisita yo a tloditšwego, a tliše a mangwe a madi a poo yeo ka taberenakeleng. 17 Moperisita a ine monwana wa gagwe ka gare ga a mangwe a madi ao ke moka a a rothetše gašupa pele ga Jehofa ka pele ga gareteine. 18 A tlotše a mangwe a madi ao manakeng a aletare yeo e lego pele ga Jehofa ka taberenakeleng. Madi ka moka ao a šetšego a a tšhollele fase kgauswi le aletare ya dibego tša go fišwa yeo e lego kgauswi le mojako wa taberenakele. 19 A tloše makhura ka moka mo go yona, ke moka a e beše e thunye muši e le aletareng. 20 Poo yeo a e dire seo a se dirilego poo yela ya sebego sa sebe. Seo ke se moperisita a tlago go se dira, gomme sehlabelo seo se tla hlwekiša sebe sa setšhaba ke moka Modimo o tla se lebalela. 21 A ntšhetše poo yeo ka ntle ga ditente gomme a e fiše go swana le ge a fišitše poo yela ya pele. Ke sebego sa sebe sa setšhaba.

22 “‘Ge e ba yo mongwe wa baetapele ba setšhaba a ka dira sebe ka phošo ka go dira se sengwe sa dilo tšeo Jehofa Modimo wa gagwe a rilego re se ke ra di dira gomme a ba le molato, 23 goba ge a ka lemoga gore o dirile sebe ka go se kwe taelo e itšego, gona a tliše phookwana yeo e phetšego gabotse e le sebego sa gagwe. 24 A bee seatla sa gagwe godimo ga hlogo ya phookwana yeo, a e hlabele moo phoofolo ya sebego sa go fišwa e hlabelwago gona pele ga Jehofa. Ke sebego sa sebe. 25 Moperisita a kgwathe a mangwe a madi a sebego sa sebe ka monwana a a tlotše manakeng a aletare ya dibego tša go fišwa. Ke moka madi a yona ka moka ao a šetšego a a tšhollele fase kgauswi le aletare ya dibego tša go fišwa. 26 A beše makhura a yona ka moka gore a thunye muši aletareng go swana le makhura a sehlabelo sa go dira khutšo le Modimo. Ke moka moperisita yoo a hlwekiše moetapele yoo sebeng sa gagwe gomme Modimo o tla mo lebalela.

27 “‘Ge e ba motho le ge e le ofe setšhabeng a ka dira sebe ka phošo, ka go dira se sengwe sa dilo tšeo Jehofa a rilego re se ke ra di dira, 28 goba ge a ka lemoga gore o dirile sebe, gona a tliše putšanyana e tshadi yeo e phetšego gabotse. E be sebego ka baka la sebe seo a se dirilego. 29 A bee seatla sa gagwe godimo ga hlogo ya putšanyana yeo ya sebego sa sebe, a e hlabele moo phoofolo ya sebego sa go fišwa e hlabelwago gona. 30 Moperisita a kgwathe a mangwe a madi a sebego seo ka monwana, a a tlotše manakeng a aletare ya dibego tša go fišwa, ke moka madi a yona ka moka ao a šetšego a a tšhollele fase kgauswi le aletare. 31 A tloše makhura a sona ka moka go swana le ge a tloša makhura a sehlabelo sa go dira khutšo le Modimo. A se beše aletareng gomme se thunye muši wo o nkgago bose wo o yago go Jehofa. Le gona moperisita yoo a hlwekiše motho yo sebeng sa gagwe gomme Modimo o tla mo lebalela.

32 “‘Eupša ge e ba a ka tliša nku gore e be sebego sa gagwe sa sebe, gona a tliše e tshadi yeo e phetšego gabotse. 33 A bee seatla sa gagwe godimo ga hlogo ya nku yeo gomme a e hlabe e le sebego sa sebe. A e hlabele moo phoofolo ya sebego sa go fišwa e hlabelwago gona. 34 Moperisita a kgwathe a mangwe a madi a sebego seo ka monwana gomme a a tlotše manakeng a aletare ya dibego tša go fišwa, ke moka madi a yona ka moka ao a šetšego a a tšhollele fase kgauswi le aletare. 35 A tloše makhura a yona ka moka go swana le ge a tloša makhura a nku e tona ya sebego sa go dira khutšo le Modimo, a se beše aletareng gomme se thunye muši wo o nkgago bose wo o yago go Jehofa. Le gona moperisita yoo a hlwekiše motho yo sebeng sa gagwe gomme Modimo o tla mo lebalela.