Psalme
Ditaelo tšeo di yago go mohlahli. Koša ya Dafida.
68 Anke Modimo a emelele, anke manaba a gagwe a gašanywe,
Anke bao ba mo hloilego ba tšhabe pele ga gagwe.
2 Anke o ba phatlalatše go etša ge muši o tšewa ke phefo.
Anke batho ba babe ba fedišwe pele ga Modimo
Go swana le mamapo ao a tološwago ke mollo.
4 Opelelang Modimo, opelang dikoša tša go reta leina la gagwe.
Opelelang yo a sepelasepelago maganateng.*
Leina la gagwe ke Jah!* Thabang pele ga gagwe!
5 Yena yo e lego tatago bana bao ba hlokago botatago bona le yoo a šireletšago* bahlologadi
Ke Modimo yo a dutšego lefelong la gagwe le lekgethwa.
6 Modimo o nea bao ba hlokago magagabo bona lefelo la go dula.
O lokolla bagolegwa gomme a dira gore dilo di ba sepelele gabotse.
Eupša batho ba dinganga ba tla dula nageng e omilego.
7 Wena Modimo, ge o be o etile batho ba gago pele,
Ge o be o sepela leganateng, (Selah)
8 Lefase le ile la šikinyega,
Wa dira gore legodimo le neše pula.
Modimo, wena Modimo wa Isiraele, wa dira gore thaba ya Sinai e šikinyege.
9 Wena Modimo o nešitše pula ya matlorotloro,
Wa matlafatša batho ba gago bao ba bego ba lapile.
10 Wa ba dudiša ditenteng tša gago,
Ka baka la go loka ga gago, wa hlokomela badiidi, wena Modimo.
11 Jehofa o ntšha taelo.
Basadi bao ba bolelago ditaba tše dibotse ke mašole a mantšhi.
12 Dikgoši di a tšhaba gotee le mašole a tšona!
Mosadi yoo a šalago ka gae o fiwa tše dingwe tša dilo tšeo di hweditšwego ntweng.
13 Le ge lena banna le be le robetše kgauswi le mello yeo e goditšwego dikampeng,
Le tlo hwetša leeba leo le nago le maphego a silifera
Le gauta e sekišitšwego.
14 Ge Ramatlaohle a be a fenya dikgoši tša naga yeo,
Go ile gwa wa kapoko kua Tsalamone.
15 Thaba ya Bashani ke thaba ya Modimo.
Dithaba tša Bashani ke tše ditelele kudu.
16 Lena dithaba tše ditelele, ke ka baka la’ng le jela mona
Thaba yeo Modimo a ikgethetšego go dula go yona?
Ruri Jehofa o tla dula moo go ya go ile.
17 Modimo o na le dikoloi tša ntwa tše diketekete.
Jehofa o tlile lefelong le lekgethwa a etšwa Sinai.
18 Wena o rotogetše godimo.
O tšere mathopša.
O tšere dimpho tšeo e lego banna.
O tšere le ba dinganga gomme wa dula gare ga bona, wena Jah Modimo wa rena.
19 A go retwe Jehofa yoo a re rwalelago morwalo letšatši le letšatši,
Modimo wa nnete yo a re phološago. (Selah)
20 Modimo wa nnete ke Modimo yo a re phološago,
Le gona Mmuši Morena Jehofa o re phološa lehung.
21 Modimo o tla pšhatlaganya dihlogo tša manaba a gagwe,
O tla pšhatlaganya hlogo ya motho yo mongwe le yo mongwe yoo a tšwelago pele a dira dilo tše mpe.
22 Jehofa o itše: “Ke tla ba ntšha Bashani ka ba bušetša morago,
Ke tla ba ntšha madibeng a lewatle ka ba bušetša morago,
23 E le gore le sepele godimo ga madi a manaba a lena
Le gore dimpša tša lena di latswe madi a manaba a lena.”
24 Wena Modimo, ba bone melokeloke ya batho ba gago,
Melokeloke ya batho ba Modimo wa ka yo e lego Kgoši ya ka e tsena lefelong le lekgethwa.
25 Diopedi di etile pele, batho bao ba letšago diletšo tša metato ba di šetše morago.
Magareng ga bona go na le basetsana bao ba letšago meropa.
26 Retang Modimo phuthegong e kgolo,
Retang Jehofa, lena bao le tšwago go Tatago Isiraele.
27 Go na le moloko o monyenyane wa Benjamini wo o ba bušago,
O buša le baetapele ba Juda gotee le batho ba bona ba bantšhi bao ba goeletšago ba thabile,
Baetapele ba Sebulone le baetapele ba Nafutali.
28 Modimo wa gago o laetše gore wena o tlo ba le matla.
Wena Modimo, bontšha matla a gago ka mokgwa wo o ilego wa a bontšha go rena.
29 Dikgoši di tla go tlišetša dimpho
Ka baka la tempele ya gago yeo e lego Jerusalema.
30 Kgalemela dibata tšeo di dulago mahlakeng,
Gotee le mohlape wa dipoo le dinamane tša tšona,
Go fihlela batho ba go khunamela ba tlišitše* silifera.
Eupša o gašanya batho bao ba ratago ntwa.
32 Lena mebušo ya lefase, opelelang Modimo,
Opelelang Jehofa dikoša tša go mo tumiša, (Selah)
33 Yena yoo a sepelasepelago magodimong ao a bilego gona go tloga kgale.
Bonang! O dira gore lentšu la gagwe le matla le dume.
34 Retang Modimo ka gobane o na le matla.
Pušo ya gagwe e matla e Isiraele
Gomme matla a gagwe a lefaufaung.
35 Batho ba swanetše go hlompha le go boifa Modimo yo a dulago lefelong la gagwe le lekgethwa.
Ke Modimo wa Isiraele,
Yo a fago batho ba gagwe matla.
Retang Modimo.