Genesi

11 Ka nako yeo batho ka moka mo lefaseng ba be ba bolela leleme letee e bile ba diriša mantšu a go swana. 2 Ge ba be ba sepelela ka thoko ya bohlabela, ba ile ba hwetša naga yeo e se nago selo kua Shineara gomme ba thoma go dula moo. 3 Ke moka ba ile ba botšana ba re: “Etlang re direng ditena gomme re di fiše gore di tie.” Ka gona ba aga ka ditena go e na le go aga ka maswika, e bile ba šomiša sekontiri go di swaraganya. 4 Bjale ba re: “Etlang re ikageleng motse le moago o motelele woo ntlha ya wona e fihlago magodimong e le gore re tume le gore re se tlo phatlalala lefaseng ka moka.”

5 Ke moka Jehofa a lebelela batho gomme a bona motse le moago o motelele tšeo ba di agilego. 6 Ka gona Jehofa a re: “Batho ba ba na le botee ka gobane ba bolela leleme letee, e bile ba šetše ba thomile go dira dilo tše. Selo se sengwe le se sengwe seo ba se naganago ba tlo kgona go se dira. 7 Bjale etla re yo dira gore ba se sa bolela leleme letee gore ge ba bolela ba se ke ba kwešišana.” 8 Ka gona Jehofa a ba dira gore ba phatlalale lefaseng ka moka, gomme ba feleletša ba tlogetše go aga motse woo. 9 Ke ka baka leo motse woo o ilego wa bitšwa Babele,* ka gobane moo ke moo Jehofa a ilego a dira gore batho ka moka lefaseng ba bolele maleme a go se swane, gomme Jehofa a ba phatlalatša lefaseng ka moka.

10 Tše ke ditaba tša mabapi le Sheme.

Sheme o be a na le mengwaga e 100 ge a eba tatago Arapagashadi, e lego mengwaga e mebedi ka morago ga Meetsefula. 11  Ka morago ga gore Sheme e be tatago Arapagashadi, o ile a phela mengwaga e mengwe e 500 (makgolohlano) gomme a ba le barwa le barwedi.

12 Ge Arapagashadi a na le mengwaga e 35, e bile tatago Shela. 13 Ka morago ga gore Arapagashadi e be tatago Shela, o ile a phela mengwaga e mengwe e 403 (makgolonne-tharo) gomme a ba le barwa le barwedi.

14 Ge Shela a na le mengwaga e 30, e bile tatago Ebere. 15 Ka morago ga gore Shela e be tatago Ebere, o ile a phela mengwaga e mengwe e 403 (makgolonne-tharo) gomme a ba le barwa le barwedi.

16 Ge Ebere a na le mengwaga e 34, e bile tatago Pelege. 17 Ka morago ga ge Ebere e bile tatago Pelege, o ile a phela mengwaga e mengwe e 430 (makgolonne-masometharo) gomme a ba le barwa le barwedi.

18 Ge Pelege a na le mengwaga e 30, e bile tatago Reu. 19 Ka morago ga gore Pelege e be tatago Reu, o ile a phela mengwaga e mengwe e 209 (makgolopedi-senyane) gomme a ba le barwa le barwedi.

20 Ge Reu a na le mengwaga e 32, e bile tatago Seruge. 21 Ka morago ga gore Reu e be tatago Seruge, o ile a phela mengwaga e mengwe e 207 (makgolopedi-šupa) gomme a ba le barwa le barwedi.

22 Ge Seruge a na le mengwaga e 30, e bile tatago Nahoro. 23 Ka morago ga gore Seruge e be tatago Nahoro, o ile a phela mengwaga e mengwe e 200 (makgolopedi) gomme a ba le barwa le barwedi.

24 Ge Nahoro a na le mengwaga e 29, e bile tatago Thera. 25 Ka morago ga gore Nahoro e be tatago Thera, o ile a phela mengwaga e mengwe e 119 (lekgolo-lesomesenyane) gomme a ba le barwa le barwedi.

26 Ka morago ga gore Thera a be le mengwaga e 70, e bile tatago Aborama, Nahoro le Harane.

27 Tše ke ditaba tša mabapi le Thera.

Thera e bile tatago Aborama, Nahoro le Harane, gomme Harane ya ba tatago Lota. 28 Harane o ile a hlokofala ge Thera tatagwe a be a sa phela. O hlokofaletše nageng yeo a belegetšwego go yona kua Uri ya Bakaladea. 29 Aborama le Nahoro ba nyala basadi. Leina la mosadi wa Aborama e be e le Sarai, mola leina la mosadi wa Nahoro e be e le Milika morwedi wa Harane. Harane e be e le tatago Milika le Isika. 30 Sarai o be a sa kgone go ba le bana, ka gona o be a se na ngwana.

31 Ka morago ga moo, Thera a tšea morwa wa gagwe Aborama le Lota morwa wa Harane, e lego setlogolo sa gagwe, le ngwetši ya gagwe Sarai e lego mosadi wa Aborama, gomme ba tloga le yena Uri ya Bakaladea ba ya nageng ya Kanana. Ba ile ba feleletša ba le Harane gomme ba dula moo. 32 Thera o phetše mengwaga e 205 (makgolopedi-hlano). Ke moka a hlokofalela moo Harane.