Jeremia

44 Modimo o ile a bolela le Jeremia gore a botše Bajuda ka moka bao ba dulago nageng ya Egepeta, bao ba dulago Migidolo, Thahapanese, Nofe le nageng ya Patorose, gore: 2 “Jehofa wa madira, yena Modimo wa Isiraele, o re: ‘Lena le bone masetlapelo ka moka ao ke a tlišeditšego Jerusalema le metse ka moka ya Juda, gomme lehono ke marope feela, ga go na motho yoo a dulago moo. 3 Ke dirile se ka baka la dilo tše mpe tšeo le di dirilego gore le nkgopiše, ka go sepela la yo direla medimo e mengwe dihlabelo le go e hlankela, e lego medimo yeo lena le borakgolokhukhu ba lena le bego le sa e tsebe. 4 Ke ile ka dula ke romela bahlanka ba ka ka moka ba baporofeta go lena, ke ba roma gantšhi le gantšhi gore ba le botše gore: “Hle le se ke la dira selo se seo se šišimišago seo ke se hloilego.” 5 Eupša borakgolokhukhu ba lena ga se ba ka ba theetša goba go hlwaya tsebe gore ba tlogele dilo tše mpe tšeo ba di dirago ka go se direle medimo e mengwe dihlabelo. 6 Ka gona ke ile ka galefela le go tukela bogale metse ya Juda le diterata tša Jerusalema, gomme ya ba marope e bile gwa se sa ba le motho yo a dulago moo go fihla le lehono le.’

7 “Bjale Jehofa Modimo wa madira, yena Modimo wa Isiraele, o re: ‘Ke ka baka la’ng le ipakela masetlapelo a magolo, moo e lego gore banna le basadi ka moka, bana le masea ka moka, ba tla fedišwa mo Juda gomme gwa se šale le o tee wa lena? 8 Ke ka baka la’ng le nkgopiša ka dilo tšeo le di dirago ka go direla medimo e mengwe dihlabelo nageng ya Egepeta yeo le ilego la yo dula go yona? Le tlo fedišwa gomme la rogakwa le go tlontlollwa ditšhabeng ka moka tša lefase. 9 Na le lebetše dilo tše mpe tšeo borakgolokhukhu ba lena le dikgoši tša Juda le basadi ba tšona ba di dirilego? Le gona, na le lebetše le dilo tše mpe tšeo lena le basadi ba lena le di dirilego, e lego dilo tšeo di dirilwego nageng ya Juda le diterateng tša Jerusalema? 10 Ga se la ka la itshola go ba go fihla le lehono le, ga se la ka la ntlhompha goba go theetša molao wa ka le ditaelo tšeo ke le neilego tšona, lena le borakgolokhukhu ba lena.’

11 “Ka gona Jehofa wa madira, yena Modimo wa Isiraele, o re: ‘Ke ikemišeditše go le tlišetša masetlapelo, gore ke fediše batho ka moka ba Juda. 12 Ke tla tšea batho bao ba šetšego ba Juda bao ba bego ba ikemišeditše go ya nageng ya Egepeta gore ba dule moo, gomme ka moka ga bona ba tla fedišwa nageng ya Egepeta. Ba tla bolawa ka sabola le tlala, go tloga ka batho ba maemo a tlasana go fihla ka ba maemo a godimo. Ruri ba tla fedišwa ka sabola le tlala. E bile ba tla rogakwa, batho ba tšhoga ge ba ba bona, ba rogwa, ba ba ba gobošwa. 13 Ke tla otla bao ba dulago nageng ya Egepeta, go no swana le ge ke ile ka otla Jerusalema ka sabola, tlala le bolwetši. 14 Le gona, batho ba Juda bao ba šetšego bao ba ilego ba ya nageng ya Egepeta gore ba dule moo, ba ka se phonyokge goba go phologa gomme ba boela nageng ya Juda. Ba tla duma go boela gore ba dule moo, eupša ba ka se boele. Go tla boela feela batho ba sego kae bao ba phologilego.’”

15 Banna ka moka bao ba bego ba tseba gore basadi ba bona ba be ba direla medimo e mengwe dihlabelo, le basadi ka moka bao ba bego ba eme moo, bao e bego e le sehlopha se segolo, gotee le batho ka moka bao ba bego ba dula nageng ya Egepeta, kua Patorose, ba araba Jeremia ba re: 16 “Re ka se theetše seo o re boditšego sona o diriša leina la Jehofa. 17 Go e na le moo, re tla dira dilo ka moka tšeo re di boletšego ka gore re direle Kgošigadi ya Legodimo dihlabelo le go e tšhelela dibego tša dino, go no swana le ge rena, borakgolokhukhu ba rena, dikgoši tša rena le dikgošana tša rena re dirile bjalo kua metseng ya Juda le diterateng tša Jerusalema, ge re be re eja re khora e bile re humile nakong ya ge re be re sa bone masetlapelo le gatee. 18 Go tloga nakong ya ge re be re tlogela go direla Kgošigadi ya Legodimo dihlabelo le go e tšhelela dibego tša dino, re ile ra hloka dilo ka moka gomme ra fedišwa ka sabola le tlala.

19 “Ke moka basadi bona ba re: “Banna ba rena ke bona ba re dumeletšego go direla Kgošigadi ya Legodimo le go e tšhelela dibego tša dino, gotee le go dira dikuku tšeo di bopegilego go swana le Kgošigadi yeo.”

20 Ke moka Jeremia a botša batho ka moka, banna le basadi ba bona gotee le batho ka moka bao ba bego ba bolela le yena, a re: 21 “Jehofa o gopotše dihlabelo tšeo lena, borakgolokhukhu ba lena, dikgoši tša lena, dikgošana tša lena, le batho ba mo nageng, le di diretšego metseng ya Juda le diterateng tša Jerusalema, e bile di sa le mo pelong ya gagwe. 22 Mafelelong Jehofa o ile a se sa kgona go kgotlelela dilo tše mpe tšeo le di dirilego le tšeo di šišimišago, gomme naga ya lena ya fetoga lešope, ya tšhoša batho gomme ya rogakwa, ya hloka le motho yo a dulago go yona, go no swana le ge e le bjalo le lehono. 23 Masetlapelo a a le wetše ka gobane le diretše medimo e mengwe dihlabelo, le ka gobane le senyeditše Jehofa ka go se kwe seo Jehofa a se bolelago, gomme la se kwe molao wa gagwe, ditaelo tša gagwe le dikgopotšo tša gagwe, go no swana le ge go le bjalo le lehono le.”

24 Jeremia a re go batho ka moka le go basadi ka moka: “Ekwang seo Jehofa a se bolelago, lena batho ka moka ba Juda bao ba lego nageng ya Egepeta. 25 Jehofa wa madira, yena Modimo wa Isiraele, o re: ‘Seo lena le basadi ba lena le se boletšego ka melomo ya lena, le se phethagaditše ka diatla tša lena, ka gobane le itše: “Ruri re tla phetha dikeno tša rena ka go direla Kgošigadi ya Legodimo dihlabelo le go e tšhelela dibego tša dino.” Lena basadi tenang le tla phetha dikeno tša lena, ruri le tla di phetha.’

26 “Ka gona ekwang seo Jehofa a se bolelago, lena batho ka moka ba Juda bao ba dulago nageng ya Egepeta. Jehofa o re: ‘“Bjale ke ikana ka leina la ka le legolo gore go ka se sa ba le motho le ge e le ofe wa Juda nageng ka moka ya Egepeta, yo a tlago go ikana ka leina la ka a re: ‘Ke ikana ka Mmuši Morena Jehofa yo a phelago!’ 27 Bjale ke ba beile leihlo e le gore ke ba tlišetše masetlapelo e sego selo se sebotse. Batho ka moka ba Juda bao ba lego nageng ya Egepeta ba tla bolawa ka sabola le tlala, go fihlela ba fela. 28 Ke batho ba sego kae feela bao ba ka se bolawego ka sabola, bao ba tlago go boela nageng ya Juda ba etšwa nageng ya Egepeta. Ke moka batho ka moka ba Juda bao ba šetšego bao ba tlilego nageng ya Egepeta go tlo dula moo, ba tla tseba ge e ba lentšu leo le phethegilego le etšwa go nna goba go bona.”’”

29 “Jehofa o re: ‘Le tla bona ka se gore ke tla le otla lefelong le, gore le tle le tsebe gore masetlapelo ao ke tshepišitšego gore ke tla le tlišetša ona a tla direga e le ka nnete. 30 Jehofa o re: “Bjale ke neela Farao Hofura, yoo e lego kgoši ya Egepeta go manaba a gagwe le go bao ba nyakago go mmolaya, go no swana le ge ke ile ka neela Kgoši Tsedekia wa Juda go Kgoši Nebukadinetsara wa Babilona yoo e bego e le lenaba la gagwe e bile a nyaka go mmolaya.”’”