Psalme
Koša ya Maeto a go Rotoga. Koša ya Dafida.
122 Ke ile ka thaba ge ba be ba re go nna:
“A re yeng ntlong ya Jehofa.”
2 Gona bjale re tsene Jerusalema
E bile re eme ka gare ga yona.
3 Jerusalema e agilwe bjalo ka motse
Woo dintlo tša wona di kgomaganego.
4 Meloko e ile motseng woo,
Yona meloko ya Jah,*
Go ya ka molao wo Modimo a o filego Isiraele
E le gore e leboge leina la Jehofa.
5 Go be go beilwe didulo tša bogoši tša kahlolo motseng woo,
E lego didulo tša bogoši tša ntlo ya Dafida.
6 Kgopelang gore go be le khutšo Jerusalema.
Bao ba go ratago ba tla šireletšega.
7 Anke go dule go na le khutšo motseng wo,*
Anke bao ba dulago ditoreng tša gago ba dule ba šireletšegile.
8 Ka ge ke rata batho ba gešo le bagwera ba ka ke tla re:
“Anke batho bao ba dulago Jerusalema ba be le khutšo.”
9 Ke tla dula ke go kganyogela dilo tše dibotse
Ka ge ke rata ntlo ya Jehofa Modimo wa rena.