Jeremia

7 Jehofa o ile a bolela le Jeremia a re: 2 “Ema keiting ya ntlo ya Jehofa gomme o bolele molaetša wo: ‘Ekwang lentšu la Jehofa lena batho ka moka ba Juda bao ba tsenago ka dikeiti tše go tlo khunamela Jehofa. 3 Jehofa wa madira, yena Modimo wa Isiraele, o re: “Fetošang ditsela tša lena le dilo tšeo le di dirago, gomme ke tla le dumelela gore le tšwele pele le dula lefelong le. 4 Le se ke la tshepa mantšu a maaka gomme la re: ‘Ye ke tempele ya Jehofa, tempele ya Jehofa, tempele ya Jehofa!’ 5 Ka gobane ge e ba ka nnete le ka lokiša ditsela tša lena, la fetoša le dilo tšeo le di dirago, ge e ba le ka ahlola batho ka toka, 6 e bile ge e ba le ka se gatelele ditšhiwana, bahlologadi le batho bao ba tšwago nageng e nngwe, la se tšholle madi a batho bao ba se nago molato lefelong le, le gona ge e ba le ka se hlankele medimo e mengwe gomme la tla la ipakela mathata, 7 gona ke tla le dumelela gore le tšwele pele le dula lefelong le, e lego nageng yeo ke e neilego borakgolokhukhu ba lena gore e be ya bona go ya go ile.”’”

8 “Eupša le tshepile mantšu a maaka, gomme a ka se le hole ka selo le gatee. 9 Na le ka re le utswa, le bolaya, le hlotlola, le ena ka maaka, le direla Baali dihlabelo e bile le latela medimo e mengwe yeo le bego le sa e tsebe, 10 ke moka la tla la ema pele ga ka mo ntlong ye yeo e bitšwago ka leina la ka la re: ‘Re tla phološwa,’ mola e le gore le dira dilo tše ka moka tšeo di šišimišago? 11 Na ntlo ye yeo e bitšwago ka leina la ka e fetogile ntlo ya ditsotsi mo pele ga mahlo a lena? Nna ke bone seo le se dirago,” o realo Jehofa.

12 “‘Eupša sepelang le ye lefelong la ka leo le lego Shilo, moo ke ilego ka kgetha gore le ntlhankele gona mathomong,* gomme le bone seo ke se dirilego lefelo leo ka baka la dilo tše mpe tšeo batho ba ka ba Isiraele ba di dirilego. 13 Eupša lena le ile la tšwela pele le dira dilo tše ka moka tše mpe,’ o realo Jehofa ‘gomme le ge ke ile ka dula ke bolela le lena, ga se la ka la theetša. Ke ile ka dula ke le bitša fela la se nkarabe. 14 Ka gona seo ke se dirilego kua Shilo ke tla se dira le ntlong yeo e bitšwago ka leina la ka, yeo le e tshepilego, e bile ka se dira le lefelong leo ke le neilego lena le borakgolokhukhu ba lena. 15 Ke tla le raka pele ga ka, go swana le ge ke rakile banababo lena ka moka, e lego ditlogolwana ka moka tša Efuraime.’

16 “Ge e le wena o se ke wa rapelela batho ba, o se ke wa llela go nna, goba wa nthapela goba wa ba kgopelela tshwarelo, ka gobane nka se go theetše. 17 Na ga o bone seo ba se dirago metseng ya Juda le diterateng tša Jerusalema? 18 Bana ba topelela dikgong, botate ba gotša mollo, ke moka bomma ba duba folouru e le gore ba direle Kgošigadi ya Magodimo dinkgwa tša dihlabelo, le gona ba tšhelela medimo e mengwe dibego tša dino e le gore ba nkgopiše. 19 Jehofa o re: ‘Na ba kweša nna bohloko? Ba ikweša bohloko e bile ba tla hlabja ke dihlong.’ 20 Ka gona Mmuši Morena Jehofa o re: ‘Tsebang gore bogale bja ka le pefelo ya ka di tla tšhollelwa lefelong le, tša tšhollelwa bathong le diphoofolong, mehlareng le dienyweng tša naga. Bogale bja ka bo swana le mollo wo o tukago gomme o ka se ke wa tingwa.’

21 “Jehofa wa madira, yena Modimo wa Isiraele o re: ‘Dihlabelong tše dingwe tša lena, tsenyang le dibego tša lena tše di feletšego tša go fišwa gomme le je nama ya dihlabelo tšeo. 22 Letšatšing la ge ke be ke ntšha borakgolokhukhu ba lena nageng ya Egepeta, ga se ka ka ka bolela le bona goba ka ba nea taelo mabapi le dibego tše di feletšego tša go fišwa gotee le dihlabelo. 23 Eupša ke ile ka ba laela ka re: “Ekwang lentšu la ka gomme nna ke tla ba Modimo wa lena, lena la ba batho ba ka. Le sepele ditseleng ka moka tšeo ke le laelago tšona, e le gore dilo di le sepelele gabotse.”’ 24 Eupša ga se ba ntheetša goba ba mpha tsebe, fela ba ile ba no dira dilo tšeo ba di naganago, ba ngangabala ba latela dipelo tša bona tše mpe. Maemo a bona a ile a mpefala gomme a se kaonefale, 25 go tloga letšatšing leo borakgolokhukhu ba lena ba tšwilego nageng ya Egepeta go ba go fihla lehono le. Ka gona ke ile ka dula ke romela bahlanka ba ka ka moka go lena, e lego baporofeta, ke ba roma letšatši le letšatši, le gantšhintšhi. 26 Eupša ba ile ba gana go ntheetša, ba se mphe tsebe. Ba ile ba ngangabala gomme ba dira dilo tše mpe go feta borakgolokhukhu ba bona.

27 “O tla ba botša dilo tše ka moka, eupša ba ka se go theetše, o tla ba bitša eupša ba ka se go arabe. 28 O ba botše o re: ‘Se ke setšhaba sa batho bao ba sego ba kwa lentšu la Jehofa Modimo wa bona, le gona ba ganne go amogela tayo. Ga go sa na yo a tshepegago.’

29 “Kota moriri wa gago o motelele o o lahle, o opele koša ya sello mebotong, ka gobane Jehofa o ganne batho ba bao ba dirilego gore a galefe kudu e bile o tla ba lahla.” 30 Jehofa o re: “Batho ba Juda ba dirile dilo tše mpe pele ga ka. Ba beile medimo ya bona yeo e šišimago ka ntlong yeo e bitšwago ka leina la ka, e le gore ba e šilafatše. 31 Ba agile mafelo a phagamego a go rapela medimo ya maaka Thofethe, yeo e lego Moeding wa Morwa wa Hinomo, gore ba fiše barwa ba bona le barwedi ba bona mollong, e lego selo seo ke sa kago ka ba laela gore ba se dire, e bile ke sa kago ka se nagana le go se nagana.’

32 Jehofa o re: “Tsebang gore go tla matšatši ao Thofethe le Moedi wa Morwa wa Hinomo di tlago go fetošwa maina, gomme di tla bitšwa Moedi wa Polao. Ba tla bolokela bahu Thofethe go fihlela go se sa na lefelo leo ba ka bolokelago go lona. 33 ‘Ditopo tša batho ba e tla ba dijo tša dinonyana tša magodimo le tša dibata tša nageng, go se na yo a di tšhošago gore di tšhabe. 34 Metseng ya Juda le diterateng tša Jerusalema, ke tla dira gore go se sa kwagala medumo ya lethabo le ya go thakgala, ka dira gore go se sa kwagala lentšu la monyadi le la monyadiwa, ka gobane naga e tla ba marope.’”