Jeremia
18 Jehofa o ile a bolela le Jeremia a re: 2 “Ema o ye ntlong ya motho yo a bopago ka letsopa, gomme gona moo ke tla dira gore o kwe mantšu a ka.”
3 Ka gona ke ile ka ya ntlong ya motho yo a bopago ka letsopa, gomme ka hwetša a bopa sebjana. 4 Eupša sebjana seo motho yo a bopago ka letsopa a bego a se dira, se ile sa senyega ka seatleng sa gagwe. Ke moka a dira sebjana se sengwe ka letsopa leo, go ya le ka mokgwa wo a bego a nyaka ka gona.
5 Ke moka Jehofa a bolela le nna a re: 6 “‘Lena Baisiraele, na nka se kgone go le dira seo motho yo a bopago ka letsopa a se dirilego?’ O realo Jehofa. ‘Bonang! Go no swana le letsopa leo le lego ka seatleng sa mmopi, le lena le no ba bjalo ka seatleng sa ka, lena Baisiraele. 7 Nako le ge e le efe ge nka bolela ka mmušo goba setšhaba gore ke tla se tumola, ka se tloša le go se fediša, 8 gomme sona sa tlogela mekgwa e mebe yeo ke boletšego ka yona, le nna ke tla fetoša monagano gomme ka se sa se tlišetša masetlapelo ao ke bego ke nyaka go a tlišetša sona. 9 Eupša nako le ge e le efe ge nka bolela ka mmušo goba setšhaba gore ke tla se aga le go se bjala, 10 gomme sona sa dira dilo tše mpe pele ga ka, sa se kwe dilo tšeo ke di bolelago, gona ke tla fetoša monagano mabapi le dilo tše dibotse tšeo ke bego ke nyaka go di direla sona.’
11 Jehofa o re: “Bjale botša batho ba Juda le badudi ba Jerusalema o re ke re: ‘Ke nyaka go le tlišetša masetlapelo e bile ke le logela maanomabe. Sokologang hle, le tlogeleng mekgwa ya lena e mebe, gomme le lokišeng ditsela tša lena, le tlogeleng go dira dilo tše mpe.’”
12 Eupša bona ba re: “Ga go hole selo! Re tla dira seo re se ratago, gomme yo mongwe le yo mongwe o tla tiiša hlogo ya gagwe a latela pelo ya gagwe e mpe.”
13 Ka gona Jehofa o re:
“Hle, botšišang gare ga ditšhaba.
Ke mang yo a kwelego selo sa go swana le se?
Setšhaba sa Isiraele se dirile sebe seo se šiišago kudu.
14 Na kapoko ya Libanoni e ka tologa maswikeng a moo?
Goba na meetse a tonyago ao a elelago a etšwa nageng ya kgole a ka pšha?
15 Eupša batho ba ka ba ntebetše,
Ka gobane ba direla selo seo se se nago mohola dihlabelo.
Ba dira gore batho ba kgopše, gomme ba ba aroša ditseleng tša nnete, tšona ditsela tša kgale,
Gore ba sepele ditseleng tše dinyenyane tšeo di sego tša kgorwa, e bile di sego tša lekelelana,
16 E le gore ba dire gore naga ya bona e be selo seo se tlabago,
Seo batho ba se leletšago molodi ba kgotsa go ya go ile.
Yo mongwe le yo mongwe yo a fetago nageng yeo o tla e lebelela a maketše, gomme a šikinya hlogo.
17 Ke tla ba gašanya pele ga lenaba la bona, go swana le ge lerole le tšewa ke phefo ya ka bohlabela.
Letšatšing la ge ba wetšwe ke masetlapelo ke tlo ba furalela, ka se ke ka ba bontšha sefahlego sa ka.”
18 Ke moka bona ba ile ba re: “Etlang re logeleng Jeremia maano, ka gobane molao wo o tšwago go baperisita, le keletšo yeo e tšwago go banna ba bohlale, gotee le lentšu la Modimo leo le tšwago go baporofeta, di ka se hwelele. Etlang re mo hlaseleng ka leleme, gomme re se ke ra theetša seo a se bolelago.”
19 Ntheetše hle Jehofa,
Gomme o kwe seo batho bao ba nkganetšago ba se bolelago.
20 Na botse bo ka bušetšwa ka bobe?
Ba nkepetše molete gore ba mpolaye.
Gopola kamoo ke ilego ka ema pele ga gago gore ke bolele dilo tše dibotse ka bona,
E le gore o se sa ba galefela.
21 Ka gona dira gore barwa ba bona ba hwe ka baka la tlala,
Gomme ba bolawe ka sabola.
Anke basadi ba bona ba hwelwe ke bana, e bile e be bahlologadi.
Anke banna ba bona ba bolawe ke bolwetši bjo šoro,
Le gona anke masogana a bona a bolawe ka sabola ntweng.
22 Anke sello se kwagale dintlong tša bona
Ge o ba tlišetša batho gore ba tle ba ba hlasele ba sa itebetše.
Ba nkepetše molete gore ke wele ka go wona,
E bile ba mpeetše melaba gore ba ntanye.
23 Eupša wena Jehofa,
O tseba gabotse maano a bona ka moka ao ba ntogetšego wona gore ba mpolaye.
O se ke wa ba lebalela molato wa bona,
E bile o se ke wa phumola sebe seo ba go diretšego sona.
Anke ba wišwe fase pele ga gago
Ge o ba otla ka baka la ge o galefile.