Puku ya Pele ya Dikgoši
4 Kgoši Solomone o ile a buša Isiraele ka moka. 2 Ba e be e le banna ba maemo a godimo mmušong wa gagwe: Asaria morwa wa Tsadoko e be e le moperisita, 3 barwa ba Shisha e lego Elihorefe le Ahija, e be e le bangwaledi, Jehoshafate morwa wa Ahiludi o be a ngwala dilo tšeo di diregago, 4 Benaya morwa wa Jehoyada e be e le molaodi wa mašole, Tsadoko le Abiathara e be e le baperisita, 5 Asaria morwa wa Nathane e be e le yo mogolo wa baetapele, Sabudu morwa wa Nathane e be e le moperisita e bile e le mogwera wa kgoši, 6 Ahishara o be a hlokometše ntlo ya mošate gomme Adonirama morwa wa Abeda a hlokometše bao ba bego ba laetšwe gore ba šomele kgoši.
7 Kgoši Solomone o be a na le baetapele ba 12 bao ba bego ba laola Isiraele ka moka. Baetapele bao ba be ba tlišetša yena le ba lapa la gagwe dijo. Yo mongwe le yo mongwe wa bona o be a swanetše go fetša kgwedi e tee mo ngwageng a tliša dijo. 8 Maina a bona šea: Morwa wa Huru, yo e bego e le molaodi wa tikologo ya dithabeng tša Efuraime, 9 morwa wa Dekere yo e bego e le molaodi wa Makatse, Shaalabima, Bethe-shemeshe le Elone-bethe-hanana, 10 morwa wa Hesede yo e bego e le molaodi wa Arubothe (o be a laola le Soko le naga ka moka ya Hefere), 11 morwa wa Abinadaba yo e bego e le molaodi wa tikologo ya meboto ka moka ya Doro (mosadi wa gagwe e be e le Tafathe morwedi wa Solomone), 12 Baana morwa wa Ahiludi yo e bego e le molaodi wa Thaanake, Megido le Bethe-sheane ka moka, yeo e lego kgauswi ga Tsarethane ka tlase ga Jeseriele, go tloga Bethe-sheane go fihla Abele-mehola le go fihla tikologong ya Jokomeama, 13 morwa wa Gebere yo e bego e le molaodi wa Ramothe-gileada (o be a laola ditente tša Jairi morwa wa Manase, tšeo di lego Gileada, le gona o be a laola tikologo ya Arigobo, yeo e lego Bashani. E be e le metse e 60 e megolo yeo e nago le maboto le dikeiti tšeo di bego di notlelwa ka ditšhipi tša koporo), 14 Ahinadaba morwa wa Ido yo e bego e le molaodi wa Mahanaime, 15 Ahimaatse yo a bego a laola Nafutali (le yena o ile a nyala yo mongwe wa barwedi ba Solomone, e lego Basematha), 16 Baana morwa wa Hushai yo e bego e le molaodi wa Ashere le Bealothe, 17 Jehoshafate morwa wa Parua yo e bego e le molaodi wa Isakara, 18 Shimei morwa wa Ela yo e bego e le molaodi wa Benjamini, 19 Gebere morwa wa Uri yo e bego e le molaodi wa naga ya Gileada, e lego naga ya Sihoni kgoši ya Baamore le ya Ogo kgoši ya Bashani. Le gona go be go na le moetapele o tee yo a bego a okametše baetapele ba ka moka mo nageng.
20 Bajuda le Baisiraele e be e le ba bantšhi go swana le santa ya lewatleng. Ba be ba eja, ba enwa e bile ba thabile.
21 Solomone o ile a buša mebušo ka moka go tloga ka Noka* go fihla ka naga ya Bafilisita le go ya mollwaneng wa Egepeta. Batho ba be ba tlišetša Solomone dimpho gomme ba mo hlankela matšatši ka moka a ge a sa phela.
22 Dijo tšeo di bego di tlišwa mošate wa Solomone letšatši le lengwe le le lengwe e be e le folouru yeo e šitšwego gabotse yeo e imelago dikhilokgerama tše 3 300 (dikete tše tharo le makgolo a mararo)* le folouru ya dikhilokgerama tše 6 600 (dikete tše tshelelago le makgolo a tshelelago),* 23 dikgomo tše lesome tšeo di nontšhitšwego, dikgomo tše 20 tšeo di išwago mafulong le dinku tše 100, go sa balwe dikgama,* le dinonyana tšeo di nontšhitšwego. 24 Ka gobane o be a laola dilo ka moka ka mošono wa Noka,* go tloga ka Thifisa go fihla ka Gatsa, go akaretša le dikgoši ka moka tšeo di lego ka mošono wa Noka, gomme ditikologong tša gagwe ka moka le mellwaneng ya gagwe go be go na le khutšo. 25 Nakong ka moka ya ge Solomone a sa phela, batho ba Juda le ba Isiraele ba ile ba dula ba iketlile, gomme yo mongwe le yo mongwe a dula ka tlase ga moterebe wa gagwe le ka tlase ga mogo wa gagwe, go tloga Dani go fihla Beresheba.
26 Solomone o be a na le mašaka a 4 000 (dikete tše nne)* a dipere tša go goga dikariki tša gagwe tša ntwa, le dipere* tše 12 000 (dikete tše lesomepedi).
27 Baetapele ba ba be ba tlišetša Kgoši Solomone dijo le batho ka moka bao ba bego ba eja tafoleng ya gagwe. Yo mongwe le yo mongwe wa bona o be a swanetše go tliša dijo ka kgwedi ya gagwe, e bile o be a swanetše go kgonthišetša gore ga go se se hlaelago. 28 Nako le nako ge go be go nyakega mabele* le mahlaka ao a jewago ke dipere le dipere tšeo di gogago dikariki tša ntwa, ba be ba a tliša. Yo mongwe le yo mongwe o be a dira go ya kamoo a laetšwego ka gona.
29 Modimo a thuša Solomone gore a be le bohlale le temogo, a ba a mo thuša le gore a kwešiše dilo tšeo e lego tše dintšhi go swana le santa ya lewatleng. 30 Bohlale bja Solomone bo be bo feta kudu bohlale bja batho ka moka ba ka Bohlabela le Baegepeta ka moka. 31 O be a le bohlale go feta motho le ge e le ofe, a le bohlale go feta Ethane wa Moetsera, le barwa ba Mahole e lego Hemane, Kalakolo le Dareda. A tuma ditšhabeng ka moka tšeo di mo dikologilego. 32 O ile a ngwala* diema tše 3 000 (dikete tše tharo) le dikoša tše 1 005 (sekete le metšo e mehlano). 33 O be a fela a bolela ka mehlare, go tloga ka mohlare wa motsedara woo o bego o le Libanoni go fihla ka semela se se bitšwago hisopo seo se melago mabotong. Le gona o be a fela a bolela ka diphoofolo, dinonyana, digagabi, dikhunkhwane le ka dihlapi. 34 Batho bao ba bego ba etšwa ditšhabeng ka moka ba be ba etla go kwa bohlale bja Solomone, go akaretša le dikgoši ka moka tša lefase tšeo di bego di kwele ka bohlale bja gagwe.