Puku ya Bobedi ya Dikoronika
1 Solomone morwa wa Dafida o ile a ba kgoši e matla. Jehofa Modimo wa gagwe o ile a ba le yena gomme a mo dira gore a tume kudu.
2 Solomone o ile a bitša Baisiraele ka moka, a bitša balaodi ba mašole a dikete le balaodi ba mašole a makgolo, baahlodi le baetapele ba malapa ka moka a Baisiraele, e lego dihlogo tša malapa a botatago bona. 3 Ke moka Solomone le phuthego ka moka ba ya lefelong le le phagamego leo go rapelwago go lona kua Gibeoni, ka gobane ke moo tente ya kopano ya Modimo wa nnete e bego e le gona e lego tente yeo Moshe mohlanka wa Jehofa a bego a e dirile lešokeng. 4 Eupša Dafida o be a tšere Areka ya Modimo wa nnete Kiriathe-jearima gomme a e išitše lefelong leo yena Dafida a bego a e lokišeleditše lona. O be a e hlometše tente Jerusalema. 5 Aletare ya koporo yeo e bego e dirilwe ke Betsalele morwa wa Uri morwa wa Huru, e be e beilwe pele ga taberenakele ya Jehofa. Le gona Solomone le phuthego ka moka ba be ba rapela pele ga yona. 6 Ke moka Solomone a neela dibego gona moo pele ga Jehofa, a ba a neela dibego tša go fišwa tše 1 000 (sekete) aletareng ya koporo yeo e lego tenteng ya kopano.
7 Bošegong bjoo Modimo o ile a iponagatša go Solomone gomme a re go yena: “Nkgopele seo o nyakago ke go fa sona.” 8 Ke moka Solomone a re go Modimo: “O bontšhitše Dafida tate lerato la gago le legolo* gomme wa ntira gore ke be kgoši legatong la gagwe. 9 Bjale hle wena Jehofa Modimo, dira gore seo o se tshepišitšego Dafida tate se phethagale, ka gobane o mpeile gore ke be kgoši ya setšhaba seo e lego se sentšhi go swana le lerole la lefase. 10 Bjale mphe bohlale le tsebo gore ke kgone go etelela setšhaba se pele ka gobane ga go na motho yo a ka kgonago go ahlola setšhaba se sa gago se segolo.”
11 Ke moka Modimo a re go Solomone: “Ka ge pelo ya gago e kganyoga dilo tše ebile o se wa nkgopela matlotlo, mahumo le go nyaka go hlomphiwa goba gore batho bao ba go hloilego ba hwe ebile o se wa ka wa ikgopelela gore o phele nako e telele eupša o ikgopeletše gore o hwetše bohlale le tsebo e le gore o kgone go ahlola setšhaba sa ka seo ke go beilego gore o be kgoši ya sona, 12 gona ke tla go fa bohlale le tsebo ebile ke tla go fa le matlotlo, mahumo, ka ba ka dira gore o hlomphiwe go feta kgoši le ge le e efe yeo e kilego ya ba gona pele ga gago le yeo e tlago go ba gona ka morago ga gago.”
13 Ka gona Solomone a tla Jerusalema a etšwa lefelong le le phagamego leo le lego kua Gibeoni, pele ga tente yeo go kopanwago go yona, ke moka a buša Isiraele a le moo. 14 Solomone a dulela go ikgobokeletša dikariki tša ntwa le dipere. O be a na le dikariki tša ntwa tše 1 400 (sekete le makgolo a mane) le dipere tše 12 000 (dikete tše lesomepedi), ke moka a di bea metseng yeo go bewago dikariki tša ntwa le kgauswi le kgoši kua Jerusalema. 15 Ke moka kgoši ya dira gore silifera le gauta tšeo di le go Jerusalema e be tše dintšhi go swana le maswika, ya ba ya dira gore dikota tša motsedara e be tše dintšhi go swana le mehlare ya mesikamore yeo e lego Shefela. 16 Dipere tšeo Solomone a bego a na le tšona di be di etšwa di le Egepeta. Le gona batho bao ba bego ba rekela kgoši dilo, ge ba reka dipere,* ba be ba di reka e le tše dintšhi ka nako e tee. 17 Kariki e tee ya ntwa yeo e bego e etšwa Egepeta e be e rekwa ka dikhilokgerama* tše šupa tša silifera gomme pere e tee e rekwa ka dikhilokgerama* tše pedi tša silifera. Ka morago ga gore ba di reke, ba be ba rekišetša dikgoši ka moka tša Bahethe le tša Basiria.