Jeremia
22 Jehofa o re: “Eya ka mošate wa kgoši ya Juda gomme o bolele molaetša wo. 2 O re: ‘Ekwa molaetša wa Jehofa, wena kgoši ya Juda yo a dutšego setulong sa bogoši sa Dafida, wena le bahlanka ba gago le batho ba gago bao ba tsenago ka dikeiti tše. 3 Se ke seo Jehofa a se bolelelago: “Ahlolang ka toka le ka go loka. Thušang motho yo ditsotsi di mo tšeetšego dilo tša gagwe. Le se ke la swara gampe motho yo e sego Moisiraele, e bile le se ke la tlaiša tšhiwana goba mohlologadi. Le gona le se ke la tšholla madi a batho bao ba se nago molato lefelong le. 4 Ge le ka phetha dilo tše, gona dikgoši tšeo di dutšego setulong sa bogoši sa Dafida di tla tsena dikeiting tša mošate wo di nametše dikariki le dipere, tšona le bahlanka ba tšona gotee le setšhaba sa tšona.”’
5 Jehofa o re: “‘Eupša ge e ba le ka se kwe dilo tše, ke ikana ka leina la ka gore mošate wo o tla fetoga marope.’
6 “Jehofa o boletše mabapi le mošate wa kgoši ya Juda gore:
‘Go nna o no swana le sethokgwa sa Gileada,
O swana le sethokgwa seo se lego ntlheng ya thaba ya Libanoni.
Eupša ke tla go dira lešoka,
Ga go na motho yo a tlago go dula motseng le ge e le ofe go metse ya gago.
7 Ke tla romela batho bao ba tlago go go senya,
Yo mongwe le yo mongwe o tla tla a swere dibetša tša gagwe.
Ba tla rema mehlare ya gago ya metsedara yeo e phalago e mengwe ka moka,
Gomme ba e lahlela mollong.
8 E tla re ditšhaba tše dintšhi ge di feta kgauswi le motse woo tša botšišana tša re: “Ke ka baka la’ng Jehofa a dirile selo sa mohuta wo motseng wo o mogolo?” 9 Ke moka tšona di tla arabana tša re: “Ke ka gobane batho ba motse wo ba lahlile kgwerano yeo ba e dirilego le Jehofa Modimo wa bona, gomme ba rapela medimo e mengwe le go e hlankela.”’
10 “Le se ke la llela yo a hwilego,
E bile le se ke la mo kwela bohloko.
Go e na le moo, llelang yo a yago bothopša,
Ka gobane a ka se sa boa gore a tlo bona naga yeo a belegetšwego go yona.
11 Jehofa o bolela mabapi le Shalume morwa wa Josia, yena kgoši ya Juda, yo a bušago go e na le gore go buše Josia tatagwe, e lego yo a tlogilego lefelong le, o re: ‘A ka se sa boela moo. 12 Ka gobane o tla hwela lefelong leo ba mo išitšego bothopša go lona, gomme a ka se sa bona naga ye gape.’
13 “Go madimabe yo a agago ntlo ya gagwe ka go se tshepege,
Le yo a agago diphapoši tša gagwe tša ka godimo ka go hloka toka,
Yo a dirago gore batho ba mmerekele mahala,
E bile a gana go ba patela.
14 Yo a rego: ‘Ke tla ikagela ntlo ya kgoparara
Yeo e nago le diphapoši tša ka godimo tše kgolo.
Ke tla e tsenya mafasetere,
Ka e tsenya mapolanka a mohlare wa motsedara gomme ka e penta ka pente e khwibidu.’
15 Na o nagana gore o tla tšwela pele o buša ka gobane o agile mošate wa gago ka dikota tše dintšhi tša motsedara go feta batho ba bangwe?
Tatago le yena o be a eja a enwa,
Eupša a ahlola ka toka le ka go loka.
Ka baka leo dilo di ile tša mo sepelela gabotse.
16 O be a emelela mohlaki le modiidi tshekong,
E le gore dilo ka moka di sepele gabotse.
‘Na go dira bjalo ga se gona go ntseba?’ O realo Jehofa.
17 ‘O dula o nyaka ditsela tša go radia ba bangwe e bile pelo ya gago e nyaka dilo tša go ikhola,
Le go tšholla madi a batho bao ba se nago molato,
Gotee le go radia batho le go ba hlalefetša.’
18 “Ka gona Jehofa o boletše mabapi le Jehoyakima morwa wa Josia, yena kgoši ya Juda, a re:
‘Ba ka se mo llele ba re:
“Joo nna, ngwanešo! Joo nna, sesiaka!”
Ba ka se mo llele ba re:
“Joo nna, mong wa rena! Joo nna, kgoši ya rena!”
19 O tla bolokwa bjalo ka ge eka go bolokwa tonki,
A gogwa le go lahlelwa
Ka ntle ga dikeiti tša Jerusalema.’
20 Rotogela Libanoni o goeletše,
Goeletša o le Bashani,
O goeletše o le Abarimi,
Ka gobane batho ka moka bao o ratanago le bona ba fentšwe.
21 Ke boletše le wena nakong ya ge o be o ikwa o šireletšegile.
Eupša wena wa re: ‘Nka se kwe.’
O be o dutše o phela ka yona tsela yeo go tloga o sa le yo moswa,
Ka gobane ga se wa kwa seo ke se bolelago.
22 Phefo e tla tšea badiši ba gago ka moka,
Gomme batho bao o ratanago le bona ba tla išwa bothopša.
Ge e le wena o tla hlabišwa dihlong le go tlontlollwa ka baka la masetlapelo ka moka ao a tlago go go wela.
23 Wena yo a dulago Libanoni,
Wena yo a agilego gare ga mehlare ya metsedara,
Ruri o tla fegelwa kudu ge o tlelwa ke
Dihlabi tša go swana le tša mosadi yo a belegago!”
24 Jehofa o re: “‘Ke ikana ka nna Modimo yo a phelago ke re, gaešita le ge wena Konia morwa wa Jehoyakima, kgoši ya Juda, nkabe o le palamonwana ya ka e bohlokwa seatleng sa ka sa le letona, ke be ke tla go rola! 25 Ke tla go neela go bao ba nyakago go go bolaya, le go bao o ba tšhabago, le go Kgoši Nebukadinetsara wa Babilona gotee le go Bakaladea. 26 Ke tla go lahlela nageng e nngwe yeo o sego wa belegelwa go yona, wena gotee le mmago yo a go belegego gomme le tla hwela moo. 27 Le ka se sa boela nageng yeo le dumago go boela go yona.
28 Na Konia ga a fo swana le pitša yeo e pšhatlaganego le yeo e nyatšegago,
Sona sebjana seo go se nago motho yo a se nyakago?
Goreng yena le ditlogolwana tša gagwe ba lahletšwe fase,
Gomme ba lahlelwa nageng yeo ba sa e tsebego?’
29 Lena batho bao ba dulago lefaseng,* ekwang seo Jehofa a se bolelago.
30 Jehofa o re:
‘Ngwalang gore monna yo ga a na bana,
Le gore dilo di ka se mo sepelele gabotse bophelong bja gagwe ka moka,
Ka gobane mo go ditlogolo tša gagwe ga go le o tee yo a tlago go
Dula setulong sa Dafida sa bogoši, gomme a buša Juda gape.’”