Jeremia

35 Jehofa o ile a bolela le Jeremia mehleng ya Jehoyakima morwa wa Josia, kgoši ya Juda, a re: 2 “Eya o yo bona lapa la Barekaba, o bolele le bona gomme o ba tliše ntlong ya Jehofa, go e nngwe ya diphapoši tša go jela, ke moka o ba nee beine gore ba nwe.”

3 Ka gona ka tšea Jaasania morwa wa Jeremia yoo e lego morwa wa Habatsinia le banababo le barwa ba gagwe ka moka, ka tšea le batho ka moka ba lapa la Barekaba, 4 ka ba tliša ntlong ya Jehofa. Ka ba tsenya ka phapošing ya go jela ya barwa ba Hanana morwa wa Igidalia, e lego monna wa Modimo wa nnete. Phapoši yeo ya go jela e be e le kgauswi le phapoši ya go jela ya dintona yeo e bego e le ka godimo ga phapoši ya go jela ya Maaseya morwa wa Shalume yo a bego a leta mejako. 5 Ke moka ka bea dikomiki le dibjana tšeo di tletšego beine pele ga banna ba lapa la Barekaba gomme ka re go bona: “Enwang beine.”

6 Eupša bona ba re: “Re ka se nwe beine ka gobane Jehonadaba morwa wa Rekaba, rakgolokhukhu wa rena, o re laetše a re: ‘Lena le barwa ba lena le se ke la tsoga le nwele beine. 7 Le se ke la aga dintlo, la bjala peu, goba la bjala mašemo a diterebe goba go ba le ona. Go e na le moo, le dule ka ditenteng ka mehla e le gore le tle le phele nako e telele nageng yeo e sego ya gabo lena yeo le dulago go yona.’ 8 Ka gona rena, basadi ba rena, barwa le barwedi ba rena, re dula re ekwa dilo ka moka tšeo Jehonadaba morwa wa Rekaba rakgolokhukhu wa rena a re laetšego tšona ka gore re se ke ra tsoga re nwele beine le ge e le efe. 9 E bile ga re age dintlo gore re dule go tšona, ga re na mašemo a diterebe, mašemo goba peu. 10 Re tšwela pele re dula ditenteng le go kwa dilo ka moka tšeo Jehonadaba rakgolokhukhu wa rena a re laetšego tšona. 11 Eupša ge Kgoši Nebukadinetsara wa Babilona a be a elwa le naga ye re ile ra re: ‘Etlang re tseneng Jerusalema gore re tšhabele mašole a Bakaladea le a Basiria gomme gona bjale re dula Jerusalema.’”

12 Jehofa a bolela le Jeremia a re: 13 “Jehofa wa madira, yena Modimo wa Isiraele, o re: ‘Sepela o yo botša batho ba Juda le batho bao ba dulago Jerusalema o re: “Na ga se ka dula ke le kgothaletša gore le kwe dilo tšeo ke di bolelago?” O realo Jehofa. 14 “Jehonadaba morwa wa Rekaba o laetše ditlogolwana tša gagwe gore di se ke tša nwa beine, gomme tšona di ile tša kwa dilo ka moka tšeo a di boletšego ka gore di se ke tša nwa beine go fihla le lehono le. Ka go dira bjalo, di ile tša kwa taelo ya rakgolokhukhu wa tšona. Ge e le nna ke boletše le lena gantšhi le gantšhi, eupša ga se la nkwa. 15  Le gona, ke ile ka dula ke romela bahlanka ba ka ka moka ba baporofeta go lena, ke ba romela gantšhi le gantšhi ke re: ‘Sokologang hle, yo mongwe le yo mongwe wa lena a tlogele go dira dilo tše mpe, gomme le dire se se lokilego. Le se ke la hlankela medimo e mengwe le go e rapela. Ge le dira bjalo, le tla dula nageng yeo ke e filego lena le borakgolokhukhu ba lena.’ Eupša ga se la ka la hlwaya tsebe gore le nkwe. 16 Ditlogolwana tša Jehonadaba morwa wa Rekaba di dirile seo rakgolokhukhu wa tšona a di laetšego sona, eupša ge e le batho ba, ga se ba ntheetša.”’”

17 “Ka gona Jehofa Modimo wa madira, yena Modimo wa Isiraele, o re: ‘Bjale ke tlišetša Juda le badudi ka moka ba Jerusalema masetlapelo ka moka ao ke boletšego gore ke tla ba tlišetša ona, ka gobane ke boletše le bona eupša ba se ntheetše, le gona ka dula ke ba bitša, eupša ba se nkarabe.’”

18 Jeremia a bolela le ba lapa la Rekaba, a re: “Jehofa Modimo wa madira, yena Modimo wa Isiraele, o re: ‘Ka ge le kwele taelo ya Jehonadaba rakgolokhukhu wa lena, gomme la tšwela pele le dira dilo ka moka go ya le ka mokgwa wo a le laetšego ka gona, 19 gona se ke seo Jehofa wa madira, Modimo wa Isiraele, a se bolelago: “Mo go ditlogolwana tša Jehonadaba morwa wa Rekaba, go tla dula go na le yo a tlago go hlankela pele ga ka.”’”