Jeremia
50 Jehofa o ile a bolela le moporofeta Jeremia mabapi le Babilona le mabapi le naga ya Bakaladea a re:
2 “Botšang ditšhaba taba ye le be le di tsebiše yona.
Emišang leswao gomme le tsebišeng taba ye.
Le se ke la uta selo.
Le bolele le re: ‘Babilona e thopilwe.
Modimo yo a bitšwago Bele o hlabilwe ke dihlong.
Modimo yo a bitšwago Merodake o tšhogile.
Diswantšho tša gagwe di hlabilwe ke dihlong.
Medingwana ya gagwe yeo e šišimišago e tšhogile.’
3 Ka gobane go na le setšhaba seo se hlasetšego Babilona seo se tšwago ka leboa.
Se dira gore naga ya Babilona e tšhoše batho.
Ga go na motho yo a dulago moo.
Batho le diphoofolo ba tšhabile.
Ga go sa na selo.”
4 Jehofa o re: “Mehleng yeo le nakong yeo, batho ba Isiraele le batho ba Juda ba tla kopana. Ba tla lla ba le gare ba sepela, gomme ba tla tsoma Jehofa Modimo wa bona ba le gotee. 5 Ba tla botšiša tsela yeo e yago Tsione, gomme ba leba thokong yona yeo, ba re: ‘Etlang re beng batho ba Jehofa gape kgweranong ya sa ruri yeo e ka se kego ya lebalwa.’ 6 Batho ba ka ba fetogile mohlape wa dinku tšeo di timetšego. Badiši ba bona ba ba dirile gore ba hlahlathe. Ba ba išitše dithabeng, ba tšama ba thetha le dithaba le meboto. Ba lebetše lefelo leo ba khutšago go lona. 7 Bohle bao ba bego ba kopana le bona ba be ba ba bolaya, gomme manaba a bona a itše: ‘Ga re na molato ka gobane batho ba ba senyeditše Jehofa, ba senyetša yena yoo go loka go tšwago go yena le yoo borakgolokhukhu ba bona ba bego ba mo tshepile, yena Jehofa.’”
8 “Tšhabang Babilona,
Le tšweng nageng ya Bakaladea,
Gomme le swane le diphoofolo tšeo di etago mohlape pele.
9 Bjale ke tlišetša Babilona sehlopha
Sa ditšhaba tše dikgolo tšeo di tšwago nageng ya ka leboa.
Di tla tla tša e hlasela di rulagantšwe gabotse
Go swana le dihlopha tša mašole,
Gomme ka morago ga moo e tla thopša.
Mesebe ya tšona e swana le ya lešole leo le bolayago bana,
Ge e betšwa, ga e boe e le feela.
10 Kaladea e tla thopša.
Batho ka moka bao ba tšeago dilo tše di thopilwego go yona ba tla kgotsofala,” o realo Jehofa.
11 “Ka gobane le ile la thaba le go thakgala
Ge le be le thopa bohwa bja ka.
Le ile la dulela go tabogataboga go swana le kgomo e botsebotse,
Gomme la lla go swana le dipere tše tona.
12 Mmago lena o hlabilwe ke dihlong.
Yena yo a le belegego o swabile.
Tsebang gore ke yo a nyatšegago kudu ditšhabeng,
Ke lešoka leo le se nago meetse le leganata.
13 Ga go na motho yo a tlago go dula Babilona ka baka la ge Jehofa a galefile,
E tla fetoga lešope.
Motho yo mongwe le yo mongwe yo a fetago Babilona o tla e tomolela mahlo a tšhogile,
Gomme a letša molodi a kgotsa ka baka la dikotlo tša yona ka moka.
14 Lena ka moka bao le ngangago bora,
Hlaselang Babilona ka mathokong ka moka a yona le rulagantšwe gabotse go swana le dihlopha tša mašole.
Betšang mesebe, le se ke le o tee,
Ka gobane e senyeditše Jehofa.
15 E hlabeleng mokgoši wa ntwa ka mahlakoreng ka moka, gomme le e hlasele.
Yona e ineetše.
Diphilara tša yona di wele, maboto a yona a phušotšwe
Ka gobane Jehofa o a itefeletša.
Itefeletšeng go yona.
E direng ka wona mokgwa wo e le dirilego ka wona.
16 Fedišang yo a bjalago mo Babilona,
Le fedišeng le yo a swarago sekela nakong ya ge go bunwa.
Yo mongwe le yo mongwe o tla boela bathong ba gabo ka baka la sabola e bogale.
Yo mongwe le yo mongwe o tla tšhabela nageng ya gabo.
17 “Baisiraele ba swana le dinku tšeo di gašanego, tšeo di phatlaladitšwego ke ditau. Kgoši ya Asiria e ile ya ba bolaya, ke moka ka morago Kgoši Nebukadinetsara wa Babilona a kokona marapo a bona. 18 Jehofa wa madira, yena Modimo wa Isiraele, o re: ‘Bjale ke tla otla kgoši ya Babilona le naga ya yona ka tsela yeo ke otlilego kgoši ya Asiria. 19 Ke tla bušetša Isiraele mafulong a yona, gomme e tla fula kua Karamele le Bashani, e bile e tla fula ya khora thabeng ya Efuraime le ya Gileada.’”
20 Jehofa o re: “Mehleng yeo le nakong yeo,
Batho ba tla nyaka molato wa Isiraele,
Eupša ba ka se o hwetše.
Le gona ba ka se hwetše dibe tša Juda,
Ka gobane ke tla lebalela bao ke tlago go ba tlogela ba phela.”
21 “Eya o hlasele naga ya Merathaime le badudi ba Pekoda.
Batho bao a ba bolawe gomme ba fedišetšwe sa ruri.
Dira dilo ka moka tšeo ke go laetšego tšona,” o realo Jehofa.
22 “Go kwala mokgoši wa ntwa nageng,
Yona tshenyo e kgolo.
23 Ruri hamola ya lefase ka moka e robilwe gomme ya thokgega!
Ruri Babilona e fetogile selo seo se tšhošago gare ga ditšhaba!
24 Wena Babilona, ke go beetše molaba gomme o tantšwe,
Eupša o be o sa tsebe.
O hweditšwe, wa ba wa swarwa,
Ka gobane wena o be o elwa le Jehofa.
25 Jehofa o butše ntlo ya gagwe yeo a beago dibetša go yona,
Gomme a ntšha dibetša tšeo a di dirišago ge a galefile.
Ka gobane Mmuši Morena, Jehofa wa madira o na le mošomo
Wo a tlago go o dira nageng ya Bakaladea.
26 E hlaseleng le etšwa mafelong a kgole.
Bulang mafelo a yona a go bolokela mabele.
Kgobelang dilo tša yona tšeo di thopilwego go swana le mekgobo ya mabele.
E fedišeng ka mo go feletšego,
Go šale go se na motho go yona.
27 Bolayang dipowana tša yona ka moka,
Di tlogeleng di yo hlabiwa.
Ruri di madimabe ka gobane letšatši la tšona le fihlile,
E lego nako ya gore di ahlolwe!
28 Go na le lešata la bao ba tšhabago,
Bao ba phonyokgilego nageng ya Babilona,
E le gore ba bolele kua Tsione gore Jehofa Modimo wa rena o a itefeletša,
O lefeletša tempele ya gagwe.
29 “Bitšang babetši ba mesebe,
E lego bohle bao ba ngangago bora, gore ba hlasele Babilona.
Hlomang ditente go e dikologa, gomme go se be le motho yo a phonyokgago.
E lefetšeng go ya ka seo e se dirilego.
E direng ka wona mokgwa wo e le dirilego ka wona.
Ka gobane e iphagamišeditše Jehofa,
Ya iphagamišetša Modimo yo Mokgethwa wa Isiraele.
30 Ka gona masogana a yona a tla šala a rapaletše mebarakeng ya motse woo,
Gomme mašole a yona ka moka a tla bolawa letšatšing leo,” o realo Jehofa.
31 Mmuši Morena, yena Jehofa wa madira o re: “Tseba gore ke lwa le wena, wena yo a ikgodišago.
Letšatši la gago le tla tla, e lego nako yeo ke tlago go go ahlola.
32 Wena yo a ikgodišago, o tla kgopša wa wa,
Gomme go ka se be le yo a go emišago.
Ke tla fiša metse ya gago ka mollo,
Gomme mollo woo o tla tšhuma dilo ka moka tšeo di go dikologilego.”
33 Jehofa wa madira o re:
“Batho ba Isiraele le ba Juda ba gateletšwe,
Batho ka moka bao ba ba išago bothopša ba ba swere.
Ba ganne go ba lokolla.
34 Eupša yo a tlago go ba rekolla o na le matla.
Leina la gagwe ke Jehofa wa madira.
Ruri o tla ahlola batho ba gagwe ka toka,
E le gore a dire gore mo nageng go be le khutšo,
Le go dira gore badudi ba Babilona ba ferekane.”
35 Jehofa o re: “Sabola e tla bolaya Bakaladea,
Badudi ba Babilona le dikgošana tša yona gotee le batho ba bohlale ba Babilona.
36 “Sabola e tla bolaya batho bao ba bolelago dilo tšeo di se nago mohola, gomme ba tla dira dilo tša bošilo.
Le gona sabola e tla hlasela mašole a Babilona, gomme a tla tšhoga.
37 Sabola e hlasela dipere tša bona le dikariki tša bona tša ntwa,
E hlasela batho ka moka bao ba tšwago ditšhabeng tše dingwe bao ba dulago le bona,
Gomme ba tla swana le basadi bao ba tšhogilego.
Sabola e hlasela dilo tša Babilona tše bohlokwa gomme di tla tšewa.
38 Go madimabe meetse a Babilona, ka ge a tla gopa.
Ka gobane ke naga ya diswantšho tše di betlilwego,
Gomme batho ba dulela go dira dilo tša bogaswi ka baka la dipono tša bona tše di tšhošago.
39 Ka gona diphoofolo tša leganateng di tla dula le dimpša tša naga,
Gomme dimpšhe di tla dula go yona.
Go ka se be le motho yo a dulago go yona gape,
E bile go ka se be le motho yo a dulago go yona melokong ka moka.”
40 Jehofa o re: “Go no swana le ge ke ile ka fediša Sodoma le Gomora le metsana yeo e agišanego le yona, ga go na motho yo a tlago go dula Babilona, e bile ga go na motho yo a tlago go phela moo.
41 Setšhaba se tšwa ka leboa,
Setšhaba se segolo le dikgoši tše dikgolo di tla tla tša itokišeletša go hlasela
Di etšwa dikarolong tša kgole kudu tša lefase.
42 Di swere bora le lerumo.
Di sehlogo e bile ga di na kwelobohloko.
Ge di sepela ka dipere tša tšona,
Modumo wa tšona o swana le wa lewatle leo le huduegilego.
Wena morwedi wa Babilona, di go hlasela di ipopile ngatana e tee di rulagantšwe gabotse go swana le dihlopha tša mašole.
43 Go na le seo kgoši ya Babilona e se kwelego ka tšona,
Gomme e nolegile moko.
E tlaletšwe,
Gomme e kwa bohloko go swana le mosadi yo a belegago.
44 “Tseba gore motho yo mongwe o tla tla bjalo ka tau yeo e tšwago sethokgweng seo se bofaganego seo se lego kgauswi le Noka ya Jorodane, gomme a hlasela mafelo ao a šireleditšwego a Babilona ao diphoofolo di fulago go ona. Eupša ke tla mo raka kapelapela mo nageng, e bile ke tla mo kgethela moetapele. Gobane ke mang yo a swanago le nna, e bile ke mang yo a ka lwago le nna? Le gona ke modiši ofe yo a ka thibelago seo ke nyakago go se dira? 45 Ka gona lena batho, ekwang seo Jehofa a phethilego go se dira mabapi le Babilona le seo a nagannego go se dira naga ya Bakaladea.
Ruri diphoofolo tše dinyenyane mohlapeng di tla gogoišwa.
Lefelo la tšona le tla fetoga lešope ka baka la dilo tšeo ba di dirilego.
46 Lefase le tla šikinyega ge go kwala modumo wa ge Babilona e tšeelwa dilo,
Gomme go tla kwala mekgoši gare ga ditšhaba.”