Puku ya Bobedi ya Samuele

15 Ka morago ga dilo tšeo Abesalomo a itirela kariki ya ntwa, a ba le dipere le banna ba 50 bao ba bego ba kitima pele ga gagwe. 2 Abesalomo o be a tsoga e sa le mesong gomme a ema ka thoko ga tsela yeo e yago keiting ya motse. Ge motho a be a na le molato woo o bego o swanetše go ahlolwa ke kgoši, Abesalomo o be a mmitša gomme a re: “O tšwa motseng ofe?” Motho yoo o be a araba a re: “Nna mohlanka wa gago ke tšwa go o mongwe wa meloko ya Isiraele.” 3 Ke moka Abesalomo o be a re go yena: “Seo o se bolelago se a kwagala ebile ke nnete, eupša ga go na motho yo a tšwago go kgoši yo a tlago go theetša molato wa gago.” 4 Abesalomo o be a re: “Okare nkabe ke kgethilwe gore ke be moahlodi mo motseng, yo mongwe le yo mongwe yo a nago le molato, goba yo a swanetšwego ke go ahlolwa, o be a tla tla go nna! Gomme nna ke be ke tla kgonthišetša gore o swarwa ka toka.”

5 Ge motho a mmatamela e le gore a mo khunamele, Abesalomo o be a otlolla letsogo la gagwe a mo swara gomme a mo khisa. 6 Abesalomo o be a dira bjalo go Baisiraele ka moka bao ba bego ba etla go kgoši gore e ba ahlolele melato ya bona. Ka gona Abesalomo a dulela go dira gore Baisiraele ba mo rate.*

7 Ka morago ga mengwaga e mene,* Abesalomo a re go kgoši: “Hle ntumelele gore ke ye Heburone ke yo phetha keno yeo ke e diretšego Jehofa. 8 Ka gobane nna mohlanka wa gago ke dirile keno ge ke be ke dula Geshuri kua Siria, ka re: ‘Ge Jehofa a ka mpušetša Jerusalema, gona ke tla direla Jehofa sehlabelo.’”* 9 Ka gona kgoši ya re go yena: “Sepela ka khutšo.” Ke moka yena a ya Heburone.

10 Abesalomo a roma batho ka sephiring gore ba ye go meloko ka moka ya Isiraele ba re: “Gateetee ge le ekwa modumo wa lenaka, le re: ‘Abesalomo ke kgoši kua Heburone!’” 11 Abesalomo o be a sepetše le banna ba 200 bao ba tšwago Jerusalema, ba be ba biditšwe gomme ba sa tsebe selo ebile ba sa lemoge seo se diregago. 12 Le gona, ge Abesalomo a be a dira dihlabelo o ile a bitša Ahithofele moeletši wa Dafida yo a bego a etšwa motseng wa gabo wa Gilo. Maanomabe ao Abesalomo a bego a a logela kgoši a ile a ba matla gomme le batho bao ba bego ba mo thekga ba be ba oketšega.

13 Ge nako e dutše e eya, motho* yo mongwe o ile a tla go Dafida, a re: “Batho ba Isiraele ba thoma go thekga Abesalomo.” 14 Gateetee Dafida a re go bahlanka ba gagwe ka moka bao a bego a na le bona kua Jerusalema: “A re tšhabeng, ka gobane ga go na yo a ka phonyokgago Abesalomo! Phakišang ka gobane ke tšhoga gore a ka re fenya gomme a re fediša, a bolaya batho ka moka ba motseng ka sabola!” 15 Bahlanka ba kgoši ba re go kgoši: “Rena bahlanka ba gago re tla dira tšohle tšeo kgoši a di bolelago.” 16 Ke moka kgoši ya tloga le ba lapa la yona ka moka bao ba bego ba na le yona, eupša ya tlogela basadi ba lesome ba direthe gore ba hlokomele ntlo ya ka mošate. 17 Kgoši ya tšwela pele e sepela le batho bao ba bego ba na le yona gomme ba fihla ba ema Bethe-merehaka.

18 Bahlanka ba yona ka moka bao ba bego ba sepela le yona, le Bakereta ka moka, Bapelethe le Bagathe ba 600 bao ba bego ba e šetše morago go tloga Gathe, ba be ba feta pele ga kgoši gore e bone ge e ba go na le yoo a sego gona. 19 Kgoši ya re go Itai wa Mogathe: “Ke ka baka la eng le wena o sepela le rena? Boela morago o yo dula le kgoši e mpsha, ka gobane o tšwa nageng e nngwe ebile o tšhabile nageng ya geno. 20 O sa tšwa go fihla maabane, bjale lehono o nyaka gore ke go dumelele gore o sepele le rena kae le kae moo re yago gona? Tšea bana beno o boele le bona morago, le gona, anke Jehofa a go bontšhe botho* a be a go bontšhe gore o a tshepega!” 21 Eupša Itai a re go kgoši: “Ke ikana ka Jehofa yo a phelago le ka kgoši mong wa ka yo a phelago gore kae le kae moo kgoši mong wa ka a tlago go ba gona, le nna mohlanka wa gago ke tla ba gona ebile ke ikemišeditše go hwa le wena!” 22 Ke moka Dafida a re go Itai: “Feta o tshele moedi.” Ka gona Itai wa Mogathe a tshela moedi, yena le banna ka moka bao a bego a na le bona le malapa a bona.

23 Batho ka moka ba nageng ba be ba lla ge batho bao ba bego ba na le kgoši ba tshela moedi gomme kgoši e be e eme Moeding wa Kidirone. Batho ka moka bao ba bego ba sepela le Dafida ba be ba tshelela tseleng yeo e lebilego lešokeng. 24 Tsadoko le yena o be a le moo a na le Balefi ka moka bao ba bego ba rwele areka ya kgwerano ya Modimo wa nnete. Ba ile ba bea Areka ya Modimo wa nnete fase, Abiathara le yena o be a le gona ge batho ka moka ba be ba tloga motseng gomme ba tshela moedi. 25 Eupša kgoši ya re go Tsadoko: “Bušetša Areka ya Modimo wa nnete motseng. Ge e ba ke kgahliša Jehofa, gona yena o tla mpuša gomme a dira gore ke bone areka le mo e dulago gona. 26 Eupša ge a ka re: ‘Ga o nkgahle,’ gona anke a ntire seo a bonago se lokile.” 27 Kgoši ya re go moperisita Tsadoko: “A ke re o kgona go bona dipono? Boela motseng ka khutšo gomme o sepele le Ahimaatse morwa wa gago le Jonathane morwa wa Abiathara. 28 Tsebang gore ke tla dula ke letile moo go tshelwago gona noka ya Jorodane go fihlela le tlo mpotša se sengwe.” 29 Ka gona Tsadoko le Abiathara ba bušetša Areka ya Modimo wa nnete Jerusalema gomme ba dula moo.

30 Ge Dafida a rotogela Thabeng ya Mehlware, o be a tšama a lla, a ikhurumeditše hlogo ebile a sa apara dieta. Batho ka moka bao ba bego ba na le yena le bona ba ile ba ikhurumetša dihlogo gomme ba tšama ba lla ge ba rotoga. 31 Dafida a botšwa gore: “Ahithofele o gare ga bao ba logago maano a mabe le Abesalomo.” Ke moka Dafida a re: “Hle Jehofa dira gore keletšo ya Ahithofele e be ya bošilo!”

32 Ge Dafida a fihla moo batho ba bego ba tlwaetše go khunama gore ba rapele Modimo gona, o ile a gahlanetšwa ke Hushai wa Moarakhi yoo seaparo sa gagwe se bego se kgeigile ebile hlogo ya gagwe e na le ditšhila. 33 Eupša Dafida a re go yena: “Ge o ka tshelela le nna ka mošola, o ka se nkhole ka selo. 34 Eupša ge o ka boela motseng gomme wa re go Abesalomo: ‘Wena kgoši, ke nna mohlanka wa gago. Ke be ke le mohlanka wa tatago nakong e fetilego, eupša gona bjale ke nna mohlanka wa gago,’ ka go realo o tla ba o thuša nna gomme o dira gore leano la Ahithofele le se atlege. 35 O tla ba o na le moperisita Tsadoko le moperisita Abiathara, ka gona dilo ka moka tšeo o di kwago ntlong ya kgoši o swanetše go di botša moperisita Tsadoko le moperisita Abiathara. 36 Tseba gore ba na le barwa ba bona ba babedi, e lego Ahimaatse morwa wa Tsadoko le Jonathane morwa wa Abiathara. Dilo ka moka tšeo o di kwago o ba rome gore ba tle ba mpotše tšona.” 37 Ka gona Hushai mogwera wa Dafida a ya motseng wa Jerusalema ge Abesalomo a be a tsena motseng woo.