Puku ya Bobedi ya Samuele

18 Ka morago Dafida a bala banna bao a bego a na le bona gomme a ba beela balaodi ba dihlopha tša ba dikete le balaodi ba dihlopha tša ba makgolo. 2 Ke moka Dafida a romela banna bao ka dihlopha tše tharo. Sehlopha sa pele se be se eteletšwe pele ke Joaba, sa bobedi se eteletšwe pele ke ngwanabo Joaba e lego Abishai morwa wa Tseruya gomme sa boraro se eteletšwe pele ke Itai wa Mogathe. Ka morago kgoši ya re go bona: “Le nna ke tla ya le lena.” 3 Eupša bona ba re go yena: “O se ke wa sepela le rena, ka gobane ge re tšhaba, manaba a ka se be le taba le rena ka gobane a nyaka wena. Le ge manaba a ka bolaya seripa sa batho bao o nago le bona a ka se kwe bohloko, ka gobane wena o bohlokwa go feta batho ba 10 000 bao re nago le bona. Ka gona, go ka ba kaone gore o re thuše o le motseng.” 4 Kgoši ya re go bona: “Ke tla dira seo le bonago se lokile.” Ke moka ya ema kgauswi le keiti ya motse gomme banna ka moka ba tšwa ka dihlopha tša ba makgolo le tša ba dikete. 5 Ke moka kgoši ya laela Joaba, Abishai le Itai ya re: “Le se gobatše Abesalomo ka gobane ke morwa wa ka yo ke mo ratago.” Banna ka moka ba ile ba kwa ge kgoši e laela balaodi ka moka gore ba sware Abesalomo bjang.

6 Banna bao ba leba lešokeng go yo lwa le Baisiraele bao ba bego ba thekga Abesalomo, gomme ba lwela sethokgweng sa Efuraime. 7 Bahlanka ba Dafida ba fenya Baisiraele bao ba bego ba thekga Abesalomo. Letšatšing leo gwa bolawa batho ba bantši. Go ile gwa bolawa banna ba 20 000. 8 Nageng ka moka gwa ba le ntwa. Le gona batho ba bantšhi ba ile ba bolawa sethokgweng go feta bao ba ilego ba bolawa ka sabola letšatšing leo.

9 Mafelelong Abesalomo a ikhwetša a wetše diatleng tša bahlanka ba Dafida. Abesalomo o be a nametše meila,* gomme meila yeo ya tsena ka gare ga makala ao a raraganego a mohlare o mogolo, ke moka hlogo ya Abesalomo ya kgakgelwa mohlareng woo moo a ilego a šala a lekeletše, mola meila yona e ile ya fetela pele. 10 Ke moka monna yo mongwe a bona seo gomme a yo botša Joaba a re: “Ke bone Abesalomo a lekeletše mohlareng o mogolo.” 11 Joaba a re go monna yoo: “Ge e ba o bone seo, ke ka baka la eng o se wa mmolaela gona moo gomme wa mo tlogela a wetše fase? Gona bjale nkabe ke go nea dishekele tše lesome tša silifera le lepanta.” 12 Eupša monna yoo a re go Joaba: “Le ge ke be nka newa dishekele tše 1 000 tša silifera, ke be nka se bolaye morwa wa kgoši, ka gobane re kwele ge kgoši e laela wena le Abishai le Itai e re: ‘Le kgonthišetše gore go se be le motho yo a kwešago Abesalomo bohloko.’ 13 Ge nkabe ke se ka latela taelo ya kgoši gomme ka bolaya Abesalomo, gona kgoši e be e tlo no tseba. Ke moka wena o be o ka se ntšhireletše.” 14 Ke moka Joaba a re: “O se ke wa njela nako!” Ka gona a tšea mesebe e meraro a ya go Abesalomo a sa lekeletše godimo ga mohlare o mogolo ebile a sa phela, gomme a hlaba pelo ya Abesalomo ka mesebe yeo. 15 Ke moka banna ba lesome bao ba bego ba rwele dibetša tša Joaba, ba tla ba betha Abesalomo ka dibetša tša bona go fihla a ehwa. 16 Ke moka Joaba a letša naka gore a kgaotše ntwa, gomme bahlanka ba Dafida ba tlogela go rakediša Baisiraele bao ba bego ba thekga Abesalomo. 17 Ba tšea Abesalomo ba mo lahlela ka moleteng o mogolo woo o lego sethokgweng gomme ba dira mokgobo o mogolo kudu wa maswika godimo ga gagwe. Ke moka Baisiraele ka moka bao ba bego ba thekga Abesalomo ba tšhabela magaeng a bona.

18 Nakong ya ge Abesalomo a be a sa phela, o ile a itlhomela philara Moeding wa Kgoši, ka gobane o be a re: “Ga ke na morwa yo a tlago go dira gore leina la ka le dule le gopolwa.” Ke moka a reela philara yeo ka leina la gagwe, gomme e sa bitšwa Segopotšo sa Abesalomo go ba go fihla le lehono.

19 Ahimaatse morwa wa Tsadoko a re: “Hle, e re ke kitime ke yo botša kgoši ditaba tše, ka gobane Jehofa o e ahloletše ka go e lokolla seatleng sa manaba a yona.” 20 Eupša Joaba a re go yena: “Lehono ga se wena o tla išetšago kgoši ditaba tše, o tla išetša ka letšatši le lengwe. Eupša lehono ga se wena o ka mmotšago ditaba tše ka gobane go hlokofetše morwa wa kgoši.” 21 Ke moka Joaba a re go Mokushe: “Sepela o yo botša kgoši ditaba tše.” Ka gona Mokushe a inama pele ga Joaba, ka morago a kitima. 22 Ahimaatse morwa wa Tsadoko a buša a re go Joaba: “Seo se diregago a se direge, eupša nna ke kgopela o ntumelele gore ke šale Mokushe yo morago.” Eupša Joaba a re: “Morwa wa ka, ke ka baka la eng o swanetše go mo šala morago, mola go se na seo o ka yago wa se bolela?” 23 Ahimaatse a buša a re: “Seo se diregago a se direge, eupša ke kgopela o ntumelele gore ke mo šale morago.” Ka gona Joaba a re go yena: “Kitima!” Ke moka Ahimaatse a kitima tseleng yeo e fetago tikologong ya Noka ya Jorodane, a feleletša a fetile Mokushe.

24 Ka nako yeo Dafida o be a dutše gare ga dikeiti tše pedi. Ke moka mohlapetši a ya tlhakeng ya leboto la keiti. Eitše ge a lebelela, a bona monna a kitima a nnoši. 25 Ke moka mohlapetši a goeletša gomme a yo botša kgoši. Kgoši ya re: “Ge e ba a kitima a le noši, gona o tliša ditaba.” Ge monna yoo a dutše a batamela, 26 mohlapetši a bona monna yo mongwe gape le yena a kitima, ke moka a goeletša motho yoo a letago keiting a re: “Ke bona monna yo mongwe gape a kitima a nnoši.” Ge a realo, kgoši ya re: “Le yena yoo o tliša ditaba.” 27 Mohlapetši a re: “Ke bona monna wa pele a kitima bjalo ka Ahimaatse morwa wa Tsadoko.” Kgoši ya re: “Yoo ke monna wa go loka, o tla le ditaba tše dibotse.” 28 Ahimaatse a goeletša kgoši a re: “Dilo ka moka di sepela gabotse!” Ke moka a inamela fase sefahlego sa gagwe se kgwathile fase go bontšha gore o hlompha kgoši. Ke moka a re: “Anke Jehofa Modimo wa gago a retwe, yena yoo a thušitšego kgoši mong wa ka go fenya banna bao ba mo hlanogetšego!”

29 Eupša kgoši ya re: “Na morwa wa ka Abesalomo o sa phetše gabotse?” Ke moka Ahimaatse a re: “Ke bone tlhakatlhakano e kgolo nakong ya ge Joaba a roma nna mohlanka wa gago le mohlanka wa gago wa Mokushe, eupša ke be ke sa tsebe gore ke ya eng.” 30 Ka gona kgoši ya re: “Etla o eme mo.” Ahimaatse a ya go kgoši gomme a ema moo a laetšwego gore a eme gona.

31 Ka morago ga moo, Mokushe a tsena a re: “Anke kgoši mong wa ka a amogele ditaba tše: Lehono Jehofa o go bontšhitše toka ka go go lokolla go batho ka moka bao ba go hlanogetšego.” 32 Eupša kgoši ya re go Mokushe: “Na morwa wa ka Abesalomo o phetše gabotse?” Mokushe a re: “Anke manaba a kgoši mong wa ka le batho ka moka bao ba go hlanogetšego gore ba go kweše bohloko ba swane le lesogana leo.”

33 Ditaba tšeo tša ferekanya kgoši kudu, ke moka ya rotogela phapošing yeo e lego ka godimo ga keiti gomme ya lla gabohloko e dutše e sepela e re: “Morwa wa ka Abesalomo, morwa wa ka, Abesalomo morwa wa ka! E ka re nkabe go hwile nna e sego wena, morwa wa ka, morwa wa ka Abesalomo”!