Jobo

 2 “Na motho yo bohlale a ka araba ka go bolela dilo tša go se be le mohola,

Goba na a ka tlatša pelo ya gagwe ka dikgopolo tše di sa lokago?*

 3 Go no kgalema ka mantšu go ka se thuše selo,

Le go no bolela feela go ka se hole selo.

 4 Ge e le wena o dira gore batho ba se sa boifa Modimo,

Le gona o dira gore ba mo tšeele fase.

 5 Dilo tšeo o di bolelago o di bolela ka baka la molato wa gago,

E bile o kgetha go bolela mantšu ao a nago le bohwirihwiri.

 6 Molomo wa gago ke wona o go ahlolago, e sego nna.

Dilo tšeo o di bolelago ke tšona di go bolaišago.

 7 Na o bile motho wa mathomo wa go belegwa,

Goba na o belegwe pele meboto e eba gona?

 8 Na o theetša diphiri tša Modimo,

Goba na ke wena feela o nago le bohlale?

10 Mo gare ga rena go na le ba meriri e mešweu le batšofadi,

Bao ba phetšego nako e telele go feta tatago.

11 Na ga o kgotsofatšwe ke go homotšwa ke Modimo,

Goba na mantšu ao a bolelwago ka boleta ga a go kgotsofatše?

12 Go reng o ikgogomoša e bile o sa kgone go itshwara,

Le gona go reng o hlafišitše sefahlego?

13 Wena o kwatetše Modimo,

Ke ka baka leo o bolelago dilo tša mohuta woo.

14 Na go a kgonega gore motho wa nama le madi a hlweke,

Goba gore motho yo a belegwego ke mosadi e be yo a lokilego?

15 Bona! Modimo ga a tshepe barongwa ba gagwe,*

Le magodimo ka bowona ga se a hlweka mahlong a gagwe.

16 Bjale a ka tshepa bjang motho yo a šišimišago le yo a sa lokago,

Yena motho yo a nyorelwago go dira dilo tše mpe tše e kego o nyorelwa go nwa meetse?

E re ke go anegele seo ke se bonego,

18 Ke dilo tšeo batho ba bohlale ba di anegago,

Tšeo ba di kwelego go botatago bona, e lego tšeo ba sa kago ba di khutiša.

19 Ke bona feela ba neilwego naga,

E bile ga go na motho yo a tšwago nageng e nngwe yo a fetilego nageng ya bona.

20 Motho yo mobe o tlaišega bophelo bja gagwe ka moka,

O welwa ke mathata mengwaga ka moka ya bophelo bja gagwe.

21 Go kwagala modumo wa dilo tše di tšhošago ditsebeng tša gagwe,

Gaešita le nakong ya ge go iketlilwe ditsotsi di a mo hlasela.

22 Ga a sa tshepa gore a ka tšwa leswiswing,

Le gona seo a se letetšego ke go bolawa ka sabola.

24 O tšhošwa ke go tlalelwa le go kwa bohloko,

Dilo tše di mo fenya bjalo ka kgoši yeo e itokišeleditšego go yo hlasela.

25 Dilo tše di mo diragalela ka gobane o emišeditše Modimo letsogo gore a lwe le yena,

E bile o leka go itira yo mogolo go feta Modimo Ramatlaohle.

26 O mo ganetša a ngangabetše,

A swere kotse ya gagwe e koto le e matla.

27 Sefahlego sa gagwe se šušumologile ka baka la go nona,

Le gona matheka a gagwe a tletše makhura.

28 O dula metseng yeo e tlago go fetoga marope,

Le dintlong tšeo go se nago motho yo a ka dulago go tšona,

Tšeo di tlago go fetoga mekgobo ya maswika.

29 A ka se hume e bile lehumo la gagwe le ka se oketšege,

Le gona dilo tšeo a nago le tšona di ka se tlale mo nageng.

30 A ka se tšhabele leswiswi,

O tla ba bjalo ka mohlare wo lekala la wona le fišitšwego ke mollo,

O tla bolawa ke mohemo wa Modimo.

31 A se ke a aroga gomme a tshepa dilo tšeo di se nago mohola,

Ka gobane seo a tlago go se hwetša e tla be e le lefeela.

32 Dilo tše di tla mo diragalela kapelapela.

O tla swana le mohlare wo makala a wona a sa kago a hloga.

33 O tla ba bjalo ka mohlare wa moterebe woo diterebe tša wona di hlohloregago di se tša butšwa,

Le gona o tla swana le mohlare wa mohlware wo o hlohloregago mapolomo.

34 Ka gobane mo batho ba babe ba kopanego ga go be le selo se sebotse,

Le gona mollo o tla fiša ditente tša bao ba tšeago pipamolomo.

35 Ba nagana dilo tše mpe, e bile ba dula ba dira dilo tšeo di gobatšago ba bangwe,

Dipelo tša bona di dula di loga maanomabe.”