Jobo
40 Jehofa a tšwela pele a araba Jobo a re:
2 “Na motho a ka bona Ramatlaohle phošo e bile a lwa le yena?
Anke motho yo a nyakago go sola Modimo a arabe.”
3 Jobo a araba Jehofa a re:
4 “Nna ga ke motho wa selo.
Ke tla go fetola ka reng?
Ga ke na mantšu.
5 Ke boletše gantšhintšhi,
Eupša nka se arabe e bile nka se sa bolela.”
6 Ke moka Jehofa a araba Jobo a le ledimong a re:
7 “Hle itokiše gomme o dire senna,
Ke tla go botšiša dipotšišo, wena wa nkaraba.
8 Na o tla ntatofatša wa re ga ke na toka?
Na o tla mpea molato e le gore wena o šale o se na molato?
9 Na o na le matla a lekanago le a Modimo wa nnete,
Goba na o na le lentšu leo le swanago le la gagwe, leo le kwagalago go swana le modumo wa legadima?
10 Hle bontšha gore o tiile e bile o na le matla.
Bontšha gore o yo mogolo e bile o swanelwa ke go hlomphiwa.
11 Ntšha kgalefo ya gago ka moka,
O bone motho yo mongwe le yo mongwe yo a ikgogomošago gomme o dire gore a be le boikokobetšo.
12 Bona motho yo mongwe le yo mongwe yo a ikgogomošago, gomme o dire gore a be le boikokobetšo,
O gatakele batho ba babe moo ba emego gona.
13 Ba ute ka moka ga bona leroleng,
Ba tlemelele lefelong leo le utegilego.
14 Ge e ba o ka dira dilo tše ka moka,
Gona ke tla dumela gore ka nnete o ka kgona go iphološa ka matla a gago.
15 Lebelela kubu* yeo e jago bjang go no swana le poo.
E bopilwe ke nna, go no swana le ge le wena ke go bopile.
16 Bona gore maoto a yona a tiile gakaakang,
Le gore mešifa ya mpa ya yona e na le matla a magolo gakaakang!
17 Mosela wa yona o tiile go swana le mohlare wa motsedara,
Mešifa ya dirope tša yona e logagane.
18 Go bjalo ka ge eka marapo a yona a dirilwe ka koporo,
Maoto a yona a tiile go swana le tšhipi.
19 Mohuteng wa diphoofolo tša go swana le yona, ke yona ya mathomo le e matla yeo Modimo a e bopilego.
Ke Mmopi wa yona feela yo a ka e hlaselago le go e bolaya ka sabola.
20 Dithaba di e medišetša dijo,
E lego moo diphoofolo ka moka tša naga di ralokelago gona.
21 E robala ka tlase ga dihlašana tša go hlaba,
E khuta mo go tletšego mahlaka.
22 Dihlašana tša go hlaba di e direla meriti,
Gomme mehlare ya mepopoliri yeo e melago meeding e e dikologile.
23 Le ge noka e ka tlala ya falala, yona ga e tšhoge.
Ga e boife le ge meetse a Noka ya Jorodane a ka e gaša.
24 Na go na le yo a ka e swarago e lebeletše,
Goba a e phula nko ka huku?