Psalme
Ditaelo tšeo di yago go mohlahli. Koša ya barwa ba Kora.
49 Ekwang se lena merafo ka moka.
Hlwayang tsebe lena badudi ka moka ba lefaseng,
2 Bao ba nyatšegago le bao ba hlomphegago,
Bahumi le badiidi.
3 Ke tla bolela dilo tše bohlale,
Gomme dilo tšeo ke naganišišago ka tšona di tla bontšha gore ke na le kwešišo.
4 Ke tla hlwaya tsebe ka theetša seema,
Ke tla hlalosa mantšu a ka ke letša harepa.
5 Ke ka baka la’ng ke swanetše go boifa ge ke welwa ke mathata?
Nka se boife ge ke welwa ke mathata le ge batho ba babe ba ntikologile e bile ba leka go nkgobatša.
6 Bao ba tshepilego mahumo a bona
Le bao ba ikgantšhago ka mahumo a bona a mantšhi,
7 Go bona ka moka, ga go le o tee yoo le ka mohla a ka kgonago go lopolla ngwanabo,
Goba a nea Modimo topollo bakeng sa ngwanabo,
8 (Tefo ya go ba lopolla e godimo kudu,
E dula e le godimo kudu moo ba ka se kgonego go e fihlelela),
9 E le gore a phele go ya go ile gomme a se hlokofale.
10 Batho ka moka ba a bona gore le batho ba bohlale ba a hlokofala.
Batho ba ditlaela le ba go hloka tlhaologanyo le bona ba a hlokofala,
Gomme ba swanelwa ke go tlogelela ba bangwe dilo tšeo ba bego ba na le tšona.
11 Ba duma gore dintlo tša bona di dule di le gona,
Le gore ditente tša bona di dule di le gona melokong ya bona ka moka yeo e tlago.
Ba reetše dinaga tša bona ka maina a bona.
12 Eupša le ge motho a ka hlomphiwa, a ka se dule a phela.
O swana le diphoofolo tšeo di hwago.
13 Ye ke tsela ya ditlaela,
Le ya bao ba di šalago morago gomme ba kgahlwa ke dilo tšeo di bolelwago ke ditlaela tše. (Selah)
14 Ba tla hwa go swana le dinku tšeo di yago go bolawa.
Lehu le tla ba diša go swana le modiši yoo a dišago dinku tša gagwe.
Baloki ba tla ba buša ge go esa,
Gomme batho bao ba tla hwelela.
Go e na le gore ba dule dintlong tša bona tše dibotse, ba tla dula Lebitleng.*
15 Eupša Modimo o tla ntopolla Lebitleng,*
Ka gobane o tla nntšha go lona gomme a ntšhireletša. (Selah)
16 O se ke wa tšhošwa ke ge motho yo mongwe a huma,
Goba wa tšhošwa ke go bona ge ntlo ya gagwe e thoma go ba ya manobonobo,
17 Ka gobane ge a hlokofala a ka se bolokwe lebitleng le tšona,
A ka se bolokwe le mahumo a gagwe.
18 Ka gobane ge a be a sa phela o be a dulela go itheta.
(Batho ba a go reta ge o atlega)
19 Eupša le yena o tla hlokofala go swana le borakgolokhukhu ba gagwe.
Ba ka se sa tsoga ba bone seetša.
20 Motho yo a sa kwešišego dilo tše, le ge a ka hlomphiwa,
O swana le diphoofolo tšeo di hwago.