Daniele

10 Ka ngwaga wa boraro wa ge Kgoši Korese wa Peresia a buša, Daniele yo a bego a bitšwa Belteshatsara, o ile a hwetša molaetša wo o tšwago go Modimo gomme molaetša wa gona e be e le wa nnete. Molaetša woo e be e le wa mabapi le ntwa e kgolo. Le gona o ile a fiwa bohlale bja gore a kwešiše seo a se bonego.

2 Ka nako yeo, nna Daniele ke be ke feditše dibeke tše tharo ke lla. 3 Ga se ka ja dijo tša maemo, ga se ka ja nama goba go nwa beine e bile ke feditše dibeke tše tharo ke sa tlole makhura. 4 Ka di-24 tša kgwedi ya pele, ge ke be ke le ka thoko ya noka e kgolo ya Tikirisi,* 5 ke itše ge ke lebelela, ka bona monna yo mongwe a apere lešela la linene, a tlemile letheka la gagwe ka lepanta la gauta yeo e tšwago Ufatse. 6 Mmele wa gagwe o be o swana le leswika le bohlokwa leo le bitšwago kirisolite, sefahlego sa gagwe se le bjalo ka ge eka ke legadima, mahlo a gagwe a be a swana le dirumula tša mollo, matsogo a gagwe le maoto a gagwe a be a swana le koporo yeo e phadimišitšwego gomme modumo wa lentšu la gagwe o be o le bjalo ka ge eka ke wa lešaba la batho. 7 Nna Daniele, ke nna feela ke ilego ka bona pono yeo gomme banna bao ba bego ba na le nna ga se ba e bona. Eupša ba ile ba tšhoga kudu gomme ba tšhaba ba ya ba ikuta.

8 Ke ile ka šala ke nnoši. Le gona ge ke be ke bona pono yeo e kgolo, ke be ke se na matla. Sefahlego sa ka se ile sa fetoga mmala gomme ka fela matla. 9 Ke moka ka kwa monna yoo a thoma go bolela. Ge ke ekwa a bolela, ke ile ka wela fase gomme ka kgwatha fase ka sefahlego ka napa ka ya ka boroko. 10 Ke moka ka kwa seatla se nkgwatha gomme se ntšhikinya gore ke tsoge. Monna yoo o ile a nthuša gore ke ikokotlele ka matolo a ka le ka matsogo. 11 Ke moka a re go nna:

“Wena Daniele, monna yo bohlokwa kudu, theetša seo ke nyakago go go botša sona. Bjale emelela ka gobane Modimo o nthomile go wena. ”

Ge a realo, ke ile ka emelela ke thothomela.

12 Ke moka a re go nna: “Wena Daniele, o se ke wa boifa. Go tloga letšatšing leo o bego o ikemišeditše go ba le kwešišo le go ikokobetša pele ga Modimo wa gago, thapelo ya gago e kwelwe gomme nna ke tlile mo ka baka la thapelo ya gago. 13 Eupša moetapele wa mmušo wa Peresia o ile a nthibela ka matšatši a 21. Ke moka Mikaele,* e lego yo mongwe wa baetapele ba bagolo, o ile a tla a nthuša gomme ka tšwela pele ke eme moo kgauswi le dikgoši tša Peresia. 14 Bjale ke tlile go go thuša go kwešiša seo se tlago go wela setšhaba sa geno karolong ya mafelelo ya mehla ya bofelo, ka gobane dilo tšeo o di bonego ponong di tlo direga nakong e tlago.”

15 Ge a be a mpotša mantšu ao, ke ile ka lebelela fase gomme ka hloka le molomo. 16 Ke moka, motho yo a bego a bonagala eka ke monna o ile a nkgwatha molomo gomme ka bula molomo wa ka, ka re go motho yo a bego a eme ka pele ga ka: “Mong wa ka, ke a thothomela ka baka la pono yeo ke e bonego e bile ga ke na matla. 17 Bjale nna mohlanka wa gago nka kgona bjang go bolela le wena mong wa ka? Ka gobane ke feletšwe ke matla e bile ga ke kgone le go hema.”

18 Ka gona, motho yoo a bego a bonagala eka ke monna o ile a nkgwatha gape gomme a mmatlafatša. 19 Ke moka a re: “Wena monna yo bohlokwa kudu, o se ke wa boifa. Anke o be le khutšo. Tia matla gomme o be le sebete.” Ge a dutše a bolela le nna, ke ile ka boela ka ba le matla gomme ka re: “Mong wa ka, bolela ka gobane o mmatlafaditše.”

20 Ke moka a re: “Na o a tseba gore ke ka baka la eng ke tlile go wena? Gona bjale ke boela morago gore ke yo lwa le moetapele wa mmušo wa Peresia. Ge ke tloga mo, moetapele wa Gerika o tlo tla. 21 Eupša ke tla go botša dilo tšeo di ngwadilwego dipukung tša nnete. Ga go na motho le o tee yo a tlogago a nthekga dilong tše. Eupša ke thekgwa ke Mikaele feela, yoo e lego moetapele wa gago.