Psalme
PUKU YA BOBEDI
(Dipsalme 42–72)
Ditaelo tšeo di yago go mohlahli. Koša ya barwa ba Kora. Maskile.*
2 Ke hlologetše Modimo yo a phelago go swana le motho yo a swerwego ke lenyora la meetse.
Ke tla iponagatša neng pele ga Modimo?
3 Ke dula ke lla bošego le mosegare e bile ke palelwa le ke go ja.
Batho ba nkwera letšatši ka moka ba re: “Modimo wa gago o kae?”
4 Ke gopola dilo tše gomme ke go botša sa pelong ya ka.
Ka gobane nkile ka sepela le batho ba bantšhintšhi.
Ke be ke fela ke sepela ka go nanya ke ba etile pele re eya ntlong ya Modimo,
Ka nako yeo ka moka ga rena re be re goelela re thabile e bile re leboga Modimo,
Re be re keteka monyanya re le ba bantšhi kudu.
5 Ke ka baka la’ng ke nyamile?
Ke ka baka la’ng ke tlaletšwe?
Ke tla letela Modimo.
Ke tla mo reta ka ge e le yena feela Mophološi wa ka le Modimo wa ka.
6 Modimo wa ka, ke nyamile.
Ke ka baka leo ke go gopolago
Ke le nageng yeo Noka ya Jorodane e lego gona, le godimo ga dithaba tša Heremone,
Ke le thabeng ya Mitsara.
7 Ke kwa modumo wa meetse ao a elelago ka lebelo,
Ke modumo wa diphororo tša gago.
Mathata a ka a nkimela bjalo ka maphoto a gago a matla.
8 Mosegare Jehofa o tla mpontšha lerato la gagwe le le botegago,
Gomme bošego ke tla opela koša ya go mo tumiša,
Ke tla rapela Modimo yo a mphago bophelo.
9 Ke tla botšiša Modimo, yena leswika la ka le legolo ka re,
“Ke ka baka la’ng o ntebetše?
Ke ka baka la’ng ke swanetše go sepela ke nyamile lenaba la ka le ntshwere gampe?”
10 Manaba a ka ao a nyakago go mpolaya ga sehlogo a a nkwera,
A nkwera letšatši ka moka a re: “Modimo wa gago o kae?”
11 Ke ka baka la’ng ke nyamile?
Ke ka baka la’ng ke tlaletšwe?
Ke tla letela Modimo.
Ke tla mo reta ka ge e le yena feela Mophološi wa ka le Modimo wa ka.