Ruthe

4 Boase a ya kgorong* a dula moo. Ke moka monna yola Boase a boletšego gore o na le tshwanelo ya go nyala Ruthe a feta moo. Boase a re go yena: “Warra, ke kgopela o tle mo o dule fase.” Monna yo a ya a dula fase. 2 Ke moka, Boase a kgetha banna ba bagolo ba lesome ba motse a re go bona: “Dulang mo.” Ke moka ba dula.

3 Boase a re go monna yoo: “Ka ge Naomi a sa tšwa go boa Moaba, o swanelwa ke go rekiša tšhemo yela e bego e le ya ngwanabo rena Elimeleke. 4 Bjale ke be ke re ke go botše gore: ‘E reke pele ga badudi ba ba motse le banna ba bagolo ba setšhaba sa gešo. Ka ge o tswalane le Elimeleke go mpheta, e reke. Eupša ge o sa nyake go e reka gona mpotše gore ke e reke ka ge ke go latela lelokong la gabo rena.’” Monna yoo a re: “Ke tla e reka.” 5 Ke moka Boase a re: “Letšatšing leo o tlago go reka tšhemo, o tla swanelwa ke go e reka go Naomi le Ruthe wa Momoaba yo a hwetšwego ke monna, gore bohwa bja monna yoo bo se ke bja hwelela.” 6 Ge monna yo a ekwa taba yeo a re: “Nka se kgone go e reka, ka gobane nka tla ka ba modiidi.* Ke go dumelela gore wena o e reke, ka gobane nna nka se kgone go e reka.”

7 Mehleng ya Baisiraele ge motho a be a fetišetša tshwanelo ya gagwe ya go ba morekolodi go wa gabo goba yena le motho yoo ba fana dilo tše itšego, o be a rola seeta sa gagwe ke moka a se nea motho yoo. Wo e be e le mokgwa wa Baisiraele wa go tiišetša taba. 8 Monna yola a re go Boase: “Wena reka tšhemo yeo.” Ke moka a napa a rola seeta sa gagwe a se nea Boase. 9 Ke moka Boase a re go banna ba bagolo le go batho ka moka: “Lena lehono le dihlatse tša gore ke reka go Naomi dilo tšohle tšeo e bego e le tša Elimeleke le tšohle tšeo e bego e le tša Kilioni le Maglone. 10 Ke nyala le Ruthe wa Momoaba, yo e bego e le mosadi wa Maglone, gore bohwa bja mohu bo se ke bja hwelela le gore leina la gagwe le se ke la lebalwa gare ga bana babo le motseng wa gabo.* Lena le dihlatse lehono.”

11 Ge a realo, batho ka moka bao ba bego ba le kgorong ya motse le banna ba bagolo ba re: “Re dihlatse! Eka Jehofa a ka dira gore mosadi yo a tlago ka ntlong ya gago a swane le Ragele le Lea, bao setšhaba sa Isiraele se tšwelego go bona. Eka Modimo a ka šegofatša dilo ka moka tšeo o di dirago Efurata, gomme leina la gago le tume Betlelehema. 12 Eka Jehofa a ka šegofatša wena le mosadi wa gago yo mofsa ka bana gomme lapa la gago la gola go swana le la Peretse morwa wa Thamara le Juda.”

13 Ka gona Boase a nyala Ruthe gomme a robala le yena. Jehofa a dira gore a ime gomme a belega morwa. 14 Basadi ba re go Naomi: “A go tumišwe Jehofa yo a dirilego gore yo mongwe wa leloko la monna wa gago a go thuše, anke leina la ngwana yo le tume Isiraele. 15 Ke yena a dirago gore o thabe e bile a tsošološago leloko la gago. Le gona o tla go hlokomela botšofading bja gago, ka ge o mmelegetšwe ke ngwetši ya gago yeo e go ratago, yeo go wena e lego kaone go feta barwa ba šupa.” 16 Ke moka Naomi a tšea ngwana yoo a mo gokarela sehubeng, a mo hlokomela.* 17 Basadi ba baagišani ba re: “Naomi o belegetšwe morwa.” Ba mo rea leina ba re ke Obede. Ke yena tatago Jese, yo e lego tatago Dafida.

18 Moloko wa Peretse šo: Peretse e bile tatago Hetserone, 19 Hetserone ya ba tatago Rame, Rame ya ba tatago Aminadaba, 20 Aminadaba ya ba tatago Nahashone, Nahashone ya ba tatago Salamone, 21 Salamone ya ba tatago Boase, Boase ya ba tatago Obede, 22 Obede ya ba tatago Jese, Jese yena ya ba tatago Dafida.