Puku ya Bobedi ya Dikoronika
8 Solomone o agile ntlo ya Jehofa le ntlo ya gagwe ka mengwaga e 20, 2 o ile a tsošološa metse yeo Hirama a bego a mo file yona, ke moka a dudiša Baisiraele moo. 3 Solomone o ile a ya a lwa le badudi ba motse wa Hamathi-tsoba gomme a thopa motse woo. 4 Ke moka a tsošološa motse wa Thadimoro woo o bego o le lešokeng, a ba a tsošološa le metse ka moka ya go bolokela dilo yeo a bego a e agile kua Hamathi. 5 O ile a aga le Bethe-horoni ya Godimo le Bethe-horoni ya Tlase, e lego metse yeo e šireleditšwego ka maboto, dikeiti le ditšhipi, 6 a aga le motse wa Balathe gotee le metse ka moka yeo Solomone a bego a bolokela dilo go yona, metse ka moka ya dikariki tša ntwa, metse ya banamedi ba dipere le selo le ge e le sefe seo Solomone a bego a nyaka go se aga Jerusalema, Libanoni le nageng ka moka yeo a bego a e buša.
7 Ge e le batho ka moka bao ba bego ba šetše ba Bahethe, Baamore, Baperetse, Bahefe le Bajebusi, bao e bego e se Baisiraele, 8 le ditlogolo tša bona tšeo di bego di šetše nageng, tšeo Baisiraele ba bego ba se ba di fediša, Solomone o ile a di gapeletša gore di šome go swana le makgoba go ba go fihla le lehono. 9 Eupša Solomone ga se a ka a dira Baisiraele makgoba ka gobane e be e le mašole a gagwe, baetapele ba balaodi ba mašole a gagwe, balaodi ba banamedi ba dikariki tša gagwe tša ntwa le banamedi ba dipere tša gagwe. 10 Kgoši Solomone o be a na le balaodi ba matona ba 250 (makgolopedi-masomehlano), matona ao a be a hlokometše batho bao ba bego ba šoma.
11 Le gona, Solomone o ile a ntšha morwedi wa Farao Motseng wa Dafida a mo iša ntlong yeo a bego a mo agetše yona, ka gobane o itše: “Le ge e le mosadi wa ka, ga se a swanela go dula ka ntlong ya Kgoši Dafida wa Isiraele, ka gobane mafelo ao Areka ya Jehofa e swanetšego go dula go ona ke a makgethwa.”
12 Ke moka Solomone a direla Jehofa dihlabelo tša go fišwa aletareng ya Jehofa yeo a bego a e agile pele ga mathudi. 13 Solomone o ile a dira dilo ka go dumelelana le melao yeo Moshe a bego a e file. O ile a neela dibego tšeo di bego di swanetše go neelwa letšatši le letšatši, dibego tšeo di bego di swanetše go neelwa ka Disabatha, dibego tša ge ngwedi o moswa o thoma go bonagala, le dibego tšeo di bego di neelwa menyanyeng yeo e bego e dirwa gararo ka ngwaga, e lego Monyanya wa Dinkgwa tše di sa Omelwago, Monyanya wa Dibeke le Monyanya wa Mešaša.* 14 Go oketša moo, o ile a kgetha dihlopha tša baperisita gore ba dire mešomo ya bona go ya le kamoo Dafida tatagwe a bego a laetše ka gona, a ba a kgetha le Balefi gore ba dire mešomo ya bona, ba tumiše Modimo le go mo hlankela ba le pele ga baperisita letšatši le letšatši, a kgetha le batho ba go leta dikeiti ka dihlopha tša bona gore ba lete dikeiti tša go fapafapana, ka gobane taelo ye e be e etšwa go Dafida, yena monna wa Modimo wa nnete. 15 Le gona ga se ba ka ba tshela taelo yeo kgoši e bego e e neile baperisita le Balefi ya mabapi le taba e nngwe le e nngwe goba taba ya go sepedišana le dintlo tša go bolokela dilo. 16 Ka gona mošomo wa Solomone o be o beakantšwe gabotse, go tloga letšatšing leo fantešeni ya ntlo ya Jehofa e dirilwego ka lona go fihla ntlo yeo e fetšwa. Mafelelong ntlo ya Jehofa e ile ya fela.
17 Ka nako yeo, Solomone o ile a ya Etsione-gebere le Elothe yeo e bego e le lebopong la lewatle la naga ya Edomo. 18 Hirama o ile a romela Solomone dikepe le basesiši bao ba bego ba tseba mošomo wa bona gabotse a diriša bahlanka ba gagwe. Ba ile ba ya Ofira le bahlanka ba Solomone gomme ba tšea gauta yeo e imelago dikhilokgerama tše 15 390 (dikete tše lesomehlano makgolotharo-masomesenyane)* ba di tliša go Kgoši Solomone.