Amose
6 “Go madimabe bao ba iketlilego Tsione,
Le bao ba ikwago ba šireletšegile thabeng ya Samaria.
Ke baetapele ba ditšhaba tše di tumilego,
E lego bao ba ntlo ya Isiraele ba ba tshepilego!
2 Eyang Kaline le yo bona.
Le tlogeng moo le ye motseng o mogolo wa Hamathi,
Le be le ye motseng wa Bafilisita wa Gathe.
Na metse ye e phala mebušo ya lena e mebedi,
Goba na tikologo ya yona ke e kgolo go feta ya lena?
3 Na le itebatša letšatši la masetlapelo,
Le gona na le dira gore bošoro bo tlale mo nageng?
4 Lena bao le robalago mepeteng yeo e dirilwego ka lenaka la tlou e bile le patlamago disofeng tše dibotsebotse,
Lena bao le jago dinku le dipowana tšeo di nonnego tša mehlapeng ya lena,
5 Lena bao le itlhamelago dikoša ge le ekwa harepa e lla,
Le lena bao le itirelago diletšo tša mmino le re le swana le Dafida.
6 Lena bao le nwelago beine ka dikomiking tše dikgolo,
Gomme la tlola ka makhura a makaonekaone.
Eupša ga se la kwešwa bohloko ke masetlapelo ao a welago ba ntlo ya Josefa.
7 Le tla ba ba mathomo go bao ba tlago go ya bothopša,
Gomme nako ya menyanya ya mašata ya bao ba iketlilego e tlo fela.
8 ‘Nna Mmuši Morena Jehofa ke enne* ka re:
“Ke hloile boikgantšho bja Jakobo,
Ke hloile le mešate ya gagwe.
Le gona motse wo le dilo ka moka tšeo di lego go ona ke tla di nea manaba a wona.”’ Ke nna Jehofa Modimo wa madira ke bolelago se.
9 “‘“Le ge banna ba lesome ba ka šala ka ntlong e tee, ruri ba tla hwa. 10 Ngwanabo tatago yo mongwe wa bona o tlo kuka ditopo tša bona ka moka gomme a di tšhuma ka setee ka setee. O tla ntšha ditopo tša bona ka ntlong, ke moka a botšiša motho le ge e le ofe yo a lego ka ntlong yeo a re: ‘Na go sa na le bao ba šetšego le wena?’ Yena o tla re: ‘Ga go na motho.’ Ke moka ngwanabo tatagwe o tla re: ‘Homola! Ka gobane ye ga se nako ya go bitša leina la Jehofa.’”
11 Gobane Jehofa o tla ntšha taelo,
Gomme ntlo e kgolo e tla phušulwa,
Ke moka ntlo e nnyane e tla pšhatlaganywa.
12 Na dipere di ka kitima leswikeng le legolo,
Goba na motho a ka lema moo ka dikgomo?
Le fetošitše toka gore e swane le semela sa mpholo,
Gomme la fetoša seenywa sa yona gore se galake go swana le lengana.
13 Lena bao le thabišwago ke selo seo se se nago mohola,
Le re: “Re bile ba matla ka borena.”
14 Ka gona lena ba ntlo ya Isiraele, ke tlo tliša setšhaba seo se tlago go lwa le lena,
Se tla le tlaiša go tloga motseng wa Lebo-hamathi go fihla Moeding wa Araba.’ Ke nna Jehofa Modimo wa madira ke bolelago se.”