Amose
4 “Lena basadi bao ba swanago le dikgomo tša Bashani tšeo di lego thabeng ya Samaria,
Ekwang se.
Lena basadi bao ba ropago batho ba maemo a tlasana le go gatelela badiidi,
Lena bao le rego go banna ba lena: ‘Re feng sa go nwa!’
2 Mmuši Morena Jehofa yo e lego yo mokgethwa o enne a re:
‘“Tsebang gore go tla matšatši ao le tlago go fegwa bjalo ka nama ya diphoofolo tše di bolailwego,
Gomme bao ba šetšego ba gogwa ka dihuku tša go goga hlapi.
3 Yo mongwe le yo mongwe wa lena o tlo tšwa ka lešoba la leboto leo le lego ka pele ga lena,
Gomme le tla lahlelwa Haremone.” Ke nna Jehofa ke bolelago se.’
4 ‘Bjale etlang Bethele le tlo tshela molao,
Etlang le Giligala gore le tshele molao le go feta!
Tlišang dihlabelo tša lena mesong,
Gomme ka letšatši la boraro le tlišeng dikarolo tša lena tša lesome.
5 Fišang sehlabelo sa senkgwa seo se nago le komelo* gore le leboge Modimo,
Goeletšang le tsebišeng batho ka dihlabelo tšeo le di ntšhago ka go rata!
Ka gobane se ke seo le ratago go se dira, lena Baisiraele.’ Ke nna Mmuši Morena Jehofa ke bolelago se.
6 ‘Le gona nna ke le bolaišitše tlala metseng ya lena ka moka,
Ka dira gore le hloke dijo dintlong tša lena ka moka.
Eupša ga se la ka la boela go nna.’ Ke nna Jehofa ke bolelago se.
7 ‘E bile ke le timile pula go šetše dikgwedi tše tharo gore le bune,
Ka neša pula motseng o mongwe, eupša go o mongwe ka se e neše.
Go tla ba le tšhemo yeo e tlago go nelwa ke pula,
Eupša e nngwe ya se nelwe ke pula gomme ya omelela.
8 Batho ba metseng e mebedi goba e meraro ba be ba tšama ba thekesela ba swerwe ke lenyora gore ba ye motseng o mongwe go yo nwa meetse,
Fela ba se kgolwe.
Eupša ga se la ka la boela go nna.’ Ke nna Jehofa ke bolelago se.
9 ‘Ke otlile mabele a lena ka phišo le ka bolwetši bja go bolaya dimela,
Le ile la bjala mašemo a mantšhi le dirapa tša diterebe,
Fela ditšie di ile tša ja mehlare ya lena ya mego le ya mehlware.
Eupša ga se la ka la boela go nna.’ Ke nna Jehofa ke bolelago se.
10 ‘Ke le rometše leuba la bolwetši la go swana le leo le ilego la wela Egepeta.
Ka bolaya masogana a lena ka tšhoša, ka ba ka tšea le dipere tša lena.
Ka dira gore monkgo wa ditopo o tlale gohle dikampeng tša lena.
Eupša ga se la ka la boela go nna.’ Ke nna Jehofa ke bolelago se.
11 ‘Ke ile ka senya naga ya lena go swana le ge ke be ke fediša Sodoma le Gomora.
Ke moka la ba bjalo ka legong leo le ntšhitšwego mollong.
Eupša ga se la ka la boela go nna.’
Ke nna Jehofa ke bolelago se.
12 Ka baka leo ke tlo go otla gape wena Isiraele,
Ka gobane se ke seo ke tlago go go dira sona.
Itokišeletše go kopana le Modimo wa gago wena Isiraele.
13 Tsebang gore ke nna yo a dirilego dithaba le diphefo,
Ke nna ke botšago motho dikgopolo tša ka,
Ke dira gore seetša sa mesong se fetoge leswiswi,
E bile ke sepela dintlheng tša dithaba.
Ke nna moetapele wa madira a legodimong, leina la ka ke nna Jehofa.”