Doiteronomio

22 “O se ke wa re ge o bona poo goba nku ya wa geno e timela wa fo e tlogela. O e gape o e bušetše go motho yoo. 2 Eupša ge e ba wa geno a sa dule kgauswi le wena, goba o sa tsebe gore mong wa phoofolo yeo ke mang, gona o ye le yona gae gomme o dule le yona go fihlela ge mong wa yona a e nyaka, ke moka o mmušetše yona. 3 Se ke seo o swanetšego go se dira le ka tonki ya wa geno, seaparo sa gagwe, goba selo le ge e le sefe seo a se timeditšego seo wena o se hweditšego. O se ke wa se tlogela.

4 “Ge o ka bona tonki goba poo ya wa geno e wele tseleng, o se ke wa fo e tlogela. O mo thuše go e tsoša.

5 “Mosadi a se ke a apara seaparo sa monna, le monna a se ke a apara seaparo sa mosadi, ka gobane motho le ge e le ofe yo a dirago dilo tše, o šišimiša Jehofa Modimo wa lena.

6 “Ge o ka hwetša sehlaga sa nonyana mo tseleng se na le mafotwana goba mae, se ka ba se le mohlareng goba se wetše fase, gomme mmago mafotwana ao a dutše godimo ga wona goba nonyana yeo e alametše mae ao, o se ke wa e tšea le mafotwana a yona. 7 O rake mmago ona, eupša wena o ka tšea mafotwana ao, o dire se e le gore dilo di go sepelele gabotse le gore o tle o phele nako e telele.

8 “Ge o aga ntlo, o age le lebotwana ka godimo ga tlhaka ya ntlo ya gago, e le gore wena le ba lapa la gago le se tlo ba le molato ge e ba motho a ka wa a le moo gomme a hwa.

9 “O se ke wa bjala mehuta e mebedi ya peu serapeng sa gago sa meterebe, go sego bjalo, dilo ka moka tšeo di tlago go tšweletšwa ke peu yeo o e bjetšego le tšeo di tšwago serapeng sa meterebe, di tla išwa sekgethweng.

10 “O se ke wa pana poo le tonki ge o lema.

11 “O se ke wa apara seaparo seo se dirilwego ka wulu yeo e logagantšwego le lešela la linene.

12 “O dire mašaphu* dikhoneng tše nne tša diaparo tšeo o di aparago.

13 “Ge e ba monna a ka nyala mosadi gomme a robala le yena, ke moka ka morago a se sa hlwa a mo rata, 14 a mmea molato wa gore o dirile selo se sebe gomme a mo senya leina a re: ‘Ka morago ga gore ke robale le mosadi yo, ga se ka hwetša bohlatse bja gore o be a se a ka a robala le monna, 15 gona tatago ngwanenyana yoo le mmagwe, ba tliše bohlatse bja gore ngwanenyana yoo ga se a ka a robala le monna, gomme ba bo nee banna ba bagolo ba motse kgorong ya motse woo. 16 Ke moka tatago ngwanenyana yoo a botše banna ba bagolo a re: ‘Ke file monna yo morwedi wa ka gore e be mosadi wa gagwe, eupša ga a sa mo rata. 17 Bjale šo o bea morwedi wa ka molato wa gore o dirile selo se sebe, o re: “Ga se ka hwetša bohlatse bja gore morwedi wa gago ga se a ka a robala le monna.” Bjale bohlatse bja gore morwedi wa ka ga se a ka a robala le monna še bo.’ Ke moka batswadi ba ngwanenyana yoo ba phurolle lešela leo la bohlatse pele ga banna ba bagolo ba motse. 18 Banna ba bagolo ba motse woo ba tšee monna yoo ba mo itie. 19 Ba mo patediše ditšhelete tše 100 tša silifera gomme ba di nee tatago ngwanenyana yoo, ka gobane monna yoo o sentše leina la ngwanenyana yo yoo a sa kago a robala le monna Isiraeleng, gomme ngwanenyana yoo a tšwele pele e le mosadi wa gagwe. Ke moka monna yoo a ka se tsoge a dumeletšwe go mo hlala bophelo bja gagwe ka moka.

20 “Eupša ge go ka hwetšwa gore taba yeo ke nnete, le gore ga go na bohlatse bja gore ngwanenyana yoo o be a se a ka a robala le monna, 21 gona ba ntšhetše ngwanenyana yoo ka ntle ga mojako wa ntlo ya tatagwe, gomme banna ba motse ba mo kgatle ka maswika go fihlela a ehwa, ka gobane o dirile selo seo se šišimišago Isiraeleng ka go ba le thobalano a sa dula ka ntlong ya tatagwe. Ka gona, le tloše motho yo mobe mo go lena.

22 “Ge e ba monna a ka hwetšwa a robetše le mosadi wa monna yo mongwe, ka moka ga bona ba bolawe. Go bolawe monna yoo gotee le mosadi yo a robetšego le yena. Ka gona, le tloše motho yo mobe mo go lena.

23 “Ge e ba go ka ba le ngwanenyana yo a sa kago a robala le monna, gomme go na le monna yo a tshepišitšego go mo nyala, ke moka monna yo mongwe a kopana le yena mo motseng gomme a robala le yena, 24 le ntšhetše batho bao ba babedi ka ntle ga keiti ya motse, gomme le ba kgatle ka maswika go fihlela ba ehwa. Ngwanenyana yoo le mo kgatle ka maswika, ka gobane ga se a ka a goeletša gore a kgopele thušo moo motseng. Monna yoo le yena, a kgatlwe ka maswika ka gobane o hlabišitše mosadi wa wa gabo dihlong. Ka gona, le tloše motho yo mobe mo go lena.

25 “Eupša ge e ba monna a ka re a le nageng, a kopana le ngwanenyana yo a tshepišitšwego ke monna yo mongwe gore o tlo mo nyala gomme a mo kata, gona monna yoo a bolawe a nnoši, 26 eupša ngwanenyana yoo le se ke la mo dira selo. Ngwanenyana yoo ga se a dira sebe seo se swanelwago ke gore a bolawe. Taba ye e swana le ge monna a ka hlasela motho yo mongwe gomme a mmolaya. 27 Ka gobane monna yoo o hweditše ngwanenyana yoo nageng, gomme ngwanenyana yo a tshepišitšwego go nyalwa a goeletša eupša a hloka motho yo a ka mo thušago.

28 “Ge monna a ka kopana le ngwanenyana yo a sa kago a robala le monna e bile a se a tshepišwa go nyalwa, gomme a mo swara a robala le yena, ke moka ba hwetšwa, 29 gona monna yoo a robetšego le yena a nee tatago ngwanenyana yoo ditšhelete tša silifera tše 50, gomme ngwanenyana yoo e be mosadi wa gagwe, ka ge monna yoo a hlabišitše ngwanenyana yoo dihlong. A ka se tsoge a dumeletšwe go mo hlala bophelo bja gagwe ka moka.

30 “Go se be le monna yo a nyalago mosadi wa tatagwe, e le gore tatagwe a se ke a nyatšega.