Hosea
12 “Efuraime o tshepa dilo tša go hloka mohola.*
Letšatši ka moka o hlwa a rakediša phefo ya ka bohlabela.
O phelela go bolela maaka e bile o dula a senya.
O dira kgwerano le Asiria gomme a iša makhura Egepeta.
2 Jehofa o tla sekiša Juda.
O tla dira gore Jakobo a ikarabele go ya ka ditsela tša gagwe.
O tla mo otla go ya ka ditiro tša gagwe.
3 O ile a swara ngwanabo ka serethe ge a be a le ka mpeng ya mmagwe.
Le gona o ile a lwa le Modimo ka matla a gagwe ka moka.
4 O ile a lwa le morongwa a ba a mo fenya.
O ile a lla a kgopela gore a mo šegofatše.”
Modimo o ile a mo hwetša Bethele gomme a bolela le rena a le gona moo.
5 Jehofa ke Modimo wa madira.
Batho ba swanetše go gopola gore leina la gagwe ke Jehofa.
6 “Ka gona boela go Modimo wa gago.
Dula o na le lerato la nnete* le toka,
Gomme o dule o tshepa Modimo wa gago.
7 Batho ba go rekiša ba swere dikala tša bofora ka diatleng tša bona.
Ba rata go radia ba bangwe.
8 Efuraime o dula a re: ‘Ke humile,
Ke ikhweleditše mahumo.
Ke a šometše ka thata. Ba ka se hwetše selo sa phošo goba se sebe go nna.’
9 Eupša ke nna Jehofa Modimo wa gago go tloga nakong yeo ke go ntšhitšego nageng ya Egepeta ka yona.
Ke tla dira gore o dule ditenteng gape
Go swana le nakong ya menyanya.
10 Ke boletše le baporofeta,
Ka ba ka oketša dipono tša bona.
Ka bolela ka dipapišo ke diriša baporofeta.
11 “Kua Gileada ba dirile dilo tša bofora* le tša go hloka nnete.
Kua Giligala batho ba dirile dihlabelo ka dipoo.
Gomme dialetare tša bona di swana le mekgobo ya maswika yeo e lego diforong tša mašemo.
12 Jakobo o tšhabetše nageng ya Arama.*
Gomme gona moo, Isiraele o ile a šomela monna yo mongwe gore a hwetše mosadi.
Le gona o be a diša dinku gore a mo hwetše.
13 Jehofa o ntšhitše Isiraele Egepeta a diriša moporofeta.
Le gona o ile a diriša moporofeta go šireletša Isiraele.
14 Efuraime o kwešitše Modimo bohloko kudu.
O tla ikarabela ka madi a bao a ba bolailego.
Morena wa gagwe o tla mo otlela gore o mo nyaditše.”