Puku ya Bobedi ya Samuele
22 Ka morago Dafida a opelela Jehofa koša nakong ya ge Jehofa a be a mo phološa go manaba a gagwe ka moka le go Saulo; 2 o itše:
“Jehofa ke leswika la ka le legolo, sebo sa ka le Mohlakodiši wa ka.
3 Modimo wa ka o swana le leswika la ka leo ke tšhabelago go lona,
Ke kotse ya ka le lenaka* la ka la go mphološa, lefelo la ka leo le šireletšegilego
Le lefelo la ka leo ke tšhabelago go lona. Wena Mophološi wa ka yo a mphološago bošorong.
4 Ke bitša Jehofa, ka gobane o swanelwa ke go tumišwa,
Gomme ke tla phološwa go manaba a ka.
5 Go bjalo ka ge eka ke tateditšwe ke dithapo tša lehu.
Banna ba go se re selo bao ba swanago le mafula ba ntšhošitše.
7 Ke ile ka bitša Jehofa ke le mathateng a magolo,
Ka dula ke llela Modimo wa ka gore a nthuše.
O ile a kwa lentšu la ka a le tempeleng ya gagwe,
Gomme o ile a kwa ge ke llela gore a nthuše.*
8 Lefase la thoma go šišinyega,
Dithaba tša šikinyega,
Tša ya pele le morago ka gobane o be a galefišitšwe.
9 Muši wa tšwa dinkong tša gagwe,
Mollo o mogolo wa tšwa molomong wa gagwe
Gomme magala a tuka a etšwa go yena.
10 Ge a dutše a theoga, o ile a dira gore magodimo a iname.
Leswiswi le leso le be le le ka tlase ga dinao tša gagwe.*
11 O ile a tla a fofa a nametše mokerubi,
A tla ka lebelo a le maphegong a sebopiwa sa moya.*
12 Ke moka a ikhupetša ka leswiswi tše e kego o ikhupetša ka tente,
A ikhupetša le ka maru a maso ao a tletšego ka meetse,
13 Magadima a ile a gadima pele ga gagwe gomme a dira gore go be le magala ao a tukago mollo.
14 Ke moka Jehofa a dira gore kua magodimong go kwagale modumo,
Gomme yo Godimodimo a dira gore lentšu la gagwe le kwagale,
15 A thuntšha mesebe ya gagwe, e le gore a šwalalanye manaba a ka,
A gadimiša magadima a gagwe e le gore a a gakantšhe.
16 Dinokana tše di utamilego tša thoma go bonagala,
Metheo ya lefase ya thoma go utologa ka gobane wena Jehofa o galefile,
Ya utollwa ke modumo wa mohemo wo o tšwago dinkong tša gago.
17 A otlolla seatla sa gagwe a le kua godimo,
A ntshwara gomme a nntšha ka gare ga bodiba bja meetse.
18 O mphološitše go manaba a ka ao a bego a le matla
Le go bao ba ntlhoilego, bao ba bego ba mpheta ka matla.
19 Ba ntlhasetše letšatšing la ge ke wetšwe ke kotsi,
Eupša Jehofa yena o ile a nthekga.
20 O ile a nkiša lefelong leo le šireletšegilego.
O ile a mphološa ka gobane ke be ke mo kgahla.
22 Ka gobane ke be ke dula ke itshwara ka tsela yeo Jehofa a nyakago ka yona,
Gomme ga se ka dira bobe ka lahla Modimo wa ka.
23 Ke dula ke gopola melao ya gagwe,
Gomme nka se lebale ditaelo tša gagwe.
24 Ke tla dula ke se na molato pele ga gagwe,
Ebile ke tla dula ke phema go dira sebe.
25 Anke Jehofa a ntšhegofatše ka baka la ge ke lokile,
Le ka gobane ga ke na molato.
26 Ge motho a botega, le wena o tla dirišana le yena ka potego.
Monna yo matla yo a se nago molato o tla dirišana le yena ka go loka.
27 Bao ba dirago dilo tša go loka, le wena o ba direla dilo tša go loka,
Eupša ga o forwe ke bao ba ratago bofora.
28 Ka gobane o phološa batho bao ba ikokobeditšego,
Eupša o lwa le bao ba ikgogomošago ebile o a ba kokobetša.
29 Wena Jehofa o lebone la ka.
Jehofa ke yena yo a fetošago leswiswi leo le ntikologilego gore e be seetša.
30 Ka thušo ya gago ke tla hlasela bao ba nkamogago dilo tša ka.
Ka thušo ya Modimo ke tla tshela maboto.
31 Tsela ya Modimo wa nnete e phethagetše.
Dilo tšeo Jehofa a di bolelago di sekile.
O swana le kotse ya go šireletša batho ka moka bao ba tšhabelago go yena.
32 Modimo yo mongwe ke mang ka ntle le Jehofa?
Le gona ke mang e lego leswika ge e se Modimo wa rena?
33 Modimo wa nnete ke lefelo leo le šireletšegilego leo ke tšhabelago go lona,
Le gona, o tla mpulela tsela.
34 O dira gore maoto a ka a kitime bjalo ka a kgama,*
E le gore ke kgone go ema mafelong a phagamego ao go rapelwago go ona.
35 O ntlwaetša ntwa,
Ga bjale ke kgona go koba bora bja koporo.
36 Wena ntšhireletša ka kotse ya gago,
Gomme boikokobetšo bja gago bo a mphagamiša.
37 O mpulela tsela gore ke kgone go sepela go yona,
Maoto a ka a ka se kgopše.
38 Ke tla kitimiša manaba a ka go fihlela ke a swara.
Nka se boe go ba go fihlela a fedišwa.
39 Ke tla a rathaganya gore a se sa kgona go ema.
Ke tla a gatakela ka dinao tša ka.
40 Wena o tla mpha matla a gore ke lwe,
O tla dira gore manaba a ka a we pele ga ka.
41 O tla dira gore manaba a ka a tšhabe ge a mpona.
Ke tla bolaya bao ba ntlhoilego.
42 Ba llela thušo, eupša ga go yo a ba phološago,
Ebile ba llela Jehofa, eupša le yena ga a ba arabe.
43 Ke tla ba šila, ba swana le lerole la lefase.
Ke tla ba pšhatlaganya ka ba ka ba gatakela tše ekego ke gatakela leraga la diterateng.
44 Wena o tla mphološa go batho bao ba ratago go swayaswaya diphošo.
O tla ntšhireletša gore ke be moetapele wa ditšhaba.
Ke tla hlankelwa ke batho bao ke bego ke sa ba tsebe.
45 Batho ba go tšwa dinageng tše dingwe ba tla khunama pele ga ka ba tšhogile.
Dilo tšeo ba di kwago ka nna di tla dira gore ba ntheetše.
46 Batho ba go tšwa dinageng tše dingwe ba tla fela matla,
Ba tla tšwa mafelong ao ba ikutilego go ona ba thothomela.
47 Jehofa ke Modimo yo a phelago, anke a retwe ka gobane o swana le Leswika le legolo leo ke tšhabelago go lona,
Anke Modimo yo a mphološago a godišwe.
48 Modimo wa nnete ke Molefeletši wa ka,
O dira gore batho ba ikokobeletše nna.
49 O mphološa go manaba a ka,
Wena o a mphagamiša gore bao ba ntlhaselago ba se mphihlelele,
O mphološa go monna yo a nyakago go nkweša bohloko.
50 Ke ka baka leo ke tlago go go leboga gare ga ditšhaba, wena Jehofa,
Ke tla opela dikoša tša go reta leina la gago.