Daniele

12 “Mehleng yeo Mikaele* o tla ema, e lego moetapele yo mogolo yoo a emelago setšhaba sa geno. Le gona go tla ba le tlalelo yeo e sa kago ya ba gona ga e sa le go tloga ge setšhaba se eba gona, e bile selo se bjalo se ka se be gona go ba go fihla ka nako yeo ya tlalelo. Le gona, ka nako yeo batho ba setšhaba sa geno ba tlo phonyokga, e lego batho ka moka bao ba hwetšwago ba ngwadilwe ka pukung. 2 Batho ba bantšhi bao ba robetšego leroleng la lefase ba tla tsoga. Ba bangwe ba tla tsoga gomme ba phela go ya go ile eupša ba bangwe ba tla tsogela go tlontlollwa ke moka ba hlabišwa dihlong go ya go ile.

3 “Bao ba nago le temogo ba tla phadima go swana le leratadima leo le phadimago mosegare, gomme bao ba thušago batho ba bantšhi go dira dilo tša go loka ba tla taga go swana le dinaledi go ya go ile.

4 “Wena Daniele, boloka mantšu a puku ye e le sephiri, o be o tswalele puku ye go fihlela mehleng ya bofelo. Ba bantšhi ba tla hlahlobišiša puku ye gomme tsebo ya nnete e tla ba e ntšhi.”

5 Ke moka nna Daniele ka lebelela gomme ka bona barongwa ba babedi ba eme kgauswi le noka, yo mongwe a eme ka mono ga noka gomme yo mongwe a eme ka mola ga yona. 6 Yo mongwe wa bona a botšiša monna yo a bego a apere lešela la linene, yo a bego a le ka godimo ga meetse a re: “Dilo tša pono ye tšeo di makatšago di tlo direga go fihlela neng?” 7 Ke moka, ka kwa monna yoo a bego a apere lešela la linene, yoo a bego a eme ka godimo ga meetse e bile a emišitše matsogo a gagwe, a ena ka Modimo yo a phelago go ya go ile, a re: “Di tlo direga go fihlela go feta nako e beilwego, dinako tšeo di beilwego le seripa sa nako e beilwego. Dilo tše ka moka di tlo phethagala ka pejana ka morago ga ge go pšhatlagantšwe matla a bakgethwa.”

8 Bjale ge e le nna ke ile ka kwa eupša ka se kwešiše. Ka gona ka re: “Mong wa ka, dilo tše di tla feleletša kae?”

9 Ke moka a re: “Wena Daniele, sepela ka gobane mantšu a puku ye a swanetše go ba sephiri e bile puku ye e swanetše go dula e tswaletšwe go fihlela mehleng ya bofelo. 10 Ba bantšhi ba tla itlhwekiša, ba tla dira dilo tše di lokilego gomme ba phela bophelo bjo bo hlwekilego. Ba babe ba tla dira dilo tše mpe e bile ga go le o tee wa bona yo a tlago go kwešiša, eupša bao ba nago le temogo ba tla kwešiša.

11 “Go tloga ka nako yeo batho ba kgaoditšego go dira sehlabelo sa letšatši le letšatši gomme go beilwe selo se se šišimišago seo se bakago tshenyo, e tla ba matšatši a 1 290 (sekete-makgolopedi-masomesenyane).

12 “Go thaba motho yoo a dulago a letile go fihlela mafelelong a matšatši a 1 335 (sekete-makgolotharo-masometharo-hlano)!

13 “Eupša wena kgotlelela go fihla bofelong. O tla hlokofala,* eupša o tla tsoga gomme wa hwetša bohwa bja gago ka nako e beilwego.”