Sefela sa Difela
7 “Wena morwedi yo a kgahlišago,
Maoto a gago ke a mabotsana bjang ka gare ga diramphašane tša gago!
Sebopego sa dirope tša gago se swana le dikgabiši
Tšeo di dirilwego ke motho wa sekgwari.
2 Mokhubo wa gago o swana le sebjana sa nkgokolo.
Anke se dule se na le beine e tswakilwego.
Dimpa tša gago di swana le mokgobo wa korong,
Wo o dikologilwego ke mapolomo a dilili.
3 Matswele a gago a swana le
Bana ba babedi ba mafahla ba phala,
4 Molala wa gago o swana le tora yeo e dirilwego ka lenaka la phoofolo.
Mahlo a gago a swana le didiba tša Heshibone
Tšeo di lego keiting ya Batha-rabimi.
Nko ya gago e swana le tora ya Libanoni
Yeo e lebeletšego Damaseko.
5 Hlogo ya gago ke e botse go swana le thaba ya Karamele,
Meriri ya gago e swana le boya bjo bophepolo.
Kgoši e kgahlilwe ke meriri ya gago e metelele.
6 O yo mobotsana e le ruri moratiwa wa ka,
O yo mobotsana go feta dilo ka moka tše dibotse!
7 O bopegile go swana le mohlare wa mopalema
Gomme matswele a gago a swana le dienywa tša mopalema.
8 Ke itše: ‘Ke tla namela mohlare wa mopalema
Gore ke go kgele dienywa tša wona.’
Anke matswele a gago a swane le diterebe,
Mohemo wa gago o nkge go swana le diapola,
9 Gomme molomo wa gago o swane le beine e bose kudu,”
“Anke e theoge gabonolo mogolong wa moratiwa wa ka
Go swana le beine yeo e theogago gabonolo gomme ya dira gore motho a robale.
10 Nna ke moratiwa wa gagwe
E bile o ntlhologetše.
12 A re tsoge e sa le ka masa re ye dirapeng tša meterebe,
Re yo bona ge e ba meterebe e hlogile,
Ge e ba matšoba a thuntše,
Le ge e ba megarenate e thuntše mapolomo.
Ge re le moo ke tla go bontšha kamoo ke go ratago ka gona.
13 Dienywa di nkga bose
Gomme mejakong ya rena go na le mehuta ka moka ya dienywa
Tše diswa le tša kgale.
Wena moratiwa wa ka, ke go beetše tšona.