Sakaria
9 Molaetša wo o tšwago go Modimo šo:
“Wona ke molaetša wa Jehofa wa kahlolo
Wa go lwa le naga ya Hadirake le ya Damaseko,
Ka gobane Jehofa o lebeletše batho ka moka
Le meloko ka moka ya Isiraele.
2 O lwa le naga ya Hamathi yeo e lego kgauswi le Isiraele,
E bile o lwa le Tiro le Sidone tšeo di naganago gore di hlalefile kudu.
3 Batho ba Tiro ba ikagetše maboto gore ba itšhireletše,
Gomme ba kgobokeditše silifera bjalo ka ge eka ba kgoboketša lerole,
Ba ba ba kgoboketša gauta go swana le leraga la diterateng.
4 Jehofa o tla ba tšeela dilo tšeo tša bona,
Le gona mašole a bona o tla a lahlela lewatleng.
Ge e le Tiro yona e tlo fedišwa ka mollo.
5 Batho ba Ashikaloni ba tla bona dilo tšeo gomme ba tšhoga,
Ge e le batho ba Gatsa bona ba tla kwa bohloko kudu.
Batho ba Ekirone le bona ba tlo kwa bohloko ka gobane naga yeo ba bego ba e tshepile e tla be e hlabišitšwe dihlong.
Gatsa go ka se sa ba le kgoši,
Gomme go ka se sa ba le motho yo a dulago Ashikaloni.
6 Ashidodo go tla dula batho ba dinageng tše dingwe,
Gomme ke tla dira gore Bafilisita ba se sa ikgantšha.
7 Ke tla tloša madi ao a lego melomong ya bona
Le ditšhila menong a bona,
Gomme batho bao ba šetšego e tla ba ba Modimo wa rena.
Ba tla swana le matona a Juda,
Gomme batho ba Ekirone bona ba tla swana le Bajebusi.
8 Ke tla hloma tente ka pele ga ntlo ya ka gore ke e šireletše,
E le gore go se be le yo a fetago le yo a boelago go yona.
Le gona ga go na motho yo a gatelelago ba bangwe yo a tlago go feta moo gape,
Ka gobane ke iponetše ka mahlo a ka seo se ba diragaletšego.
9 “Thabang kudu lena batho ba Tsione.
Hlabang mekgolokwane ya gore le fentše, lena batho ba Jerusalema.
Kgoši ya gago e tla go wena.
E lokile e bile e tlo phološa batho.
E ikokobeditše gomme e nametše tonki,
E nametše tonkana, e lego ngwana wa tonki.
10 Nageng ya Efuraime ke tla fediša dikariki tša ntwa,
Ka ba ka fediša le dipere tša Jerusalema.
Bora bja ntwa bo ka se sa ba gona.
Kgoši ya lena e tla bolela mantšu a khutšo ditšhabeng,
Mmušo wa gagwe o tla tloga lewatleng le lengwe go ya go le lengwe,
Le go tloga nokeng e kgolo go fihla moo lefase le felelago.
11 “Ge e le wena Tsione,
Ke tla ntšha bagolegwa ba gago moleteng o se nago meetse,
Ka baka la kgwerano ya ka le wena yeo e tiišeditšwego ka madi.
12 “Lena bagolegwa bao ba nago le kholofelo ya go lokollwa,
Boelang lefelong leo le šireletšegilego.
“Lehono ke le botša gore: ‘Lena batho ba Tsione, ke tla le šegofatša gabedi.
13 Ka gobane ke tla koba Juda bjalo ka bora bja ka.
Ke tla tsenya Efuraime boreng e le bjalo ka mosebe.
Wena Tsione, ke tla dira gore barwa ba gago
Ba lwe le barwa ba Gerika.
Le gona wena Tsione, ke tla go dira gore o be bjalo ka tšhoša ya lešole.’
14 Jehofa o tla bontšha gore o na le batho ba gagwe.
Mosebe wa gagwe o tla tšwa ka lebelo go swana le legadima.
Mmuši Morena Jehofa o tla letša phalafala,
O tla ya go lwa le manaba a gagwe go swana le madimo a ka borwa.
15 Jehofa wa madira o tla ba lwela,
Le gona manaba a bona a tla ba hlasela ka maswikana a diragamabje, eupša bona ba tla a fenya.
Ba tla nwa, ba ba ba hlaba mašata bjalo ka ge eka ba nwele beine,
Ba tla ba bjalo ka sebjana seo se tletšego beine,
Le bjalo ka madi ao a tšhetšwego dikhoneng tša aletare.
16 “Letšatšing leo Jehofa Modimo wa bona o tla ba phološa
Bjalo ka modiši yo a phološago dinku tša gagwe.
Ka gobane ba tla phadima nageng ya gagwe go swana le maswikana ao a lego mphapahlogong.
17 Modimo o lokile kudu,
E bile letago la gagwe le kgahliša kudu!
Dijo di tla dira gore masogana a be le matla,
Gomme beine e mpsha ya dira gore dikgarebe le tšona di be le matla.”