Esitere

1 Kgoši Ahasiwerosi o be a buša go tloga India go fihla Ethopia, a buša diprofense tše 127. 2 Ka nako yeo o be a buša a le mošate wa Shushani. 3 Ka ngwaga wa boraro a buša, o ile a direla dintona tša gagwe ka moka le bahlanka ba gagwe monyanya. Mašole a Peresia le Media, bakgomana le dintona tša diprofenseng ba ile ba tla monyanyeng woo. 4 O ile a fetša matšatši a 180 a ba bontšha mahumo a mmušo wa gagwe o mogolo, bobotse bja wona le gore o na le matla a magolo. 5 Ge matšatši ao a fedile, kgoši e ile ya dira monyanya* ka matšatši a šupago ka lapeng la ka mošate. E ile ya o direla batho ka moka ba maemo a godimo le ba maemo a fase bao ba bego ba le mošate wa Shushani. 6 Lapa leo le be le kgabišitšwe ka digareteine tšeo di dirilwego ka linene, mehuta e mengwe ya mašela, le lešela le letalalerata. Digareteine tšeo di be di bofilwe ka dithapo tšeo di dirilwego ka lešela la maemo a godimo le wulu e phepholo, gomme di kgokeletšwe dihukung tša silifera tšeo di lego diphilareng tša mmabole. Ebile go be go na le disofa tša gauta le silifera lebatong leo le dirilwego ka mmabole, perela, mmabole o moso le ka leswika leo le bitšwago phofiri.

7 Batho ba be ba enwa beine ka dikomiki tša gauta, ebile dikomiki tšeo di be di sa swane, le gona beine ya ka bogošing e be e le e ntši kudu go ya le ka mokgwa wo kgoši e bego e kgona ka gona. 8 Kgoši e be e se ya ntšha molao wa go gapeletša batho go nwa, eupša e be e laetše gore bahlanka ka moka ba ka mošate wa yona ba dire seo ba se ratago.

9 Kgošigadi* Wasithi le yena o be a diretše basadi monyanya ntlong ya mošate ya Kgoši Ahasiwerosi.

10 Ka letšatši la bošupa ge Kgoši Ahasiwerosi a be a thabišitšwe ke beine, o ile a bitša bahlanka ba šupago ba kgorong bao ba bego ba mo hlankela, e lego Mehumani, Bisitha, Haribona, Bigitha, Abagatha, Sethara le Karikasi. 11 O ile a ba laela gore ba tliše Kgošigadi Wasithi pele ga gagwe a tlemile tuku ya ka bogošing, gore a tle a bontšhe merafo le dikgošana botse bja gagwe, ka gobane e be e le yo mobotse kudu. 12 Eupša Kgošigadi Wasithi o ile a dulela go gana ge kgoši e be e romela bahlanka ba ka mošate gore ba mmitše. Ge kgoši e ekwa taba yeo e ile ya kwata kudu, ya ba ya tuka bogale.

13 Ke moka kgoši e ile ya bolela le banna ba bohlale bao ba bego ba tseba ditaba tša kgale (ka gobane taba ya kgoši e ile ya fihla go bohle bao ba tsebago ditaba tša molao le kamoo melato e ahlolwago ka gona. 14 Batho bao ba bego ba le kgauswi kudu le kgoši e be e le Karashena, Shethara, Adimatha, Tarashishi, Merese, Marasena le Memukani, e lego dintona tše šupago tša Peresia le Media, tšeo di bego di kgona go tsena moo kgoši e lego gona ebile di be di na le maemo a godimo mmušong). 15 Ka gona kgoši e ile ya botšiša gore: “Go ya ka molao, Kgošigadi Wasithi o swanetše go dirwa eng ka gobane ga se a theetša taelo yeo nna Kgoši Ahasiwerosi ke e rometšego ke diriša bahlanka ba ka mošate?”

16 Ge a realo, Memukani a bolela a le pele ga kgoši le dintona a re: “Kgošigadi Wasithi ga se a senyetša kgoši feela, o senyeditše le dintona ka moka le batho ba merafo ka moka yeo e lego diprofenseng ka moka tša Kgoši Ahasiwerosi. 17 Ka gobane basadi ka moka bao ba nyetšwego ba tlo tseba taba yeo kgošigadi a e dirilego, gomme ba thoma go nyatša banna ba bona, ba re: “Kgoši Ahasiwerosi o ile a laela gore Kgošigadi Wasithi a tlišwe pele ga gagwe, eupša yena a gana go tla.’ 18 Go tloga lehono basadi ba dintona tša Peresia le Media bao ba tsebago taba yeo kgošigadi ye e e dirilego, ba tla bolela le dintona ka moka tša kgoši, gomme seo se tla dira gore go be le lenyatšo le kgalefo. 19 Ge e ba kgoši e bona taba ye e lokile, gona a e ntšhe taelo gomme taelo yeo e ngwalwe melaong ya Peresia le Media yeo e sa fetošwego. Taelo yeo e be ya gore Wasithi a se sa hlwa a etla pele ga Kgoši Ahasiwerosi. Le gona anke kgoši e tšee maemo a Wasithi a ka bogošing e a nee mosadi yo mongwe yo a mo phalago. 20 Ke moka ge batho ka moka bao ba bušwago ke kgoši ba ekwa taelo yeo, basadi ka moka bao ba nyetšwego ba tla hlompha banna ba bona, go tloga ka ba maemo a godimo go fihla ka ba maemo a fase.”

21 Taba yeo e ile ya kgahla kgoši le dintona ka moka, gomme kgoši e ile ya dira seo Memukani a se boletšego. 22 Ka gona kgoši e ile ya romela mangwalo diprofenseng ka moka tša yona. Profenseng e nngwe le e nngwe e ile ya romela lengwalo leo le ngwadilwego ka mongwalo wa batho ba moo le leleme la bona. Lengwalo leo le be le re monna yo mongwe le yo mongwe a tšwele pele a etelela lapa la gagwe pele, ebile a dule a bolela segagabo.