Doiteronomio
5 Moshe a bitša Baisiraele ka moka a re go bona: “Lena Baisiraele, ekwang melao le ditaelo tšeo ke le botšago tšona lehono, le ithute tšona gabotse e bile le phele ka tšona. 2 Jehofa Modimo wa rena o dirile kgwerano le rena kua Horebe. 3 Jehofa ga se a dira kgwerano ye le borakgolokhukhu ba rena, eupša o e dirile le rena ka moka bao re phelago mo lehono. 4 Jehofa o boletše le lena ka go lebanya Thabeng ya Horebe ka gare ga mollo. 5 Ka nako yeo ke be ke eme magareng ga lena le Jehofa gore ke le botše mantšu a Jehofa, ka gobane le be le tšhošitšwe ke mollo gomme la se rotogele thabeng. O ile a re:
6 “‘Ke nna Jehofa Modimo wa gago yo a go ntšhitšego nageng ya Egepeta, moo o bego o le lekgoba.* 7 O se ke wa rapela medimo le ge e le efe eupša o rapele nna feela.
8 “‘O se ke wa itirela seswantšho se se betlilwego, goba selo le ge e le sefe sa go swana le dilo tšeo di lego magodimong, tšeo di lego lefaseng goba tšeo di lego ka meetseng. 9 O se ke wa rapela dilo tšeo goba wa di hlankela, ka gobane nna Jehofa ke Modimo wa gago yo a nyakago gore o hlankele yena feela, le gona ke otla bana ka baka la molato wa botatago bona, ge e le bao ba ntlhoilego ke otla ditlogolo le ditlogolwana tša bona, 10 eupša bao ba nthatago e bile ba kwago melao ya ka ke tla bontšha ditlogolwana tša bona botho go iša melokong e dikete.
11 “‘O se ke wa diriša leina la Jehofa Modimo wa gago ka tsela ya go bontšha lenyatšo, ka gobane Jehofa o tlo otla motho yo mongwe le yo mongwe yo a dirišago leina la gagwe ka tsela yeo e bontšhago lenyatšo.
12 “‘O keteke letšatši la Sabatha gore e dule e le le lekgethwa, bjalo ka ge Jehofa Modimo wa gago a go laetše. 13 O swanetše gore o dire mešomo ya gago ka moka ka matšatši a tshelelago. 14 Eupša letšatši la bošupa ke sabatha ya Jehofa Modimo wa gago. O se ke wa dira mošomo le ge e le ofe, e ka ba wena, bana ba gago, makgoba a gago, poo ya gago, tonki ya gago, diruiwa tša gago goba motho yo a tšwago nageng e nngwe yo a dulago metseng ya geno, e le gore makgoba a gago a kgone go khutša go swana le wena. 15 O gopole gore o bile lekgoba nageng ya Egepeta, gomme Jehofa Modimo wa gago a go ntšha moo ka matla a gagwe a magolo. Ke ka baka leo Jehofa Modimo wa gago a go laetšego gore o keteke letšatši la Sabatha.
16 “‘Hlompha tatago le mmago, bjalo ka ge Jehofa Modimo wa gago a go laetše, e le gore o tle o phele nako e telele e bile dilo di go sepelele gabotse nageng yeo Jehofa Modimo wa gago a tlago go go nea yona.
17 “‘O se ke wa bolaya.
19 “‘O se ke wa utswa.
20 “‘O se ke wa nea bohlatse bja maaka ka motho yo mongwe.
21 “‘O se ke wa duma mosadi wa motho yo mongwe. Le gona o se ke wa duma ntlo ya motho yo mongwe, tšhemo ya gagwe, makgoba a gagwe, poo ya gagwe goba tonki ya gagwe goba selo le ge e le sefe sa motho yoo.’
22 “Ye ke melao yeo Jehofa a e boditšego setšhaba ka moka kua thabeng. O le file melao ye gomme a se ke a oketša ka selo ge a be a bolela le lena ka lentšu le legolo ka gare ga mollo le gare ga leru gotee le leswiswi le lesoleso. Ka morago ga moo a ngwala melao yeo godimo ga diphaphathi tše pedi tša maswika gomme a nnea tšona.
23 “Eupša kapejana ge le se no kwa lentšu le etšwa gare ga leswiswi, ge thaba e be e tuka mollo, baetapele ka moka ba meloko ya lena le banna ba bagolo, ba ile ba tla go nna. 24 Ke moka la re: ‘Jehofa Modimo wa rena o re bontšhitše letago la gagwe le bogolo bja gagwe, le gona re kwele lentšu la gagwe le etšwa ka gare ga mollo. Lehono re bone gore Modimo a ka bolela le motho gomme motho yoo a tšwela pele a phela. 25 Rena ga re nyake go hwa. Ka gobane mollo wo o mogolo o ka re tšhuma. Ge re ka kwa lentšu la Jehofa Modimo wa rena gape, gona re tlo hwa. 26 Ka gobane ke mang yo a kilego a kwa lentšu la Modimo yo a phelago le bolela le le ka gare ga mollo go swana le ge re le kwele gomme a tšwela pele a phela? 27 Wena batamela o kwe dilo ka moka tšeo Jehofa Modimo wa rena a tlago go di bolela, gomme o tla tla o re botša dilo ka moka tšeo Jehofa Modimo wa rena a go boditšego tšona, ke moka rena re tla di theetša ka moka ra ba ra di dira.’
28 “Ka gona Jehofa o ile a kwa dilo ka moka tšeo le mpoditšego tšona gomme Jehofa a re go nna: ‘Ke kwele dilo tšeo batho ba ba go boditšego tšona. E bile ka moka ga tšona di a kwagala. 29 Ge feela ba ka dula ba mpoifa go tšwa pelong gomme ba kwa melao ya ka ka moka, gona dilo di tla ba sepelela gabotse go ya go ile, bona le bana ba bona! 30 Eya o ba botše o re: “Boelang ditenteng tša lena.” 31 Eupša wena šala mo le nna gore ke go botše melao ka moka le ditaelo tšeo o swanetšego go ba ruta tšona le tšeo ba swanetšego go phela ka tšona nageng yeo ke ba neago yona gore e be ya bona.’ 32 Bjale le direng dilo ka moka tšeo Jehofa Modimo wa lena a le boditšego tšona. Le se ke la ba la tshela melao ya gagwe. 33 Le sepeleng ditseleng ka moka tšeo Jehofa Modimo wa lena a le laetšego gore le sepele ka tšona, e le gore le tle le phele nako e telele gomme dilo di le sepelele gabotse nageng yeo le tlago go e tšea gore e be ya lena.