Numeri

2 Jehofa a bolela le Moshe le Arone a re: 2 “Baisiraele ba hlome ditente moo dihlopha tša bona tša meloko e meraro di abetšwego gona, monna yo mongwe le yo mongwe a hlome tente kgauswi le leswao la ba moloko wa gabo. Ba hlome ditente tša bona go dikologa taberenakele, gomme di lebane le yona.

3 “Bao ba hlomago ditente tša bona ka bohlabela, e be sehlopha sa ba meloko e meraro seo se eteletšwego pele ke Juda. Kgošana ya barwa ba Juda ke Nahashone morwa wa Aminadaba. 4 Palo ya bao ba ilego ba ngwadišwa sehlopheng sa gagwe ke ba 74 600 (dikete tše masomešupa-nne-makgolotshela). 5 Ba moloko wa Isakara ba hlome ditente kgauswi le ba moloko wa Juda. Kgošana ya barwa ba Isakara ke Nethanele morwa wa Tsuari. 6 Palo ya bao ba ilego ba ngwadišwa sehlopheng sa gagwe ke ba 54 400 (dikete tše masomehlano-nne-makgolonne). 7 Ba moloko wa Sebulone ba hlome ditente ka lehlakoreng le lengwe la ba moloko wa Juda. Kgošana ya barwa ba Sebulone ke Eliaba morwa wa Helone. 8 Palo ya bao ba ilego ba ngwadišwa sehlopheng sa gagwe ke ba 57 400 (dikete tše masomehlano-šupa-makgolonne).

9 “Palo ya banna ka moka bao ba ilego ba ngwadišwa sehlopheng seo se eteletšwego pele ke Juda ke ba 186 400 (dikete tše lekgolo-masomeseswai-tshela-makgolonne). Sehlopha sa Juda e be sona sa mathomo se hlomollago ditente.

10 “Sehlopha sa meloko e meraro seo se eteletšwego pele ke Rubeni, se hlome ditente ka borwa. Kgošana ya barwa ba Rubeni ke Elitsuri morwa wa Shedeuri. 11 Palo ya bao ba ilego ba ngwadišwa sehlopheng sa gagwe ke ba 46 500 (dikete tše masomenne-tshela-makgolohlano). 12 Ba moloko wa Simeone ba hlome ditente kgauswi le ba moloko wa Rubeni. Kgošana ya barwa ba Simeone ke Shelumiele morwa wa Tsurishadai. 13 Palo ya bao ba ilego ba ngwadišwa sehlopheng sa gagwe ke ba 59 300 (dikete tše masomehlano-senyane-makgolotharo). 14 Ba moloko wa Gada ba hlome ditente ka lehlakoreng le lengwe la ba moloko wa Rubeni. Kgošana ya barwa ba Gada ke Eliasafa morwa wa Reguele. 15 Palo ya bao ba ilego ba ngwadišwa sehlopheng sa gagwe ke ba 45 650 (dikete tše masomenne-hlano-makgolotshela-masomehlano).

16 “Banna ka moka bao ba ilego ba ngwadišwa sehlopheng seo se eteletšwego pele ke Rubeni ke ba 151 450 (dikete tše lekgolo-masomehlano-tee-makgolonne-masomehlano). Sehlopha sa Rubeni e be sona sa bobedi se hlomollago ditente.

17 “Ge taberenakele e tlošwa e išwa lefelong le lengwe, ditente tša Balefi di swanetše go ba gare ga ditente tša ba meloko e mengwe.

“Ge meloko yeo e tloga, e hlomolle ditente ka go latelana ga yona. Sehlopha se sengwe le se sengwe se be moo se abetšwego gona, go ya ka sehlopha sa sona sa meloko e meraro.

18 “Sehlopha sa meloko e meraro seo se eteletšwego pele ke Efuraime, se hlome ditente ka bodikela. Kgošana ya barwa ba Efuraime ke Elishama morwa wa Amihudi. 19 Palo ya bao ba ilego ba ngwadišwa sehlopheng sa gagwe ke ba 40 500 (dikete tše masomenne-makgolohlano). 20 Ba moloko wa Manase ba hlome ditente kgauswi le ba moloko wa Efuraime. Kgošana ya barwa ba Manase ke Gamaliele morwa wa Pedatsuri. 21 Palo ya bao ba ilego ba ngwadišwa sehlopheng sa gagwe ke ba 32 200 (dikete tše masometharo-pedi-makgolopedi). 22 Ba moloko wa Benjamini ba hlome ditente ka lehlakoreng le lengwe la ba moloko wa Efuraime. Kgošana ya barwa ba Benjamini ke Abidani morwa wa Gideoni. 23 Palo ya bao ba ilego ba ngwadišwa sehlopheng sa gagwe ke ba 35 400 (dikete tše masometharo-hlano-makgolonne).

24 “Banna ka moka bao ba ilego ba ngwadišwa sehlopheng seo se eteletšwego pele ke Efuraime ke ba 108 100 (dikete tše lekgolo-seswai-lekgolo). Sehlopha sa Efuraime e be sona sa boraro se hlomollago ditente.

25 “Sehlopha sa meloko e meraro seo se eteletšwego pele ke Dani, se hlome ditente ka leboa. Kgošana ya barwa ba Dani ke Ahiesere morwa wa Amishadai. 26 Palo ya bao ba ilego ba ngwadišwa sehlopheng sa gagwe ke ba 62 700 (dikete tše masometshela-pedi-makgološupa). 27 Ba moloko wa Ashere ba hlome ditente kgauswi le ba moloko wa Dani. Kgošana ya barwa ba Ashere ke Pagiele morwa wa Okorane. 28 Palo ya bao ba ilego ba ngwadišwa sehlopheng sa gagwe ke ba 41 500 (dikete tše masomenne-tee-makgolohlano). 29 Ba moloko wa Nafutali ba hlome ditente ka lehlakoreng le lengwe la ba moloko wa Dani. Kgošana ya barwa ba Nafutali ke Ahira morwa wa Enani. 30 Palo ya bao ba ilego ba ngwadišwa sehlopheng sa gagwe ke ba 53 400 (dikete tše masomehlano-tharo-makgolonne).

31 “Banna ka moka bao ba ilego ba ngwadišwa sehlopheng seo se eteletšwego pele ke Dani ke ba 157 600 (dikete tše lekgolo-masomehlano-šupa-makgolotshela). Mo go dihlopha tša meloko e meraro tša Baisiraele, sehlopha sa Dani e be sona sa mafelelo se hlomollago ditente.”

32 Bao e be e le Baisiraele bao ba ngwadišitšwego go ya ka meloko ya bona. Banna ka moka bao ba bego ba ngwadišitšwe dihlopheng tša bona go ya ntweng, e be e le ba 603 550 (dikete tše makgolotshela-tharo-makgolohlano-masomehlano). 33 Eupša Balefi ga se ba ngwadišwa le Baisiraele ba bangwe, go ya le ka mokgwa woo Jehofa a bego a laetše Moshe. 34 Baisiraele ba ile ba dira dilo ka moka tšeo Jehofa a bego a di laetše Moshe. Wo ke wona mokgwa wo ba o dirišitšego ge ba be ba hloma ditente tša bona tša meloko e meraro le go di hlomolla. Yo mongwe le yo mongwe a dira seo go ya ka lapa la gabo le go ya ka moloko wa gabo.