Doiteronomio

14 “Lena le bana ba Jehofa Modimo wa lena. Le se ke la ikgaya* goba la ikota dintšhi* ka baka la mohu. 2 Ka gobane le setšhaba se sekgethwa go Jehofa Modimo wa lena, gomme Jehofa o le kgethile gare ga ditšhaba ka moka tša mo lefaseng, gore le be batho ba gagwe ba bohlokwa.

3 “Le se ke la ja selo le ge e le sefe seo se šišimišago. 4 Diphoofolo tšeo le ka di jago ke tše: kgomo, nku, pudi, 5 kgama, tshepe, tholo, pudi ya nageng, phala, nku ya nageng le nku ya thabeng. 6 Le ka ja phoofolo le ge e le efe yeo e nago le ditlhako tšeo di pharogilego tšeo di tšwilego diripa tše pedi, yeo gape e otlago. 7 Eupša ga se la swanela go ja diphoofolo tše di latelago tšeo di otlago goba tšeo di pharogilego ditlhako. Tšona ke kamela, mmutla le pela, ka gobane di a otla eupša ga se tša pharoga ditlhako. Ga se tša hlweka mo go lena. 8 Le kolobe le yona le se ke la e ja ka gobane e pharogile ditlhako eupša ga e otle. Ga se ya hlweka mo go lena. Le se ke la ja nama ya diphoofolo tše, goba la di kgwatha ge di hwile.

9 “Tše ke diphedi tša ka meetseng tšeo le ka di jago: Le ka ja sephedi se sengwe le se sengwe seo se nago le maphegwana le dikgapetla. 10 Eupša le se ke la ja sephedi le ge e le sefe seo se se nago maphegwana le dikgapetla. Ga se sa hlweka mo go lena.

11 “Le ka ja nonyana e nngwe le e nngwe yeo e hlwekilego. 12 Eupša ga se la swanela go ja dinonyana tše: Ntšhu, pekwa ya ka lewatleng le lenong le leso. 13 Pekwa e khwibidu, pekwa e ntsho le mehuta ka moka ya dipekwa. 14 Mehuta ka moka ya magokobu, 15 mpšhe, leribiši, nonyana ya ka lewatleng,* mehuta ka moka ya dipekwa, 16 leribiši le lenyenyane, leribiši la ditsebe tše ditelele, lepidibidi, 17 mogole, lenong le nonyana e ntsho yeo e jago dihlapi. 18 Mogolodi, mehuta ka moka ya kokolohute, nonyana yeo e lekanago le leebana le le sesane le mankgagane. 19 Diphedi ka moka tšeo di nago le maphego tšeo di sepelago ka dihlopha, le tšona ga se tša hlweka mo go lena. Le se ke la di ja. 20 Le ka ja nonyana le ge e le efe e hlwekilego.

21 “Le se ke la ja nama le ge e le efe ya phoofolo yeo e hwilego. Le ka e nea motho le ge e le ofe yo e sego Moisiraele yo a dulago le lena metseng ya lena, goba la mo rekišetša yona gore a e je, ka gobane lena le setšhaba se sekgethwa go Jehofa Modimo wa lena.

“O se ke wa fufutša putšanyana ka maswi a mmago yona.

22 “O ntšhe karolo ya lesome ya dilo tšeo o di bunnego mašemong a gago ngwaga le ngwaga. 23 O je karolo ya lesome ya mabele a gago, beine ya gago e mpsha, makhura a gago le maitšibulo a dikgomo, a dinku le a dipudi o le pele ga Jehofa Modimo wa gago lefelong leo a kgethago gore le mo hlankele go lona,* e le gore o tle o dule o ithuta go boifa Jehofa Modimo wa gago.

24 “Eupša ge e ba o ka bona lefelo leo Jehofa Modimo wa gago a le kgethilego gore leina la gagwe le be go lona le le kgole, e bile o ka se kgone go rwala dilo tšeo gore o fihle go lona, (ka ge Jehofa Modimo wa gago a tla be a go šegofaditše,) 25 gona o di rekiše ka tšhelete, ke moka o tšee tšhelete yeo o sepele le yona. O ye lefelong leo Jehofa Modimo wa gago a tlago go le kgetha. 26 Ke moka o diriše tšhelete yeo go reka selo le ge e le sefe seo o se nyakago, e ka ba e le dikgomo, dinku, dipudi, beine, bjala le ge e le bofe, le selo le ge e le sefe seo o se ratago, ke moka o di je o le pele ga Jehofa Modimo wa gago o thabile, wena le ba lapa la gago. 27 Le gona, le se ke la lebala Balefi bao ba dulago metseng ya lena, ka gobane ga se ba newa karolo goba bohwa go swana le lena.

28 “Mafelelong a mengwaga e mengwe le e mengwe e meraro, o ntšhe karolo ya lesome ya dilo ka moka tšeo o di bunnego ngwageng woo, ke moka o di iše motseng wa geno. 29 Ka morago ga moo, go tle Balefi gomme ba je ba khore, ka ge ba sa hwetše karolo goba bohwa go swana le lena. Go tle le motho yo e sego Moisiraele, tšhiwana le mohlologadi, e lego bao ba dulago metseng ya lena, gomme le bona ba je ba khore, e le gore Jehofa Modimo wa lena a le šegofatše dilong ka moka tšeo le di dirago.