Doiteronomio

25 “Ge batho ba babedi ba ka ngangišana ka taba e itšego gona ba ye go baahlodi, gomme bona ba tla bolela gore ke mang yo a nago le molato le gore ke mang yo a se nago molato. 2 Ge e ba yo a nago le molato a swanelwa ke go itiwa, gona moahlodi a mo patlamiše gomme a itiwe pele ga gagwe. Dikgati tšeo a tlago go itiwa ka tšona di swanetše go lekana le selo se sebe seo a se dirilego. 3 A ka mo itia dikgati tše 40, eupša a se ke a oketša. Ge a ka tšwela pele a mo itia ka dikgati tše dintšhi tše di fetago tšeo, gona ngwaneno o tla nyatšega pele ga lena.

4 “O se ke wa tlema poo molomo ge e fola mabele.

5 “Ge bana ba motho ba dula kgauswi le kgauswi gomme yo mongwe wa bona a hlokofala a se na morwa, gona mosadi wa mohu a se ke a nyalwa ke motho yo e sego wa leloko. Ngwanabo mohu a ye go yena a mo nyale e be mosadi wa gagwe. 6 Ngwana wa mathomo wa mošemane yo mosadi yoo a tlago go ba le yena, o tla tšewa e le ngwana wa monna wa gagwe yo a hlokofetšego, e le gore leina la monna yoo le se ke la hwelela mo Isiraeleng.

7 “Bjale ge e ba monna yoo a sa nyake go nyala mosadi wa ngwanabo, gona mosadi yoo a ye go banna ba bagolo kgorong ya motse, gomme a re go bona: ‘Ngwanabo monna wa ka o ganne go tsoša lapa la ngwanabo mo Isiraeleng. O ganne go nnyala, nna mosadi wa ngwanabo.’ 8 Banna ba bagolo ba motseng wa gabo monna yoo ba mmitše ba bolele le yena. Ge a ka no tšwela pele a re: ‘Ga ke nyake go nyala mosadi yo,’ 9 gona mosadi wa ngwanabo yo a hlokofetšego a mmatamele pele ga banna ba bagolo a mo role seeta, gomme a mo tshwele ka mare sefahlegong ke moka a re: ‘Monna yo a ganago go tsoša lapa la ngwanabo o swanetše go tshwelwa ka mare.’ 10 Ka morago ga moo lapa la gagwe mo Isiraeleng le tla tsebja ka gore ke lapa la motho yo a rotšwego seeta.

11 “Ge banna ba babedi ba ka re ba elwa gomme mosadi wa yo mongwe a tla a thuša monna wa gagwe go yoo a mo itiago, ke moka a swara monna yoo yo mongwe ka ditho tša gagwe tša bong, 12 gona o mo ripe letsogo. O se ke wa mo kwela bohloko.

13 “O se ke wa ba le dikala tše pedi tša go se swane ka mokotlaneng wa gago, e lego se segolo le se senyenyane. 14 O se ke wa ba le mehuta e mebedi ya dibjana tša go kala mabele ka ntlong ya gago, e lego se segolo le se senyenyane. 15 O be le sekala se se nepagetšego le seo se kalago gabotse, e le gore o tle o phele nako e telele nageng yeo Jehofa Modimo wa gago a go neago yona. 16 Ka gobane motho yo mongwe le yo mongwe yo a sa tshepegego yo a dirago dilo tša mohuta wo, o šišimiša Jehofa Modimo wa gago.

17 “Le gopole seo Baamaleke ba le dirilego sona ge le be le le tseleng le etšwa Egepeta. 18 Le gopole kamoo ba ilego ba gahlana le lena tseleng gomme ba hlasela batho ka moka bao ba bego ba ikgoga ba šaletše morago, ge le be le lapile e bile le fedile matla. Ba be ba sa boife Modimo. 19 Ge Jehofa Modimo wa lena a le khutšišitše manabeng a lena ka moka ao a le dikologilego mo nageng yeo Jehofa Modimo wa lena a le neago yona e le bohwa gore e be ya lena, le fediše Baamaleke gore ba se sa gopolwa ka tlase ga magodimo. Le se ke la lebala seo.