Doiteronomio
21 “Ge motho a ka hwetša motho yo a bolailwego ka sehlogo nageng yeo Jehofa Modimo wa lena a le neago yona gore e be ya lena, gomme go se na motho yo a tsebago gore motho yoo o bolailwe ke mang, 2 gona banna ba bagolo le baahlodi ba ye ba mete go tloga moo setopo seo se lego gona go fihla metseng yeo e lego kgauswi le sona gore ba tsebe gore ke motse ofe wo o lego kgauswi le setopo seo. 3 Ke moka banna ba bagolo ba motse woo o lego kgauswi le setopo seo ba tšee kgomo e tshadi yeo e sa kago ya šoma mošomo le ge e le ofe goba yeo e sa kago ya panwa, 4 gomme ba e gapele moeding wo o elago meetse woo go wona go sa kago gwa lengwa goba gwa bjalwa peu, ke moka ba e bolaye ka go e kgaola molala gona moo moeding.
5 “Ke moka baperisita, e lego Balefi le bona ba tle moo moeding, ka gobane Jehofa Modimo wa lena o ba kgethile gore ba mo hlankele le gore ba šegofatše batho ka leina la Jehofa. Ba tla bolela gore go molato o mongwe le o mongwe woo motho a hlasetšwego goba a bolailwego o swanetše go rarollwa bjang. 6 Ke moka banna ka moka ba bagolo ba motse wo o lego kgauswi le moo go hweditšwego setopo ba hlapele diatla godimo ga kgomo yeo e bolaetšwego kua moeding, 7 gomme ba bolele ba re: ‘Ga se rena re bolailego motho yo,* e bile ga se ra mmona ge a bolawa. 8 Wena Jehofa, o se ke wa bea molato setšhaba sa gago sa Isiraele seo o se lokolotšego Egepeta, le gona o se ke wa bea setšhaba sa gago sa Isiraele molato wa gore se bolaile batho bao ba se nago molato.’ Ka go realo ga go na yo a tla rego se na le molato wa go bolaya. 9 Ge le dira seo le tla tloša batho bao ba bolayago batho bao ba se nago molato mo Isiraeleng, e bile le tla be le dira seo se lokilego pele ga Jehofa.
10 “Ge le ka ya go lwa le manaba a lena gomme Jehofa Modimo wa lena a dira gore le a fenye ke moka la a thopa, 11 gomme gare ga batho bao ba thopilwego wa bona mosadi yo mobotse yo a go kgahlago, gomme wa nyaka go mo tšea gore e be mosadi wa gago, 12 gona o mo iše ntlong ya gago. Ke moka a kote moriri wa hlogo ya gagwe, a lokiše manala, 13 a apole diaparo tšeo a thopilwego a di apere gomme a dule ntlong ya gago. A fetše kgwedi ka moka a llela tatagwe le mmagwe, ka morago ga moo o robale le yena. Wena o tla ba monna wa gagwe gomme yena a ba mosadi wa gago. 14 Eupša ge e ba a sa go kgahle, o mo tlogele a ye moo a nyakago go ya gona. O se ke wa mo rekiša goba wa mo swara gampe ka ge o mo gapeleditše gore e be mosadi wa gago.
15 “Ge monna a ka ba le basadi ba babedi, gomme a rata yo mongwe kudu go feta yo mongwe, ke moka basadi bao ba mmelegela barwa gomme morwa wa mathomo ya ba wa mosadi yo a sa ratwego kudu, 16 gona e tla re ge go fihla nako ya gore a nee barwa ba gagwe bohwa, a ka se dumelelwe go swara morwa wa mosadi yo a ratwago kudu bjalo ka ge eka ke yena wa mathomo, mola e le gore morwa wa mathomo ke wa mosadi yo a sa ratwego kudu. 17 A tšee morwa wa mosadi yo a sa ratwego kudu e le yena wa mathomo ka go mo nea bohwa bjo bo fetago gabedi bja bana ba gagwe ba bangwe, ka gobane morwa yoo ke yena morwa wa gagwe wa mathomo, e lego lona leitšibulo la gagwe. Tshwanelo ya go ba morwa wa mathomo ke ya gagwe.
18 “Ge motho a ka ba le morwa wa hlogo e thata, yo a sa hlomphego molao e bile a sa kwe tatagwe goba mmagwe, gomme ba lekile ka thata go mo phošolla eupša yena a gana go ba kwa, 19 gona tatagwe le mmagwe ba mo tšee ba mo iše go banna ba bagolo kgorong ya motse wa gabo, 20 gomme ba botše banna bao ba bagolo ba re: ‘Morwa yo wa rena o na le hlogo e thata, ga a hlomphe molao e bile ga a re kwe. Ke sejagobe e bile ke setagwa.’ 21 Ke moka banna ka moka ba motseng wa gabo ba mo kgatle ka maswika a hwe. Ka gona le tlošeng motho yo mobe mo go lena, gomme Baisiraele ka moka ba tla kwa seo gomme ba tšhoga.
22 “Ge motho a ka dira sebe seo se dirago gore a swanelwe ke go bolawa, gomme la mmolaya la mo fega koteng, 23 gona setopo sa gagwe se se ke sa ba moo koteng bošego ka moka. Le mmolokeng ka lona letšatši leo, ka gobane motho yo a fegilwego koteng o šišimiša Modimo. Le se ke la šilafatša naga yeo Jehofa Modimo wa lena a le neago yona e le bohwa.