Puku ya Bobedi ya Samuele
16 Ge Dafida a be a theoga thabeng o ile a kopana le Tsiba, e lego mohlanka wa Mefiboshethe. Tsiba o be a na le ditonki tše pedi tšeo a bego a di rwešitše dinkgwa tše 200, dikuku tše 100 tšeo di dirilwego ka diterebe tšeo di omišitšwego, dikuku tše 100 tšeo di dirilwego ka dienywa tša selemo* le nkgo e kgolo ya beine. 2 Ke moka kgoši ya re go Tsiba: “Ke ka baka la eng o tlile le dilo tše?” Tsiba a re: “Ditonki ke tša go nametša ba lapa la kgoši, dinkgwa le dikuku tšeo di dirilwego ka dienywa tša selemo ke tša masogana gomme beine ke ya bao ba tlago go lapa lešokeng.” 3 Ke moka kgoši ya re: “Morwa* wa mong wa gago o kae?” Tsiba yena a re go kgoši: “O šetše Jerusalema, ka gobane o itše: ‘Lehono Baisiraele ba tlo mo kgetha gore e be kgoši go swana le rakgolo wa gagwe.’” 4 Ke moka kgoši ya re go Tsiba: “Dilo ka moka tša Mefiboshethe ke tša gago.” Tsiba a re: “Ke khunama pele ga gago kgoši mong wa ka. Anke dilo ka moka tšeo ke di dirago, di dule di go kgahla wena kgoši mong wa ka.”
5 Ge Kgoši Dafida a fihla Bahurimi, go ile gwa tšwelela monna wa ba lapa la ntlo ya Saulo yo a bitšwago Shimei, morwa wa Gera, a tšama a rogana. 6 O be a foša Kgoši Dafida le bahlanka ba gagwe ka moka ka maswika, gotee le batho ka moka le mašole a matla ao a bego a le ka lehlakoreng la gagwe le letona le le letshadi. 7 Ge Shimei a be a roga kgoši, o be a re: “Etšwa, etšwa wena monna yo a nago le molato wa madi, wena monna wa go se re selo! 8 Jehofa o bušeditše molato wa madi godimo ga gago ka baka la seo o se dirilego ba ntlo ya Saulo yo o bilego kgoši legatong la gagwe. Eupša Jehofa o fa Abesalomo morwa wa gago mmušo. Ga bjale o welwa ke masetlapelo ka ge o na le molato wa madi!”
9 Ke moka Abishai morwa wa Tseruya a re go kgoši: “Ke ka baka la eng mpša ye ya go hwa e roga kgoši mong wa ka? Hle ntumelele gore ke yo mo kgaola hlogo.” 10 Eupša kgoši ya re: “Lena barwa ba Tseruya, ke ka baka la eng le tsenatsena ditabeng tša ka? Mo leseng a nthoge ka gobane Jehofa o mmoditše gore: ‘Roga Dafida!’ Bjale ke mang yo a ka rego: ‘Ke ka baka la eng o mo roga?’” 11 Ke moka Dafida a re go Abishai le bahlanka ba gagwe ka moka: “Morwa wa ka, yena madi a ka, o nyaka go mpolaya. Bjale Mobenjamini yena a ka paledišwa ke eng? Mo tlogeleng a nthoge ka gobane Jehofa o mmoditše gore a dire bjalo! 12 Mohlomongwe Jehofa a ka bona seo se ntiragalelago gomme Jehofa a fetoša mantšu ao Shimei a nthogago ka ona lehono gore e be tšhegofatšo.” 13 Dafida le banna bao a bego a na le bona ba tšwela pele ba sepela tseleng mola Shimei a be a sepela kgauswi le thaba a lebane le Dafida, a hlabile mašata a rogana ebile a foša Dafida le banna bao a bego a na le bona ka maswika a ba tšhela le ka ditšhila.
14 Mafelelong kgoši le batho ka moka bao e bego e sepela le bona ba fihla moo ba bego ba eya gona ke moka ba khutša moo.
15 Ka nako yeo Abesalomo le batho ka moka bao ba mo thekgago ba fihla Jerusalema. Ahithofele o be a na le Abesalomo. 16 Ge Hushai wa Moarakhi, mogwera wa Dafida a fihla go Abesalomo, o ile a re: “Anke kgoši e phele nako e telele! Anke kgoši e phele nako e telele!” 17 Ke moka Abesalomo a re go Hushai: “Na bjo ke bjona botho* bjo o bo bontšhago mogwera wa gago? Ke ka baka la eng o se wa sepela le mogwera wa gago?” 18 Ka gona Hushai a re go Abesalomo: “Aowa nna ke thekga yoo Jehofa a mo kgethilego, ke thekga le batho ba le banna ka moka ba Isiraele. Ke tla dula le wena. 19 Ke tla botšiša gape ka re: Ke mang yo ke swanetšego go mo hlankela? Na ga se ka swanela go hlankela morwa wa Dafida? Go swana le ge ke ile ka hlankela tatago, le wena ke tla go hlankela.”
20 Ke moka Abesalomo a re go Ahithofele: “Ke kgopela gore o nkeletše. Re swanetše go dirang?” 21 Ahithofele a re go Abesalomo: “Robala le basadi ba tatago ba direthe, bao a ba tlogetšego gore ba šale ba hlokometše ntlo ya mošate. Ke moka Isiraele ka moka e tla kwa gore o itirile lenaba la tatago gomme bao ba go thekgago ba tlo go thekga le go feta.” 22 Ka gona, ba hlomela Abesalomo tente ka godimo ga tlhaka, ke moka a robala le basadi ba tatagwe ba direthe Baisiraele ka moka ba lebeletše.
23 Mehleng yeo, dikeletšo ka moka tšeo di tšwago go Ahithofele di be di tšewa e le tšeo di tšwago go Modimo wa nnete. Dafida le Abesalomo ba be ba tšeela godimo dikeletšo ka moka tšeo di tšwago go Ahithofele.