Jesaya
42 Bonang! Mohlanka wa ka yo ke mo thekgago!
Mohlanka wa ka yo ke mo kgethilego, le yo ke mo amogetšego!
Ke mo neile moya wa ka,
O tla tliša toka ditšhabeng.
2 A ka se goeletše goba a hlaboša lentšu,
E bile a ka se dire gore lentšu la gagwe le kwagale seterateng.
3 A ka se robe lehlaka leo le kobegilego,
E bile a ka se time thapo ya lebone yeo e šetšego e le kgauswi le go tima.
O tla tliša toka ka go tshepega.
4 A ka se fele matla goba a nolega moko go fihlela a dira toka lefaseng.
Batho bao ba dulago dihlakahlakeng ba dula ba letetše molao wa gagwe.
5 Jehofa Modimo wa nnete, yena Mmopi wa magodimo,
Yena Modimo yo Mogolo yo a a phurollago,
Yo a dirilego lefase le ditšweletšwa tša lona,
Yo a neago bao ba phelago go lona moya wa bophelo,
Le yo a neago bao ba sepelago go lona bophelo, o re:
6 “Nna Jehofa yo a dirago tša go loka, ke go biditše,
Ke go swere ka seatla.
Ke tla go šireletša, gomme o tla ba kgwerano yeo ke tlago go e dira magareng ga ka le ditšhaba,
E bile o tla ba seetša ditšhabeng,
7 Gore o bule mahlo a batho bao ba foufetšego,
O ntšhe motho yo a golegilwego ka moleteng wa leswiswi
Le go ntšha bao ba dutšego leswiswing ka teronkong.
8 “Ke nna Jehofa, leo ke lona leina la ka.
Nka se dumelele gore letago la ka le newe medimo e mengwe,
E bile nka se dumele gore tlhompho yeo ke swanetšego go e newa, e newe diswantšho tše di betlilwego.
9 “Bonang, dilo tšeo ke boletšego ka tšona kgale di diragetše.
Bjale ke le botša dilo tše mpsha.
Ke le botša tšona le pele di ka tšwelela.”
10 Opelelang Jehofa koša e mpsha,
Mo tumišeng ka koša go fihla mafelelong a lefase,
Lena bao le sepelago ka dikepe lewatleng le gare ga dilo tšeo di phelago go lona,
Lena dihlakahlaka le lena bao le dulago go tšona.
11 Anke lešoka le metse ya lona di goeletše,
Anke metsana yeo go dulago Bakedara le yona e goeletše.
Anke batho bao ba dulago mo go tletšego maswika ba goeletše ba thabile,
Anke ba goeletše ba le dintlheng tša dithaba.
12 Anke ba nee Jehofa letago,
Gomme ba mo tumiše ba le dihlakahlakeng.
13 Jehofa o tla tšwa a yo lwa go swana le monna yo matla.
O tla swana le lešole leo le felago pelo ya go ya ntweng.
O tla goeletša, ruri o tla goeletša go swana le batho bao ba yago ntweng.
O tla bontšha gore o na le matla go feta manaba a gagwe.
14 Modimo o re: “Ke ile ka dula ke homotše ka nako e telele.
Ke ile ka se bolele selo gomme ka itshwara.
Ke tla fegelwa, ka tsetsela le go hemelana
Go swana le mosadi yo a belegago.
15 Ke tla phušola dithaba le meboto,
Gomme ka omiša dimela ka moka tšeo di lego go tšona.
Ke tla dira gore dinoka e be dihlakahlaka,
Gomme ka omiša meetse ao a lego matangwaneng ao a nago le mahlaka.
16 Ke tla hlahla batho bao ba foufetšego tseleng yeo ba sa e tsebego,
Ka ba sepediša ditseleng tšeo ba sa kago ba sepela go tšona.
Ke tla dira gore leswiswi leo le lego pele ga bona e be seetša,
Gomme ka dira gore naga yeo e nago le makgwakgwa e lekalekane.
Ke tla direla batho bao ba foufetšego dilo tše, gomme nka se ba tlogele.”
17 Bao ba tshepilego diswantšho tše di betlilwego,
Bao ba rego medimo ya diswantšho ke medimo ya bona,
Ba tla fenywa gomme ba hlabišwa dihlong kudu.
18 Theetšang, lena batho bao ba sa kgonego go kwa,
Le lena batho bao ba foufetšego, lebelelang gomme le bone.
19 Ke mang yo mongwe yo a foufetšego go swana le mohlanka wa ka?
Na go na le yo a sa kgonego go kwa go swana le motho yo ke mo romago?
Ke mang yo a foufetšego go swana le motho yo ke mo neago moputso,
Goba yo a foufetšego go swana le mohlanka wa ka, nna Jehofa?
20 Wena o bona dilo tše dintšhi, eupša ga o šetše.
O na le ditsebe, eupša ga o kwe.
21 Ka ge Jehofa a lokile,
O thabela go bontšha gore molao wa gagwe o phagame e bile ke o mogolo.
22 Eupša ba ke batho bao ba tšeetšwego dilo le go thopša,
Ka moka ga bona ba kgakgetšwe ka meleteng gomme ba utwa ka diteronkong.
Ba tšeetšwe dilo, gomme ga go na yo a ba thušago,
Ba thopilwe, gomme ga go na yo a rego: “Ba bušeng!”
23 Ke mang mo gare ga lena a tlago go kwa se?
Ke mang yo a tlago go theetša gabotse e le gore a tle a holege nakong e tlago?
24 Ke mang yo a dumeletšego gore Jakobo a thopše,
Le gore Baisiraele ba tšeelwe dilo?
Na ga se Jehofa yo ba mo diretšego sebe?
Ba ile ba gana go sepela ditseleng tša gagwe,
Gomme ba gana go kwa molao wa gagwe.
25 O ile a mo galefela, gomme a mo otla ka go dira gore a welwe ke ntwa e šoro.
Ntwa yeo e ile ya fediša selo se sengwe le se sengwe mo a bego a le gona,
Eupša yena a se ke a theetša.
E ile ya mo tukela bogale, eupša yena a se iše taba yeo pelong.