Joele
2 “Letšang naka Tsione!
Hlabang mokgoši thabeng ya ka e kgethwa wa gore go tla ntwa.
Batho ka moka bao ba dutšego lefaseng a ba thothomele,
Ka gobane letšatši la Jehofa le a tla, le kgauswi!
2 Ke letšatši la leswiswi le legolo,
Letšatši la maru le la leswiswi le leso,
Le swana le seetša se se tshehla sa masa, seo se aparetšago dithaba.
Go na le batho ba bantšhi bao ba nago le matla.
Ga se gwa ka gwa ba le ba go swana le bona,
E bile go ka se tsoge go bile le ba go swana le bona
Melokong yeo e tlago go latela mengwageng e tlago.
3 Ka pele ga bona go na le mollo o tšhumago,
Ka morago ga bona go na le kgabo ya mollo e tšhumago.
Naga yeo e lego pele ga bona e swana le serapa sa Edene,
Eupša ka morago ga bona go na le lešoka leo le sa hlokomelwego,
E bile ga go seo se ka phologago moo.
4 Ba bonagala okare ke dipere
Gomme ba kitima bjalo ka dipere tša ntwa.
5 Ge ba tshela godimo ga dithaba ba kwagala eka ke modumo wa dikoloi tša ntwa,
Bjalo ka ge eka ke modumo wa mollo wo o tšhumago mahlaka.
Ba bjalo ka setšhaba se matla seo se itokišeletšago ntwa.
6 Batho ba bantšhi ge ba ba bona ba tla thothomela.
Difahlego tša bona ka moka di tla tlala letšhogo.
7 Ba kitima bjalo ka bagale ba ntwa,
Gomme ba namela maboto bjalo ka mašole.
Yo mongwe le yo mongwe o na le mo a lebilego gona
Gomme ga a fetoše tsela ya gagwe.
8 Ga ba kgorometšane.
Yo mongwe le yo mongwe o tšwela pele ka tsela ya gagwe.
Le ge ba bangwe ba ka hlabja ke dibetša ba wa,
Ba bangwe ba no ya pele.
9 Ba tsena motseng ba kitima, ba tshela maboto,
Ba namela dintlo e bile ba tsena ka mafasetere bjalo ka lehodu.
10 Legodimo le lefase ge di ba bona di a thothomela.
Letšatši le ngwedi di swiswetše,
Le dinaledi ga di sa phadima.
11 Jehofa o tla goeletša pele ga madira a gagwe gobane ke a mantšhi kudu.
Modimo o phetha seo a se boletšego e bile o na le matla,
Gobane letšatši la Jehofa ke le legolo e bile le boifiša kudu.
Ke mang a ka le kgotlelelago?”
12 Jehofa o re: “Le sa na le nako, ka gona boelang go nna ka dipelo tša lena ka moka,
Le itime dijo, le lle le be le goeletše.
13 Le se ke la no gagola diaparo tša lena, bontšhang gore le itshola go tšwa pelong,*
Le boele go Jehofa Modimo wa lena
Gobane o a šokela e bile o a gaugela, o diega go galefa gomme o tletše botho bjo bogolo.*
O tla fetoša mogopolo wa gagwe gomme a se sa tliša masetlapelo ao a bego a re o tla a tliša.
14 Go tseba mang gore o tla fetoša mogopolo wa gagwe
Gomme a le šegofatša,
E le gore le kgone go nea Jehofa Modimo wa lena sebego sa mabele le sebego sa dino?
15 Letšang naka Tsione.
Tsebišang batho gore ba ikone dijo. Bitšang batho gore ba tle sebokeng se sekgethwa.
16 Kgoboketšang batho. Dirang gore phuthego e be e kgethwa.
Kgoboketšang bakgalabje,* bana le masea.
Monyadi a tšwe phapošing ya gagwe ya ka gare, le monyadiwa a tšwe phapošing ya gagwe ya lenyalo.
17 Anke baperisita, e lego badiredi ba Jehofa,
Ba lle ba le magareng ga mejako le aletare ba re:
‘Hle Jehofa, kwela batho ba gago bohloko,
O se ke wa dira gore bohwa bja gago bo nyatšege.
O se ke wa dumelela ditšhaba di ba buša.
Ke ka baka la’ng batho ba swanetše gore: “Modimo wa bona o kae?”’
19 Jehofa o tla araba batho ba gagwe a re:
‘Ke le romela mabele, beine e mpsha le makhura.
Di tla le khoriša.
Nka se sa dumelela ditšhaba gore di le nyatše.
20 Batho bao ba tšwago ka leboa ke tla ba rakela kgole le lena,
Ka ba rakela nageng e omilego le yeo e sa dulwego ke batho.
Mašole a bona a ka pele ka a rakela lewatleng la ka bohlabela,*
Mašole a bona a ka morago ka a rakela lewatleng la ka bodikela.*
Ditopo tša bona di tla nkga,
Gomme monkgo wa gona wa tlala naga,
Ka gobane Modimo o tla dira dilo tše dikgolo.’
21 O se ke wa boifa wena naga.
Thaba o hlalale ka gobane Jehofa o tla dira dilo tše dikgolo.
22 Se boifeng lena diphoofolo tša naga,
Ka gobane mafulo a lešoka e tla ba a matala.
Le mehlare ya enywa dienywa.
Mogo le moterebe di tla enywa kudu.
23 Lena barwa ba Tsione, thabang ka baka la dilo tšeo Jehofa Modimo wa lena a tlago go le direla tšona,
Ka gobane o tlo le nešetša pula ya lehlabula yeo le e hlokago,
A ba a le nešetša pula ya matlorotloro.
Pula ya lehlabula le pula ya seruthwane di tla na go swana le peleng.
25 Ke tla le bušetša dijo tša mengwageng e fetilego
Tšeo di jelwego ke ditšie tše dikgolo, tša go hloka maphego, tša go senya le ditšie tše dingwe,
E lego madira a mantšhi ao ke a rometšego go lena.
26 Ruri le tlo ja la khora,
La ba la tumiša leina la Jehofa Modimo wa lena,
Yoo a le diretšego dilo tše di makatšago.
Nka se sa dumelela batho ba ka ba nyatšwa.
27 Le tla tseba gore ke gare ga lena Baisiraele,
Le gore ke nna Jehofa Modimo wa lena gomme ga go yo mongwe.
Le ka mohla nka se dumelele batho ba ka ba nyatšwa.
28 Ka morago ga moo, ke tla nea yo mongwe le yo mongwe wa lena moya wa ka,
Gomme barwa ba lena le barwedi ba lena ba tla porofeta.
Banna ba lena ba bagolo bona ba tla lora ditoro.
Ke moka masogana a lena a bona dipono.
29 Mehleng yeo ke tla nea bahlanka ba ka
Ba banna le ba basadi moya wa ka.
30 Le gona ke tla dira dilo tše di makatšago legodimong le lefaseng.
Go tla ba le madi, mollo le muši o montšhi.
31 Pele go etla letšatši le legolo le le le boifišago la Jehofa,
Letšatši le tla swifala gomme ngwedi wa ba o mohwibidu bjalo ka madi.
32 Yo mongwe le yo mongwe yo a bitšago leina la Jehofa o tla phološwa,
Ka gobane Thabeng ya Tsione le Jerusalema go tla ba le baphologi go etša ge Jehofa a boletše.
Go tla phologa bao ba bitšwago ke Jehofa.”