Joshua

22 Ke moka Joshua a bitša Barubeni, Bagada le seripa sa moloko wa Manase 2 a re go bona: “Le dirile dilo tšohle tšeo Moshe mohlanka wa Jehofa a le laetšego tšona e bile le kwele tšohle tšeo ke le laetšego tšona. 3 Ga se la ka la tlogela bana babo lena go fihla le lehono e bile le dirile dilo ka moka tšeo Jehofa Modimo wa lena a le laetšego tšona. 4 Ke moka Jehofa Modimo wa lena a dira gore bana babo lena ba phele ka khutšo, go etša ge a be a ba tshepišitše. Ka gona boelang ditenteng tša lena nageng ya bohwa bja lena yeo Moshe mohlanka wa Jehofa a le filego yona ka mošola* wa Noka ya Jorodane. 5 Eupša le dule le kgomaretše molao le ditaelo tšeo Moshe mohlanka wa Jehofa a le filego tšona. Le swanetše go rata Jehofa Modimo wa lena, le dire thato ya gagwe,* le phele ka melao ya gagwe, le mo kgomarele le be le mo hlankele ka pelo ka moka le ka moya* ka moka.”

6 Ke moka Joshua a ba šegofatša a re ba ye ditenteng tša bona, ke moka ba ya. 7 Moshe o be a file seripa sa moloko wa Manase Bashani gore e be bohwa bja wona gomme ba seripa se sengwe sa wona a ba fa bohwa le bana babo bona ka bodikela bja Noka ya Jorodane. Ka gona, Joshua a re ba ye ditenteng tša bona ke moka a ba šegofatša. 8 A re go bona: “Boelang ditenteng tša lena le mahumo a mantši le diruiwa tše dintši kudu le silifera le gauta le koporo le tšhipi gotee le diaparo tše dintši kudu. Tšeang dilo tšeo le di hweditšego ka morago ga go fenya manaba a lena gomme le di abelane le bana babo lena.”

9 Ka morago ga moo, Barubeni, Bagada gotee le seripa sa moloko wa Manase ba laelana le Baisiraele ba bangwe gomme ba tloga go bona. Ba tloga ba le Shilo nageng ya Kanana gomme ba boela nageng ya Gileada, e lego naga yeo ba bego ba e filwe gore e be ya bona le gore ba dule go yona go etša ge Jehofa a be a laetše Moshe. 10 Ge Barubeni, Bagada le seripa sa moloko wa Manase ba fihla kgauswi le Noka ya Jorodane nageng ya Kanana, ba ile ba aga aletare e kgolo le e botse kudu. 11 Ka morago Baisiraele ba bangwe ba kwa go bolelwa gore: “Bonang! Barubeni, Bagada le seripa sa moloko wa Manase ba agile aletare mollwaneng wa naga ya Kanana nageng ya rena yeo e lego ka bodikela bja Noka ya Jorodane.” 12 Ge setšhaba ka moka sa Isiraele se ekwa ka seo, sa kgobokana kua Shilo gore se yo lwa le bona.

13 Ke moka Baisiraele ba roma Finease morwa wa moprista Eleasara go Barubeni, Bagada le seripa sa moloko wa Manase kua Gileada. 14 O ile a ya a na le baetapele ba lesome. Ntlong e nngwe le e nngwe ya botatago bona gare ga Baisiraele ba 1 000 (sekete), go ile gwa tšwa moetapele o tee. 15 Ge ba fihla go Barubeni, Bagada le seripa sa moloko wa Manase nageng ya Gileada, ba ile ba re go bona:

16 “Setšhaba ka moka sa Jehofa se re: ‘Le re’ng le sa botegele Modimo wa Isiraele? Lehono le tlogetše go hlankela Jehofa ka gore le ikagele aletare, gomme la hlanogela Jehofa. 17 Na ga se la kgotsofalela molato wo re o dirilego kua Peoro? Na le lebetše kotlo yeo e ilego ya tlela setšhaba sa Jehofa? Re sa tlaišwa ke ditlamorago tša sebe seo. 18 Le gona, na ka nnete le nyaka go hlanogela Jehofa? Ge e ba le hlanogela Jehofa, e se kgale o tlo galefela setšhaba ka moka sa Isiraele. 19 Ge e ba le dirišwa ke gore naga yeo le dulago go yona e šilafetše, gona etlang nageng ya Jehofa moo taberenakele ya Jehofa e lego gona gomme le dule le rena. Eupša le se ke la hlanogela Jehofa e bile le se ke la dira gore le rena re mo hlanogele ka go ikagela aletare mola go na le aletare ya Jehofa Modimo wa rena. 20 Ge Akane morwa wa Tsera a be a sa botegele Modimo ka go tšea dilo tšeo di bego di swanetše go fedišwa, na Modimo ga se a galefela setšhaba ka moka sa Isiraele ka baka la gagwe? Le gona Akane o ile a dira gore ba bangwe ba hwe ka baka la molato wa gagwe.’”

21 Ge Barubeni, Bagada le seripa sa moloko wa Manase ba ekwa seo, ba araba baetapele ba malapa a Baisiraele ba re: 22 “Jehofa Modimo yo a fetago medimo ka moka! Jehofa Modimo yo a fetago medimo ka moka! O a tseba gore ke ka baka la eng re dirile se gomme Isiraele le yona e tla tseba. Jehofa, ge e ba re go hlanogetše e bile re se ra go botegela, gona lehono o se ke wa re tlogela re phela. 23 Jehofa o tla re otla ge e ba re ikagetše aletare e le gore re hlanogele Jehofa le ge e ba re e agetše go dira dibego tša go fišwa le tša mabele re dire le dihlabelo tša go dira khutšo le Modimo godimo ga yona. 24 Re agile aletare ye ka gobane re be re tshwenyegile gore ka moso barwa ba lena ba ka tla ba ra barwa ba rena ba re: ‘Le tšea kae tokelo ya go rapela Jehofa Modimo wa Isiraele? 25 Jehofa o dirile gore Noka ya Jorodane e aroganye rena le lena Barubeni gotee le Bagada. Ga le na tokelo ya go tsenatsena ditabeng tša Jehofa.’ Ka go realo, bana ba lena ba thibela bana ba rena go rapela Jehofa.”

26 “Ke moka ra re: ‘A re ikageleng aletare yeo e sego ya dibego tša go fišwa goba ya dihlabelo, 27 eupša gore e be bohlatse go rena le go lena le go ditlogolo tša rena,* bja gore re tla dula re hlankela Jehofa le go mo direla dibego tša go fišwa le dihlabelo gotee le dihlabelo tša go dira khutšo le Modimo e le gore nakong e tlago, bana ba lena ba se ke ba ra bana ba rena ba re: “Ga le na tokelo ya go tsenatsena ditabeng tša Jehofa.”’ 28 Ke moka ra re: ‘Ge nakong e tlago bana ba lena ba ka tla ba botša rena le ditlogolo tša rena mantšu a, gona re tla re go bona: “Bonang aletare yeo borakgolokhukhu ba rena ba e agilego, yeo e swanago le aletare ya Jehofa, yeo ba sa e agelago gore go dirwe dibego tša go fišwa goba dihlabelo, eupša ba e agetše gore e be bohlatse magareng ga rena le go lena.”’ 29 “Le ka mohla re ka se tsoge re hlanogetše Jehofa e bile re ka se tlogele go latela Jehofa ka go aga aletare ya go direla dibego tša go fišwa, dibego tša mabele le dihlabelo mola Jehofa Modimo wa rena a na le aletare pele ga taberenakele ya gagwe!”

30 Ge moperisita Finease, baetapele ba setšhaba le baetapele ba malapa a Baisiraele bao ba bego ba na le yena, ba ekwa seo se boletšwego ke ditlogolo tša Rubeni, Gada le Manase, ba ile ba kgotsofala. 31 Ka gona Finease morwa wa moperisita Eleasara a botša ditlogolo tša Rubeni, Gada le Manase, a re: “Lehono re a tseba gore Jehofa o na le rena, ka gobane ga se la dira se ka go se botegele Jehofa. Bjale Jehofa a ka se sa re otla.”

32 Ke moka Finease morwa wa moperisita Eleasara le baetapele ba setšhaba ba tloga go Barubeni le Bagada nageng ya Gileada ba boela nageng ya Kanana gomme ba begela Baisiraele ba bangwe ka taba yeo. 33 Ka gona, Baisiraele ba kgotsofalela taba yeo. Ke moka Baisiraele ba tumiša Modimo. Ba se sa hlwa ba bolela ka go yo lwa le Barubeni le Bagada le go yo senya naga yeo ba bego ba dula go yona.

34 Ka gona, Barubeni le Bagada ba reela aletare* yeo leina, ka gobane ba itše: “Ke bohlatse go rena bja gore Jehofa ke Modimo wa nnete.”