Esera

4 Ge manaba a Bajuda le a Babenjamini a ekwa gore bao ba boilego bothopša ba agela Jehofa Modimo wa Isiraele tempele, 2 kapelapela a ya go Serubabele le go dihlogo tša malapa a botatago bona a re go bona: “Re kgopela go aga le lena ka gobane le rena re rapela Modimo wa lena, e bile re be re dutše re mo direla dihlabelo go tloga mehleng ya Kgoši Esara-hadoni wa Asiria yo a re tlišitšego mo.” 3 Eupša Serubabele, Jeshua le dihlogo tša malapa ka moka a Isiraele ba re go manaba ao: “Le ka se age le rena ntlo ya Modimo wa rena, ka gobane ke rena feela re tlago go agela Jehofa Modimo wa Isiraele, go ya kamoo Kgoši Korese wa Peresia a re laetšego ka gona.”

4 Ke moka batho ba naga yeo ba dula ba nyamiša Bajuda le go ba fetša matla gore ba lese go aga. 5 Ba hira baeletši gore ba šitiše mošomo wa bona nakong ka moka ya ge go buša Kgoši Korese wa Peresia go fihlela go buša Kgoši Dario wa Peresia. 6 Ge go be go thoma go buša Ahasiwerosi, ba ile ba ngwala lengwalo la go latofatša batho bao ba dulago Juda le Jerusalema. 7 Nakong ya ge go buša Kgoši Arithasasitha wa Peresia, Bishilama, Mithiredathe, Tabeele le batho ka moka bao a bego a šoma le bona, ba ile ba ngwalela Kgoši Arithasasitha wa Peresia lengwalo, ba le fetolela ka Searama gomme ba le ngwala ka ditlhaka tša Searama.

8 Rehuma mohlanka yo mogolo wa mmušo le Shimishai wa mongwaledi ba ile ba ngwalela Kgoši Arithasasitha lengwalo leo le bego le latofatša batho ba Jerusalema. 9 Le be le etšwa go Rehuma mohlanka yo mogolo wa mmušo le Shimishai wa mongwaledi le batho ka moka bao ba bego ba šoma le bona, le baahlodi, babuši ba banyenyane, bangwaledi, batho ba Ereke, ba Babilona le batho bao ba dulago Susa, e lego Baelama, 10 le ditšhaba ka moka tšeo Asinapara yo mogolo le yo a hlomphegago a di išitšego bothopša gomme tša dula metseng ya Samaria le metseng e mengwe ya ka bodikela bja Noka ya Eforate. 11 Le ke lengwalo leo ba ilego ba le romela kgoši:

“Kgoši Arithasasitha, rena bahlanka ba gago bao ba lego ka bodikela bja Noka ya Eforate re re: 12 Wena kgoši ya rena, tseba gore Bajuda bao ba tlilego mo go rena ba etšwa go wena ba fihlile mo Jerusalema. Ba aga leswa motse wo badudi ba ona ba sa kwego kgoši, e bile ba dirago dilo tše mpe. Ba šetše ba fetša go aga maboto le go lokiša difantešene. 13 Bjale wena kgoši, tseba gore ge motse wo o ka agwa leswa e bile maboto a wona a fetšwa, batho ba mo ba ka se ntšhe motšhelo le ge e le ofe gomme seo se tla dira gore dikgoši di lobe tšhelete e ntšhi. 14 Ka ge re patelwa ke wena kgoši, ga re nyake go bona o lahlegelwa, ke ka baka leo re go rometšego lengwalo le gore re go tsebiše wena kgoši, 15 e le gore go nyakišišwe pukung ya dipego tšeo borakgolokhukhu ba gago ba di tlogetšego. Pukung yeo o tla kwa gore batho ba motse wo ga ba kwe, ba senyetša dikgoši le diprofense e bile gare ga bona go na le bao e lego kgale ba tsoša mpherefere. Ke ka baka leo motse wo o ilego wa fedišwa. 16 Re tsebiša wena kgoši gore ge motse wo o ka tsošološwa gomme maboto a wona a fetšwa, o ka se kgone go buša ka bodikela bja Noka ya Eforate.”

17 Ke moka kgoši e ile ya romela molaetša go Rehuma mohlanka yo mogolo wa mmušo le Shimishai wa mongwaledi le batho ka moka bao ba bego ba šoma le bona bao ba bego ba dula Samaria gotee le batho ka moka bao ba bego ba dula ka bodikela bja Noka ya Eforate, ya re:

“Madume! 18 Tsebang gore lengwalo leo le re rometšego lona ba mpaletše lona gabotse e bile ke le kwešišitše. 19 Ke laetše bahlanka ba ka gore ba nyakišiše taba yeo, gomme ba hweditše gore ke go tloga kgale batho ba motse wo ba tsogela dikgoši matla, ba sa kwe e bile ba tsoša mpherefere. 20 Jerusalema go be go na le dikgoši tše matla tšeo di bego di buša ka bodikela bja Noka ya Eforate gomme di be di ntšhetšwa metšhelo. 21 Bjale laelang banna bao gore ba emiše go aga, gore motse wo o se ke wa agwa gape go fihla ke ntšha taelo e nngwe. 22 Le se ke la dira phošo tabeng ye, e le gore dikgoši di se sa senyagalelwa.”

23 Bjale ka morago ga gore lengwalo la Kgoši Arithasasitha le balelwe Rehuma le Shimishai wa mongwaledi le batho bao ba bego ba šoma le bona, ba ile ba kitimela Jerusalema go Bajuda gomme ba ba gapeletša gore ba tlogele go aga. 24 Mošomo wa go aga ntlo ya Modimo yeo e bego e le kua Jerusalema o ile wa emišwa ka yona nako yeo, wa emišwa go fihla ngwageng wa bobedi wa ge go buša Kgoši Dario wa Peresia.