Sakaria
6 Ke moka ka lebelela godimo gape, ka bona go etla dikariki tše nne tše di tšwago magareng a dithaba tše pedi tša koporo. 2 Kariki ya pele e be e gogwa ke dipere tše khwibidu, gomme ya bobedi e gogwa ke dipere tše ntsho. 3 Kariki ya boraro e be e gogwa ke dipere tše tšhweu, gomme ya bone e gogwa ke dipere tša marothontho* le tša mebalabala.
4 Ka botšiša morongwa yo a bego a bolela le nna ka re: “Mong wa ka, ke eng dilo tše?”
5 Ke moka morongwa yoo a nkaraba a re: “Tše ke dibopiwa tše nne tša moya tša magodimong tšeo di tlogago ka morago ga go ema pele ga Modimo, yena Morena wa lefase ka moka. 6 Ge e le kariki yeo e gogwago ke dipere tše ntsho e ya nageng ya ka leboa, yeo e gogwago ke tše tšhweu yona e ya ka bodikela,* ke moka yeo e gogwago ke tša marothontho yona e ya nageng ya ka borwa. 7 Ge e le dipere tša mebalabala tšona di be di nyaka go yo sepela le lefase ka moka, e le gore di ralale le lona.” A re go tšona: “Eyang le yo sepelasepela le lefase.” Ke moka tša ralala le lefase.
8 Ke moka a mpitša gomme a re go nna: “Dipere tšeo di yago nageng ya ka leboa di dirile gore Jehofa a se sa galefela naga yeo.”
9 Jehofa a bolela le nna gape a re: 10 “Tšea dilo tšeo Heledai, Tobija le Jedaya ba di tšerego go mathopša, gomme ka lona letšatši leo, o ye ntlong ya Josia morwa wa Tsefanya gotee le batho ba bao ba tšwago Babilona. 11 O tšee silifera le gauta o dire mphapahlogo gomme o o bee hlogong ya Joshua morwa wa Jehosadaka e lego moperisita yo a phagamego. 12 Ke moka o re go yena:
“‘Jehofa wa madira o re: “Yo ke motho yo leina la gagwe e lego Lehlogedi. O tla hloga mo a lego gona gomme a aga tempele ya Jehofa. 13 Ke yena a tlago go aga tempele ya Jehofa, e bile ke yena yo a tlago go hlomphiwa. O tla dula setulong sa gagwe sa bogoši a buša gomme a ba moperisita a le go sona, e bile o tlo kgona go dira mediro ye e mebedi ka khutšo. 14 Mphapahlogo wo o tla bewa tempeleng ya Jehofa, gomme o tla gopola seo Helema, Tobija, Jedaya le Hene morwa wa Tsefanya ba se dirilego. 15 Ke moka bao ba lego kgole ba tla tla ba tlo aga tempele ya Jehofa.” Lena le tla tseba gore Jehofa wa madira o nthomile go lena. Dilo tše di tla direga ge e ba le theetša lentšu la Jehofa Modimo wa lena.’”