Psalme
Ditaelo tšeo di yago go mohlahli. Koša ya Dafida.
21 Wena Jehofa, kgoši e a thaba ka gobane o na le matla,
E thaba kudu ka gobane o a e phološa!
2 O e file seo e se kganyogago,
E bile ga se wa e tima seo e se kgopelago. (Selah)
3 Ka gobane o e šegofaditše ka dilo tše dintšhi,
E bile o beile mphapahlogo wa gauta yeo e sekišitšwego hlogong ya yona.
4 E go kgopetše bophelo, gomme wena wa e fa bjona,
Wa e dira gore e phele nako e telele, e lego go ya go ile.
5 E thaba kudu ka gobane o e phološitše.
O e file seriti le go dira gore e hlomphege.
6 O e dira gore e hwetše ditšhegofatšo go ya go ile,
O e dira gore e thabe ka ge o le kgauswi le yona.
7 Kgoši e tshepa Jehofa.
Ka ge yo Godimodimo a na le lerato le le botegago, kgoši e tla tšwela pele e buša.*
8 O tla swara manaba a gago ka moka ka letsogo la gago.
Bao ba go hloilego o tla ba swara ka letsogo la gago le letona.
9 O tla ba fediša bjalo ka ge eka o ba tšhuma ka mollo gomme gwa se šale selo.
Wena Jehofa, o tla ba fediša o galefile gomme mollo o tla ba tšhuma.
10 O tla fediša bana ba bona gore ba se sa ba gona mo lefaseng,
Gomme wa fediša ditlogolo tša bona gore di se sa ba gona gare ga batho.
11 Ka gobane ba lekile go go dira dilo tše mpe.
Ba logile maanomabe ao a ka se atlegego.
12 O tla ba dira gore ba tšhabe
Ka go ba lebantšha ka bora bja gago.
13 Hle Jehofa, ema o ba bontšhe matla a gago.
Re tla go opelela re go reta ka baka la matla a gago.