Psalme
Koša ya Dafida ya sello yeo a e opeletšego Jehofa ka baka la seo Kushe wa Mobenjamini a se boletšego.
7 Wena Jehofa Modimo wa ka, ke tšhabetše go wena.
Ntamolele go batho ka moka bao ba ntlaišago,
2 Gore go se be le yoo a rathaganyago mmele wa ka go etša tau,
Gomme ba nkgoga go se na motho wa go ntlhakodiša.
3 Wena Jehofa Modimo wa ka, ge e ba e le nna ke nago le molato,
Ge e ba ke dirile dilo tše mpe,
4 Ge e ba ke swere gampe motho yo a ntiretšego tše dibotse,
Goba ge e ba ke thopile lenaba la ka ntle le lebaka,
5 Gona lenaba le nkitimiše go fihla le ntshwara,
Le ntahlele fase gomme le nkgatakele go fihla ke ehwa
Gomme le ntlogele moo ke le maemong a nyatšegago. (Selah)
6 Hle Jehofa, dira se sengwe go bontšha gore o galefile.
Nkemelele go manaba a ka ao a nkgalefetšego.
Ke kgopela o nthuše gomme o dire gore ke swarwe ka toka.
7 Anke ditšhaba di kgobokane pele ga gago,
Gomme o di ahlole o le sedulong sa gago sa bogoši.
8 Jehofa o tla ahlola batho ka toka.
Nkahlole hle Jehofa,
Gomme o bone gore ke lokile e bile ga ke na molato.
9 Hle, dira gore batho ba babe ba se sa dira dilo tše mpe.
Eupša o lwele batho ba go loka,
Ka gobane o Modimo wa go loka, yo a hlahlobago dipelo le maikwelo a ka garegare.
10 Kotse yeo e ntšhireletšago e tšwa go Modimo, ka gobane ke Mophološi wa batho ba dipelo tše di lokilego.
11 Modimo ke Moahlodi wa go loka,
Gomme o tsebatša kahlolo ya gagwe letšatši le letšatši.
12 Ge e ba motho a ka se itshole, Modimo o loutša tšhoša ya gagwe.
O lokiša bora bja gagwe gomme a lebantšha moo a nyakago go betša gona.
13 O itokišeletša go diriša dibetša tša gagwe tša go bolaya.
O diriša mesebe ya gagwe ya mollo.
14 Lebelela yo a imilego dilo tše mpe,
O imile mathata gomme o tla belega maaka.
15 O epa molete o mogolo,
Eupša o wela gona kamoo moleteng woo a o epilego.
16 Mathata ao a a bakilego a tla boela go yena,
Dilo tše šoro tšeo a di dirilego di tla boela go yena.
17 Ke tla reta Jehofa ka baka la toka ya gagwe,
Ke tla opela dikoša tša go tumiša leina la Jehofa yo Godimodimo.