Puku ya Pele ya Dikoronika

21 Sathane* o ile a hlasela Isiraele gomme a hlohleletša Dafida gore a bale Baisiraele. 2 Ke moka Dafida a botša Joaba le baetapele ba setšhaba a re: “Sepelang le baleng Baisiraele go tloga Beresheba go fihla Dani, ke moka le tlišeng palo yeo go nna gore ke tsebe gore ke ba bakae.” 3 Eupša Joaba a re: “Anke Jehofa a oketše setšhaba sa gagwe ga lekgolo. Wena kgoši mong wa ka, na setšhaba se ka moka ga se bahlanka ba gago? Ke ka baka la eng o nyaka go se bala? Ke ka baka la eng wena mong wa ka o nyaka go diriša Isiraele sebe?”

4 Eupša kgoši ya fenya Joaba ka mantšu. Ka gona Joaba a ya a sepela le Isiraele ka moka, ka morago ga moo a boa Jerusalema. 5 Joaba a fa Dafida palo ya batho bao ba badilwego. Banna ka moka ba Isiraele bao ba bego ba na le disabola e be e le ba 1 100 000 (milione o tee le dikete tše lekgolo), gomme banna ba Juda bao ba bego ba na le disabola e be e le ba 470 000 (dikete tše makgolonne-masomešupa.) 6 Eupša Joaba ga se a bala ba moloko wa Lefi le wa Benjamini ka gobane o be a tennwe ke seo kgoši e se boletšego.

7 Modimo wa nnete o ile a tenwa kudu ke seo Dafida a bego a laetše gore se dirwe, ka gona a otla Baisiraele. 8 Ke moka Dafida a re go Modimo wa nnete: “Ke dirile sebe se segolo kudu ka go bala batho. Bjale hle ke kgopela gore o ntebalele nna mohlanka wa gago ka gobane ke dirile bošilo bja mafelelo.” 9 Ke moka Jehofa a bolela le Gada, yoo a bego a botša Dafida dipono tšeo Modimo a bego a mmontšhitše tšona, a re: 10 “Eya go Dafida o mmotše gore: ‘Jehofa o re: “Ke go tlišetša dikotlo tše tharo. Ikgethele yeo o nyakago ke go tlišetša yona.”’” 11 Gada a ya go Dafida a re go yena: “Jehofa o re: 12 ‘Na o kgetha gore nageng ya gago go be le tlala ka mengwaga e meraro goba na o kgetha gore o fetše dikgwedi tše tharo manaba a gago a go fenya e bile a go bolaya ka disabola goba na o kgetha gore morongwa wa Jehofa a fetše matšatši a mararo a diriša sabola ya Jehofa go hlasela Baisiraele ka bolwetši bjoo bo tlago go bolaya batho ba bantšhi nageng ya gago.’ Bjale naganišiša gabotse ka taba ye gomme o mpotše gore ke fetole Modimo ke reng.” 13 Ka gona Dafida a re go Gada: “Ke tlaletšwe kudu. Hle anke ke se ke ka otlwa ke motho eupša ke otlwe ke Jehofa, ka gobane o tla nkwela bohloko kudu.”

14 Ke moka Jehofa a tliša bolwetši bjo bo bolayago Isiraeleng, moo go ilego gwa hwa batho ba 70 000 (dikete tše masomešupa.) 15 Le gona, Modimo wa nnete o ile a romela morongwa Jerusalema gore a fediše badudi ba yona. Eupša e itše ge Jehofa a bona gore morongwa o kgauswi le go fediša badudi ba Jerusalema, a itshola* ka baka la masetlapelo ao ke moka a botša morongwa yo a bego a tlile go fediša batho a re: “Go lekane! Tlogela go ba fediša.” Morongwa wa Jehofa o be a le kgauswi le seboa* sa Oronani wa Mojebusi.

16 Ge Dafida a lebelela, a bona morongwa wa Jehofa a eme magareng ga legodimo le lefase a swere sabola ya gagwe a e lebišitše Jerusalema. Dafida le banna ba bagolo bao ba bego ba apere diaparo tša go dirwa ka masaka* ba ile ba napa ba khunama difahlego tša bona di kgwathile fase go bontšha gore ba a hlompha. 17 Dafida a re go Modimo wa nnete: “Na ga se nna ke laetšego gore setšhaba se balwe? Ke nna ke dirilego sebe, e bile ke nna ke dirilego phošo. Bjale batho ba bona ba dirile eng? Wena Jehofa Modimo wa ka, hle anke o otle nna le ba lapa la tate eupša o se ke wa otla batho ba gago.”

18 Ke moka morongwa wa Jehofa a botša Gada gore a yo botša Dafida gore a ye a agele Jehofa aletare seboeng sa Oronani wa Mojebusi. 19 Ka gona Dafida a dira seo Jehofa a se boletšego a diriša moporofeta Gada. 20 Ka nako yeo, Oronani ge a retologa, o ile a bona morongwa gomme barwa ba gagwe ba bane bao ba bego ba na le yena ba ile ba ya go khuta. Oronani o be a fola korong. 21 Dafida o ile a ya go Oronani. Ge Oronani a lebelela, o ile a bona Dafida, gomme ka yona nako yeo a tšwa seboeng sa gagwe gomme a khunamela Dafida a inamišitše sefahlego go bontšha gore o a mo hlompha. 22 Ke moka Dafida a re go Oronani: “Nthekišetše* lefelo le leo le nago le seboa gore ke tle ke agele Jehofa aletare go lona. Nthekišetše lona ka tšhelete ya lona e feletšego, e le gore kotlo yeo e wetšego batho, e kgaotšwe.” 23 Eupša Oronani a re go Dafida: “Itšeele lona e be la gago, gomme anke kgoši mong wa ka a dire seo a bonago se lokile pele ga gagwe. Le gona, ke go nea dikgomo gore e be dibego tša go fišwa, selei* sa go fola gore e be dikgong le korong gore e be sebego sa mabele. Ke go nea tšona ka moka.”

24 Eupša Kgoši Dafida a re go Oronani: “Aowa, ke swanetše go reka lefelo le ka tšhelete e feletšego ka gobane nka se tšee selo seo e lego sa gago ka se nea Jehofa goba ka dira dihlabelo tša go fišwa ka dilo tšeo ke sego ka di reka.” 25 Ke moka Dafida a reka lefelo leo go Oronani ka gauta yeo e imelago dikhilokgerama tše 6 840 (dikete tše tshela-makgolo-seswai-masomenne).* 26 Ke moka Dafida a agela Jehofa aletare gona moo gomme a neela dihlabelo tša go fišwa le tša go dira khutšo le Modimo.* A rapela Jehofa gomme yena a mo araba ka go romela mollo o tšwago magodimong gore o tšhume sebego sa go fišwa seo se bego se le godimo ga aletare. 27 Ke moka Jehofa a laela morongwa gore a bušetše sabola ya gagwe mokotlaneng wa yona. 28 Ka nako yeo, ge Dafida a bone gore Jehofa o arabile thapelo ya gagwe moo seboeng sa Oronani wa Mojebusi, o ile a tšwela pele a dira dihlabelo moo. 29 Eupša ka nako yeo taberenakele ya Jehofa yeo Moshe a bego a e dirile lešokeng gotee le aletare ya dibego tša go fišwa, di be di le lefelong leo go rapelwago go lona kua Gibeoni. 30 Eupša Dafida ga se a ka a kgona go ya pele ga aletare gore a bolele le Modimo, ka gobane o be a tšhošitšwe ke sabola ya morongwa wa Jehofa.