Jeremia
2 Jehofa a bolela le nna a re: 2 “Sepela o bolele le Jerusalema o re: ‘Jehofa o re:
“Ke gopola gabotse lerato leo o mpontšhitšego lona ge o be o sa le yo moswa,
Ke gopola le lerato leo o mpontšhitšego lona ge o be o dumela gore re nyalane,
Le kamoo o ilego wa ntšhala morago kua lešokeng,
Nageng yeo e sego ya bjalwa peu.
3 Isiraele e be e le e kgethwa go Jehofa, e le bjalo ka dienywa tša pele go yena.”’
‘Motho le ge e le ofe yo a bego a ka mo gobatša, o be a tlo ba le molato.
O be a tla welwa ke masetlapelo,’ o realo Jehofa.”
4 Ekwang lentšu la Jehofa lena ditlogolwana tša Jakobo,
Le lena malapa ka moka a setšhaba sa Isiraele.
5 Jehofa o re:
“Borakgolokhukhu ba lena ba ile ba hwetša phošo efe go nna,
Moo e lego gore ba ile ba ba kgole le nna,
Gomme ba rapela medimo ya go hloka mohola, e bile seo sa dira gore le bona ba hloke mohola?
6 Ga se ba ka ba botšiša gore: ‘Jehofa o kae,
Yena yoo a re ntšhitšego nageng ya Egepeta,
Yo a ilego a re hlahla lešokeng,
A re hlahla nageng ya maganata le melete,
Nageng yeo e se nago meetse le ya leswiswi le lesoleso,
Nageng yeo go sa fetego motho
Le yeo go se nago yo a dulago go yona?’
7 Ka feleletša ke le fihlišitše nageng ya mašemo a dienywa,
Gore le je dienywa tša yona le go ipshina ka dilo tša yona tše dibotse.
Eupša lena le ile la tsena nageng ya ka la e šilafatša,
La dira gore bohwa bja ka e be selo seo se šišimišago.
8 Baperisita bona ga se ba ka ba botšiša gore: ‘Jehofa o kae?’
Bao ba rutago Molao ba be ba sa ntsebe,
Badiši ba ile ba ntlhanogela,
Baporofeta le bona ba porofeta ba diriša leina la Baali,
Gomme ba rapela medimo yeo e ka se ba thušego ka selo.
9 Jehofa o re: ‘Ke tla lwa le lena gape,
E bile ke tla lwa le barwa ba barwa ba lena.’
10 ‘Eupša tshelelang dinageng tša Khithima tšeo di lego kgauswi le lewatle, gomme le boneng gore le ka hwetša eng.
Romelang molaetša kua Kedara, gomme le naganišišeng,
Le boneng ge e ba selo seo se swanago le se se kile sa direga.
11 Na setšhaba se kile sa tlogela medimo ya sona, gomme sa ya go medimo yeo e sego gona le go ba gona?
Eupša batho ba ka ba ntlhanogetše gomme ba ya go dilo tšeo di se nago mohola.
12 Jehofa o re: ‘Lena magodimo, lebelelang se le maketše,
Le thothomeleng le tšhogile kudu.
13 Ka gobane batho ba ka ba dirile dilo tše tše pedi tše mpe:
Ba ntlogetše, nna yoo mo go nna go tšwago meetse a bophelo,
E bile ba ile ba yo ikepela didiba,
E lego didiba tšeo di senyegilego, tšeo di sa kgonego go swara meetse.’
14 ‘Na Isiraele ke mohlanka goba ke lekgoba leo le belegetšwego ka ntlong?
Bjale goreng a thopilwe?
15 Ditawana di a mo rorela,
Di rorela godimo.
Di dirile gore naga ya gagwe e be marope ao a tšhošago.
Metse ya gagwe e tšhumilwe e le gore go se ke gwa ba le yo a dulago go yona.
16 Batho ba Nofe le ba Thahapanese ba tšere naga ya gago.*
17 Na se ga se seo o ipaketšego sona
Ka go tlogela Jehofa Modimo wa gago,
Nakong ya ge a be a go etile pele tseleng?
18 Bjale ke ka baka la’ng o nyaka go sepela ka tsela yeo e yago Egepeta
Gore o yo nwa meetse a Shihoro?
Goreng o nyaka go sepela ka tsela yeo e yago Asiria
Gore o yo nwa meetse a Noka ya Eforate?
19 O swanetše go ithuta go dilo tše mpe tšeo o di dirilego,
O tla kgalemelwa ka ge o se wa botega.
Ka gona, tseba o be o bone gore go tlogela Jehofa Modimo wa gago
Ke selo se sebe le seo se kwešago bohloko.
Ga se wa ka wa mpoifa,’ o realo Mmuši Morena Jehofa wa madira.
20 ‘Ka gobane ke kgale ke robile joko ya gago,
E bile ke ripagantše dithapo tša gago.
Eupša wena o itše: “Nka se go hlankele,”
Ka gobane o ile wa patlama godimo ga mmoto o mongwe le o mongwe le ka tlase ga mohlare o mongwe le o mongwe o motala,
O itira motho yo a rekišago mmele.
21 Ke go bjetše o le moterebe o mobotse o mohwibidu, woo ke o bjetšego ka peu e botsebotse,
Bjale go tlile bjang gore o fetoge makala ao a senyegilego a moterebe wa nageng pele ga ka?’
22 ‘Le ge o ka hlapa o tiišitše* gomme wa diriša sesepa se sentšhi,
O tla no dula o na le ditšhila pele ga ka ka baka la molato wa gago,’ o realo Mmuši Morena Jehofa.
23 Goreng o re ga se wa itšhilafatša,
E bile ga se wa latela Bobaali?
Lebelela tsela yeo o bego o itshwere ka yona ge o be o sepela moeding.
Naganišiša ka seo o se dirilego.
O bjalo ka kamela e nyenyane ya tshadi ya lebelo
Yeo e kitimago ka go ralala, yeo e yago pele le morago ditseleng tša yona.
24 O bjalo ka tonki ya nageng yeo e tlwaetšego lešoka,
Yeo e dupelelago mo fase e nyaka e tona.
Ga go na yo a ka e thibelago ge e nyaka go goelwa.
Ga go na tonki le ge e le efe e tona yeo e ka itapišago ge e e nyaka.
E tla no e hwetša ka nako ya yona.
25 Tlogela go kitima gore o se ke wa feleletša o šetše ka lenao,
Le gore o se ke wa swarwa ke lenyora.
Eupša wena o itše: ‘Nka se boele morago!
Aowa, ke ratana le bašele,*
E bile ke tla ba šala morago.’
26 Go no swana le ge lehodu le hlabja ke dihlong ge le tantšwe,
Le Baisiraele ba hlabišitšwe dihlong,
Bona, dikgoši tša bona, dintona tša bona,
Baperisita ba bona le baporofeta ba bona.
27 Ba re go mohlare: ‘O tate,’
Gomme ba re go leswika: ‘Wena o mpelege.’
Eupša ge e le nna ba ntlhanogetše, ga ba nyake le go ntebelela,
Gomme mohlang ba wetšwe ke masetlapelo ba tla re:
‘Ema o re phološe!’
28 Bjale e kae medimo ya gago yeo o itiretšego yona?
Anke e eme gomme e go phološe ge o wetšwe ke masetlapelo,
Ka gobane wena Juda, medimo ya gago ke e mentšhi go lekana le metse ya gago.
29 Jehofa o re: ‘Le reng le dulela go phenkgišana le nna?
Ke ka baka la’ng ka moka ga lena le ntlhanogetše?
30 Ke iteile bana ba lena eupša ga se ba ka ba holega ka selo
Ka gobane ga se ba amogela tayo.
Sabola ya lena ke yona e bolailego baporofeta ba lena
Go swana le tau yeo e galefilego.
31 Lena batho ba ka, naganišišang ka seo nna Jehofa ke se boletšego.
“Na ke fetogile lešoka go Baisiraele,
Goba na ke bjalo ka naga yeo e aparetšwego ke leswiswi le lesoleso?
Goreng batho ba ka ba itše: ‘Re ikela mo re ratago.
Re ka se sa tla go wena’?
32 Na kgarebe e ka lebala dilo tša yona tša go ikgabiša,
Goba na monyadiwa yena a ka lebala lepanta la gagwe la go ikgabiša?
Eupša ge e le batho ba ka bona ba na le nako e telele ba ntebetše.
33 Wena mosadi, ruri o mahlwaadibona tabeng ya go dira gore banna ba go rate!
E bile o bile konokono ya go dira dilo tše mpe.
34 Le gona, diaparong tša gago go hweditšwe dipatso tša madi tša badiidi bao ba se nago molato.
Dipatso tšeo di tletše diaparong tša gago ka moka,
Le ge ke sa ka ka ba hwetša ba thuba ntlong ya gago.
35 Eupša o re: ‘Ga ke na molato.
Ruri Modimo ga a sa nkgalefetše.’
Bjale ke a go ahlola,
Ka gobane o re: ‘Ga se ka dira sebe.’
36 Ke ka baka la’ng o sa tshwenyege ka selo ge o sa botege?
Egepeta le yona e tla go hlabiša dihlong,
Go no swana le ge o ile wa hlabišwa dihlong ke Asiria.
37 Ka baka la se, o tla sepela o tšama o rwele diatla hlogong ka ge o jewa ke dihlong,
Ka gobane Jehofa o ganne bao o ba tshepilego.
Ba ka se go thuše ka selo.”