Nehemia

13 Letšatšing leo go ile gwa balwa puku ya Moshe setšhaba se theeditše, gomme go yona gwa hwetšwa go ngwadilwe gore Baamoni goba Bamoaba ga se ba swanela go ba gare ga batho bao ba hlankelago Modimo wa nnete go ya go ile, 2  ka gobane ga se ba ka ba nea Baisiraele dijo le meetse, go e na le moo ba ile ba hira Bileama gore a ba roge gore ba welwe ke dilo tše mpe. Eupša Modimo wa rena o ile a fetoša thogako yeo gore e be tšhegofatšo. 3  Ge batho ba se na go kwa Molao woo ba ile ba tloša batho ka moka bao e bego e se Baisiraele mo go Baisiraele.

4  Pele ga moo, moperisita yo a bego a hlokometše diphapoši tša go bolokela dilo tša ntlo ya Modimo wa rena e be e le Eliashiba yo a bego a tswalane le Tobia. 5  Moperisita Eliashiba o ile a direla Tobia phapoši e kgolo ya go bolokela dilo. O ile a e dira moo peleng go bego go bewa moneelo wo o newago baperisita, le moo go bego go bewa sebego sa mabele, diorelo, dibjana, karolo ya lesome ya mabele, beine e mpsha le makhura, e lego dilo tšeo go bego go laetšwe gore di newe Balefi, diopedi le batho bao ba letago dikeiting.

6  Nakong yeo ka moka ke be ke se gona Jerusalema, ka gobane ka ngwaga wa bo-32 wa ge go buša Kgoši Arithasasitha wa Babilona, ke ile ka ya go kgoši gomme ka morago ga nakwana ka e kgopela gore e ntumelele gore ke boele Jerusalema. 7  Ke moka ge ke fihla moo ke ile ka bona selo se sebe seo Eliashiba a se dirilego ka go tšea phapoši ya go bolokela dilo yeo e lego ka lapeng la ntlo ya Modimo wa nnete gomme a e fa Tobia. 8  Se se ile sa nkwatiša kudu, ka gona ke ile ka tšea dithoto ka moka tša Tobia ka di lahlela ka ntle ga phapoši yeo. 9  Ke moka ka laela gore diphapoši tšeo tša go bolokela dilo di hlwekišwe, gomme ka bušetša dilo tšeo di dirišwago ntlong ya Modimo wa nnete, le sebego sa mabele gotee le diorelo.

10  Ke ile ka hwetša le gore Balefi ba be ba sa fiwe dilo tšeo ba bego ba swanetše go di hwetša, ka baka leo bona le diopedi tšeo di bego di hlankela tempeleng ba ile ba thoma go yo šoma mašemong a bona. 11  Ke ile ka sola dintona ka re: “Ke ka baka la’ng le tlogetše ntlo ya Modimo wa nnete e sa hlokomelwe?” Ke moka ke ile ka kgoboketša bao ba bego ba sepetše gomme ka ba bušetša mešomong ya bona. 12  Bajuda ka moka ba tliša karolo ya lesome ya mabele, beine e mpsha le makhura diphapošing tša go bolokela dilo. 13  Ke ile ka kgetha moperisita Shelemia, Tsadoko yo e bego e le mongwalolodi le Pedaya, e lego yo mongwe wa Balefi gore e be bona ba hlokomelago diphapoši tša go bolokela dilo, ka gobane e be e le banna ba go tsebega ka go tshepega. Bona ba be ba thušwa ke Hanana morwa wa Sakuri, e lego morwa wa Matania. Mošomo wa bona e be e le go abela banababo bona dilo.

14  Hle Modimo wa ka, ke kgopela o se ke wa lebala dilo tšeo ke di dirilego ka lerato,* ke di direla ntlo ya gago le bao ba e hlokomelago.

15  Mehleng yeo ke ile ka bona batho kua Juda ba dira beine* ka letšatši la Sabatha, ba tliša mekgobo ya mabele ba e rwešitše ditonki, ba tliša le beine, diterebe, mago le mohuta o mongwe le o mongwe wa morwalo, ba di tliša Jerusalema ka letšatši la Sabatha. Ka gona ke ile ka ba kgalemela gore ba se ke ba rekiša dilo tšeo ka letšatši leo. 16  Batiro bao ba bego ba dula moo motseng, ba be ba tliša dihlapi le mohuta o mongwe le o mongwe wa dilo tšeo di rekišwago gomme ba di rekišetša batho ba Juda le ba Jerusalema ka letšatši la Sabatha. 17  Ke ile ka sola bakgomana ba Juda ka re go bona: “Go re’ng le dira selo se se sebe e bile le šilafatša letšatši la Sabatha? 18  Na tše ga se tšona tšeo borakgolokhukhu ba lena ba bego ba di dira, moo Modimo a ilego a re otla a ba a tlišetša motse wo masetlapelo? Gona bjale le dira gore Modimo a galefele Baisiraele le go feta, ka gobane le šilafatša letšatši la Sabatha.”

19  Ke ile ka laela gore dikeiti tša Jerusalema di tswalelwe pele go eba le leswiswi, pele letšatši la Sabatha le thoma. Le gona ke ile ka ba botša gore ba se ke ba di bula go ba go fihla ge Sabatha e fetile, e bile ke ile ka bea ba bangwe ba bahlanka ba ka dikeiting gore go se ke gwa tsenywa selo mo motseng ka letšatši la Sabatha. 20  Borakgwebo le batho ba go rekiša dilo tša go fapafapana ba ile ba robala ka ntle ga dikeiti tša Jerusalema gatee goba gabedi. 21  Ke ile ka ba kgala ka re go bona: “Go re’ng le robala mo? Ge nka le bona le robetše mo gape ke tlo le tloša ka kgang.” Go tloga ka nako yeo go ya pele ba se sa hlwa ba etla ka Sabatha.

22  Le gona ke ile ka botša Balefi gore ba itlhwekiše ka mehla, e bile ba tle ba lete dikeiting e le gore letšatši la Sabatha le dule e le le lekgethwa. Hle Modimo wa ka, ke kgopela o nkgopole le tabeng ye o be o nkwele bohloko ka gobane o na le lerato le legolo.*

23  Mehleng yeo ke ile ka bona le Bajuda bao ba nyetšego basadi ba Baashidodo, ba Baamoni le ba Bamoaba. 24  Bana ba bona ba bangwe ba be ba bolela leleme la Baashidodo le maleme a ditšhaba tše dingwe, eupša go se na yo a kgonago go bolela leleme la Bajuda. 25  Ke ile ka ba sola, ka ba rogaka gore ba welwe ke dilo tše mpe, ka betha ba bangwe ba bona ka ba ka ba tumola meriri, gomme ka ba eniša ka leina la Modimo ka re: “Le se ke la nyadiša barwedi ba lena le barwa ba bona e bile le se ke la tšea barwedi ba bona gore ba nyalwe ke barwa ba lena. 26  Na se ga se sona seo se dirilego gore Kgoši Solomone wa Isiraele a dire sebe? Ditšhabeng ka moka go be go se na kgoši yeo e swanago le yena, Modimo o be a mo rata kudu e bile o ile a mo dira gore e be kgoši ya Isiraele ka moka. Eupša basadi ba ditšhaba tše dingwe ba ile ba mo diriša sebe. 27  Go a makatša gore le dirile sebe se segolo gakaaka, la se botegele Modimo wa rena ka go nyala basadi ba ditšhaba tše dingwe.”

28  Yo mongwe wa barwa ba Joyada, e lego morwa wa moperisita yo a phagamego Eliashiba e be e le mokgonyana wa Sanebalathi wa Mobethe-horoni. Ka gona ke ile ka mo raka.

29  Hle ba gopole Modimo wa ka, o be o ba otle ka gobane ba šilafaditše mošomo wa boperisita le kgwerano yeo o e dirilego le baperisita le Balefi.

30  Ke ile ka ba hlwekiša gore ba se sa šilafatšwa ke batho ba ditšhaba tše dingwe, gomme ka nea baperisita le Balefi mošomo, yo mongwe le yo mongwe wa bona ka mo nea mošomo wa gagwe, 31  le gona ke ile ka ba nea le mošomo wa go aba dikgong ka nako e beilwego le go tliša dilo tšeo di bunnwego pele.

Hle Modimo wa ka, o nkgopole ka tše botse.