Mika
6 Ekwang seo Jehofa a se bolelago hle.
Emang le tle le seke pele ga dithaba,
Le gona anke meboto e kwe mantšu a lena.
2 Lena dithaba le lena metheo ya lefase,
Ekwang seo Jehofa a se bolelago,
Jehofa o sekiša batho ba gagwe,
E bile o tlo bolela a elwa le Isiraele, a re:
3 “Lena batho ba ka, ke le dirile’ng?
Ke le lapišitše ka’ng?
Neang bohlatse bja go ntatofatša.
4 Ke nna ke le ntšhitšego nageng ya Egepeta,
Ka le lokolla mo le bego le le makgoba,
Ke ile ka roma Moshe, Arone le Miriamo gore ba le thuše.
5 Lena batho ba ka, na le sa gopola seo Kgoši Balaka wa Moaba a bego a rera go se dira,
Le gore Bileama morwa wa Beoro o mo arabile bjang?
Gopolang dilo tšeo di diregilego go tloga Shithima go fihla Giligala,
E le gore le tsebe gore nna Jehofa ke dira dilo tše di lokilego.”
6 Ke tla ya ke swere eng pele ga Jehofa?
Ke tla khunamela Modimo yo a lego legodimong ka eng?
Na ke tla tla ke swere dibego tše di feletšego tša go fišwa,
Le dinamane tša ngwaga o tee?
7 Na Jehofa o tla thabela dinku tše tona tše dintšhintšhi,
Le makhura a mantšhi?
Na nka neela morwa wa ka wa mathomo ka baka la phošo ya ka?
Na nka neela ngwanaka ka baka la sebe sa ka?
8 Modimo o go boditše se sebotse.
Ke eng seo Jehofa a se kgopelago go wena?
O kgopela feela gore o bontšhe toka, o rate go tshepega,*
E bile o be le boikokobetšo* ge o sepela le Modimo wa gago.
Ba bohlale ba tla boifa leina la gagwe.*
10 Na ka ntlong ya motho yo mobe go sa na le dilo tše bohlokwa tšeo a di hweditšego ka go dira bobe,
Le selo sa go se kale gabotse seo se šišimišago Modimo?
11 Na ke tla ba yo a hlwekilego boitshwarong mola ke šomiša dikala tša go ropa batho,
E bile ke diriša lesaka leo le nago le maswika gore ke rope batho ge ke kala?
12 Bahumi ba gona ba tletše bošoro,
Badudi ba gona ba bolela maaka,
Leleme la bona le tletše ka maaka.
13 “Ka baka leo, ke tla go otla o šoro,
Ke tla go fediša ka baka la dibe tša gago.
14 O tla ja, eupša o ka se khore,
O tla no dula o swerwe ke tlala.
O tla tloša dilo eupša o ka se kgone go di šireletša,
Gomme tšeo o tla kgonago go di tšea ke tla dira gore manaba a gago a di senye.
15 O tla bjala peu, eupša o ka se bune.
O tla gatakela dienywa tša mohlware, eupša o ka se diriše makhura a ona.
O tla dira beine e bose, eupša o ka se e nwe.
16 Ka ge le latela melao ya Omiri le tšeo di bego di dirwa ke Ahaba le ba lapa la gagwe,
E bile le latela keletšo ya bona,
Ke tla le otla.
Batho ba tla makatšwa ke dilo tšeo ke tlago go le dira tšona,
E bile ba tla le kwera.”