Puku ya Bobedi ya Samuele
1 Ka morago ga lehu la Saulo ge Dafida a boile go bolaya Baamaleke, o ile a dula Tsikilaga matšatši a mabedi. 2 Ka letšatši la boraro go ile gwa tla monna a etšwa kampeng ya Saulo. Diaparo tša gagwe di be di gagogile ebile hlogo ya gagwe e na le ditšhila. Ge a fihla go Dafida, a khunama gomme a kgwatha fase ka sefahlego go bontšha gore o a mo hlompha.
3 Dafida a mmotšiša a re: “O tšwa kae?” Yena a re go Dafida: “Ke phonyokgile kampeng ya Isiraele.” 4 Dafida a re: “Ke kgopela o mpotše gore go diregileng?” Monna yoo a re: “Mašole a tšhabile ntweng ebile a mantši a hwile. Saulo le morwa wa gagwe Jonathane le bona ba hwile.” 5 Ke moka Dafida a re go monna yoo a bego a mmotša ditaba tše: “O tseba bjang gore Saulo le morwa wa gagwe Jonathane ba hwile?” 6 Monna yoo a re: “Go ile gwa direga gore ke ikhwetše ke le Thabeng ya Giliboa. Ge ke le moo, ka bona Saulo a ithekgile ka lerumo la gagwe. Mašole a Bafilisita ao a bego a nametše dikoloi tša ntwa le dipere, a be a mo hweditše. 7 O itše ge a retologa, a mpona, gomme a mpitša. Nna ka re: ‘Ke nna yo!’ 8 A mpotšiša a re: ‘Ke wena mang?’ Nna ka re: ‘Ke Moamaleke.’ 9 Ke moka a re go nna: ‘Ke sa phela. Hle batamela mo gomme o mpheleletše ka gobane ke kwa bohloko kudu.’ 10 Ka batamela gomme ka mo feleletša ka gobane ke be ke tseba gore ge a ka wa a ka se phele ka ge a be a gobetše kudu. Ke moka ka tšea mphapahlogo wo o bego o le hlogong ya gagwe le leseka leo le bego le le letsogong la gagwe gomme ka di tliša mo go wena mong wa ka.”
11 Ge Dafida a ekwa seo, a gagola diaparo tša gagwe gomme banna ka moka bao a bego a na le bona le bona ba gagola diaparo tša bona. 12 Ba ile ba kwa bohloko kudu gomme ba lla, ba ba ba ikona dijo go fihlela mantšiboa ka baka la ge Saulo, morwa wa gagwe Jonathane, batho ba bantši ba Jehofa le Baisiraele ba bantši ba be ba bolailwe ka sabola.
13 Dafida a botšiša lesogana leo le bego le mmotša ditaba tše, a re: “Ke wena mang, gona o tšwa kae?” Lona la re: “Ke morwa wa Moamaleke yo a tšwago nageng e nngwe.” 14 Ke moka Dafida a re go lona: “O reng o se wa boifa go bolaya motlotšwa wa Jehofa?” 15 Ka morago ga moo, Dafida a bitša yo mongwe wa masogana ao a bego a na le ona a re: “Mmatamele gomme o mmolaye.” Lesogana leo la mo hlaba ka sabola gomme a hwa. 16 Dafida a re go lona: “O ipaketše lehu ka gobane molomo wa gago o go hlatsetše ge o re: ‘Nna ke bolaile motlotšwa wa Jehofa.’”
17 Ka morago Dafida a opelela Saulo le morwa wa gagwe Jonathane koša ya sello, 18 ke moka a re batho ba Juda ba rutwe koša ya sello yeo e bitšwago “Bora” yeo e ngwadilwego ka pukung ya Jashara. Koša yeo e re:
19 “Wena Isiraele bobotse bja gago bo bolaetšwe mafelong a gago a phagamego.
Ruri banna ba matla ba bolailwe!
20 Taba ye le se ke la e tsebatša kua Gathe.
Le se ke la e tsebatša diterateng tša Ashikaloni
E le gore barwedi ba Bafilisita ba se ke ba thaba,
Le gore barwedi ba banna bao ba sa bollago ba se ke ba thaba kudu.
21 Lena dithaba tša Giliboa,
Anke le se be le phoka le pula,
Anke mobu wa lena o se tšweletše dijo tšeo go dirwago dibego ka tšona,
Ka gobane kotse ya banna ba matla e ile ya hlomphollwa moo,
Ebile ga go sa na motho yoo a tlotšago kotse ya Saulo ka makhura.
22 Bora bja Jonathane le sabola ya Saulo,
Di be di sa boe di se na madi a batho bao ba bolailwego le makhura a banna ba matla,
Di be di dula di atlega.
23 Ge Saulo le Jonathane ba be ba sa phela ba be ba ratwa ke batho ebile ba ba tšea e le ba bohlokwa.
Gaešita le ge ba ehwa ga se ba ka ba aroganywa.
Ba be ba na le lebelo go feta dintšhu,
Ebile ba na le matla go feta ditau.
24 Lena barwedi ba Isiraele, llelang Saulo,
Yo a le apešitšego diaparo tše dikhwibidukhwibidu le tša maemo a godimo,
Yena yoo a beilego dikgabiši tša gauta diaparong tša lena.
25 Ruri banna ba matla ba hwetše ntweng!
Jonathane o bolailwe gasehlogo mafelong a lena a phagamego!
26 Ke tshwenyegile ka wena Jonathane,
Ke be ke go rata kudu bjalo ka buti wa ka.
O be o nthata ka tsela e makatšago ka lerato la go feta la basadi.
27 Ruri banna ba matla ba hwetše ntweng
Gomme dibetša tša ntwa di sentšwe!”